ଛତିଶଗଡର ପ୍ରଥମ ମହିଳା ଅଗ୍ନିବୀର ହିସା: ଝିଅର ପାଠ ପାଇଁ ଜମି, ଅଟୋ ବିକ୍ରି କରିଦେଇଛନ୍ତି କ୍ୟାନସର ଆକ୍ରନ୍ତ ବାପା

ରାୟପୁର: ଜଣେ ଅଟୋ ଡ୍ରାଇଭରର ଝିଅ କଠିନ ପରିଶ୍ରମ ଏବଂ ସାହସ ବଳରେ ଛତିଶଗଡର ପ୍ରଥମ ମହିଳା ଅଗ୍ନିବୀର ହୋଇଛନ୍ତି। ଏହି ସୁନା ଝିଅର ନାମ ହେଉଛି – ହିସା ବାଘେଲ । ସେ ମୂଳତଃ ଛତିଶଗଡର ଦୁର୍ଗ ଜିଲ୍ଲାର ବୋରିଗାର୍କା ଗାଁର ବାସିନ୍ଦା।ସେ ଅଗ୍ନିପଥ ଯୋଜନା ଅନ୍ତର୍ଗତ ଅଗ୍ନିବୀର ନିଯୁକ୍ତି ୨୦୨୩ ରେ ଅଂଶଗ୍ରହଣ କରିଥିଲେ। ଯେଉଁଥିରେ ସେ ମନୋନୀତ ହୋଇଥିଲେ। ବର୍ତ୍ତମାନ ହିଶା ତାଲିମ ପାଇଁ ଓଡିଶାର ଚିଲିକା ଆସିବେ। ଯେଉଁଠାରେ ମାର୍ଚ୍ଚ ପର୍ଯ୍ୟନ୍ତ ଭାରତୀୟ ନୌସେନାର ଅଧିକାରୀଙ୍କଠୁ ତାଲିମ ନେବା ପରେ ସେ ମହିଳା ଅଗ୍ନୀଭୀର ଭାବରେ ଦେଶକୁ ସୁରକ୍ଷା ଦେବେ।

କେବଳ ତାଙ୍କ ପରିବାର ନୁହେଁ, ଗ୍ରାମବାସୀ ମଧ୍ୟ ଏହି ସଫଳତାରେ ବହୁତ ଖୁସି ଅଛନ୍ତି। ଜଣେ ଶିକ୍ଷକ କହିଛନ୍ତି ଯେ ଗାଁ ସ୍କୁଲରେ ପଢିବା ପରେ ହିଶା ଉତ୍କଳ କଲେଜରେ ପାଠ ପଢୁଥିଲେ। ଯେଉଁଠାରୁ ସେ ପ୍ରଥମ ଏନସିସି କ୍ୟାଡେଟ୍ ହୋଇଥିଲେ। ତାଙ୍କ ସଫଳତା ଉପରେ ତାଙ୍କ ଶିକ୍ଷକମାନେ ମଧ୍ୟ ଖୁସି ବ୍ୟକ୍ତ କରୁଛନ୍ତି।

ଝିଅର ସଫଳତା ବିଷୟରେ ହିସାଙ୍କ ମା ସତୀ ବାଘେଲ କହିଛନ୍ତି, “ମୋର ସାନ ଝିଅ ଗାଁ ପଡିଆରେ ଯୁବକମାନଙ୍କ ସହ ଏକାକୀ ଦୌଡ଼ିବା ଅଭ୍ୟାସ ଆରମ୍ଭ କରିଥିଲା। ସେପ୍ଟେମ୍ବର ୨୦୨୨ରେ ସେ ଅଗ୍ନୀଭୀର ଯୋଜନା ଅଧୀନରେ ନୌସେନାରେ ନିଯୁକ୍ତି ପାଇଁ ଆବେଦନ କରିଥିଲେ।” ତାଙ୍କର ଫିଟନେସ୍ ଦେଖିବା ପରେ ତାଙ୍କୁ ମନୋନୀତ କରିଥିଲେ। ସେ ଦେଶର ସୁରକ୍ଷା ପାଇଁ ଶପଥ ନେଇ ସେନାରେ ଯୋଗଦେବା ପାଇଁ ଅନେକ ପ୍ରସ୍ତୁତି କରିଥିଲେ। ସେ କହିଛନ୍ତି ମୁଁ ମୋ ଝିଅ ପାଇଁ ବହୁତ ଗର୍ବିତ। ସେ ବହୁତ ପରିଶ୍ରମୀ। ସେ ତାଲିମ ପାଇଁ ସକାଳ ୪ ଟାରେ ଉଠୁଥିଲା।

ହିଶାଙ୍କ ମା କହିଛନ୍ତି, “ଆମେ ଆମର ଜମି ଏବଂ ଅଟୋ ବିକ୍ରି କରିଛୁ ଏବଂ କର୍କଟ ରୋଗରେ ପୀଡିତ ମୋ ସ୍ୱାମୀଙ୍କ ଚିକିତ୍ସା ପାଇଁ ଏହି ଟଙ୍କା ବ୍ୟବହାର କରିଛୁ। ଆମେ ଦୁଃଖରେ ଥିଲେ ମଧ୍ୟ ଆମେ ଆମ ପିଲାମାନଙ୍କୁ ଶିକ୍ଷା ଦେଉଛୁ।”

ମା ଆହୁରି କହିଛନ୍ତି, ‘ଆମେ ଆଶା କରୁଛୁ ବର୍ତ୍ତମାନ ସରକାରଙ୍କଠାରୁ ଆର୍ଥିକ ସହାୟତା ପାଇବୁ।’ ସେ କହିଛନ୍ତି ଯେ ଗତ ୧୨ ବର୍ଷ ଧରି ହିଶାଙ୍କ ବାପା କର୍କଟ ରୋଗ ସହ ଲଢୁଛନ୍ତି। ତାଙ୍କର ଚିକିତ୍ସା ଏବଂ ପିଲାମାନଙ୍କ ଶିକ୍ଷା ପାଇଁ ଜମି ସହିତ ଅଟୋ ମଧ୍ୟ ବିକ୍ରି ହୋଇସାରିଛି।