ନୂଆଦିଲ୍ଲୀ: ଭାରତରେ ଗତ ପାଞ୍ଚ ବର୍ଷ ମଧ୍ୟରେ ପୋଲିସ୍ ହେପାଜତରେ ୬୫୦ ରୁ ଅଧିକ ମୃତ୍ୟୁ ଘଟିଛି। ସଂସଦକୁ ଲିଖିତ ଉତ୍ତରରେ ଗୃହ ମନ୍ତ୍ରଣାଳୟ ଏହି ସୂଚନା ଦେଇଛି। କେନ୍ଦ୍ର ଗୃହମନ୍ତ୍ରୀ ନିତ୍ୟାନନ୍ଦ ରାୟ ରାଜ୍ୟସଭାକୁ କହିଛନ୍ତି ଯେ ଗତ ପାଞ୍ଚ ବର୍ଷ ମଧ୍ୟରେ ଦେଶରେ ୬୬୯ ଟି ପୋଲିସ ହେପାଜତରେ ମୃତ୍ୟୁ ଘଟିଛି। ମୃତ୍ୟୁର ଏହି ସଂଖ୍ୟା ୨୦୧୭ ଏପ୍ରିଲ ୧ରୁ ୨୦୨୨ ମାର୍ଚ୍ଚ ୩୧ ପର୍ଯ୍ୟନ୍ତ ରହିଛି।
ଜାତୀୟ ମାନବ ଅଧିକାର ଆୟୋଗ (ଏନଏଚଆରସି) ଦ୍ୱାରା ପ୍ରଦାନ କରାଯାଇଥିବା ତଥ୍ୟକୁ ଦର୍ଶାଇ ମନ୍ତ୍ରୀ ନିତ୍ୟାନନ୍ଦ ରାୟ ଏହି ସୂଚନା ଗୃହରେ ଦେଇଛନ୍ତି।
ମନ୍ତ୍ରୀ ନିତ୍ୟାନନ୍ଦ ରାୟଙ୍କ ସୂଚନା ଅନୁଯାୟୀ, ୨୦୨୧-୨୦୨୨ ମଧ୍ୟରେ ପୋଲିସ ହେପାଜତରେ ମୋଟ ୧୭୫ ମୃତ୍ୟୁ ମାମଲା ପଞ୍ଜିକୃତ ହୋଇଥିଲା। ୨୦୨୦-୨୦୨୧ରେ ୧୦୦ ମୃତ୍ୟୁ ମାମଲା ପଞ୍ଜିକୃତ ହୋଇଥିଲା, ୨୦୧୯-୨୦୨୧ ରେ ୧୧୨, ୨୦୧୮-୨୦୧୯ ରେ ୧୩୬ ଏବଂ ୨୦୧୭-୨୦୧୮ ରେ ୧୪୬ ମାମଲା ରହିଛି।
ନିତ୍ୟାନନ୍ଦ ରାୟ ଆହୁରି କହିଛନ୍ତି,ଏନଏଚଆରସି ୨୦୧ ମାମଲାରେ ୫,୮୦,୭୪,୯୯୮ ଟଙ୍କା ସହାୟତା ଦେଇଥିବା ବେଳେ ୨୦୧୭ ଏପ୍ରିଲ ୧ରୁ ୨୦୨୨ ମାର୍ଚ୍ଚ ୩୧ ମଧ୍ୟରେ ପୋଲିସ୍ ହେପାଜତରେ ମୃତ୍ୟୁ ଘଟଣାରେ ଗୋଟିଏ ମାମଲାରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ସୁପାରିଶ କରିଛି।
ମନ୍ତ୍ରୀ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ଭାରତ ସମ୍ବିଧାନର ସପ୍ତମ ସୂଚୀ ଅନୁଯାୟୀ ପୋଲିସ ରାଜ୍ୟର ବିଷୟ। ଏବଂ ମାନବିକ ଅଧିକାରର ସୁରକ୍ଷା ନିଶ୍ଚିତ କରିବା ସମ୍ପୃକ୍ତ ରାଜ୍ୟ ସରକାରଙ୍କ ଦାୟିତ୍ୱ।
ସେ କହିଛନ୍ତି ଯେ ଯେତେବେଳେ ଏନଏଚଆରସି ମାନବିକ ଅଧିକାରର ଉଲ୍ଲଂଘନ ଅଭିଯୋଗ ଆଣିଥାଏ, ସେତେବେଳେ ମାନବ ଅଧିକାର ଅଧିନିୟମ ଅନୁଯାୟୀ ଧାର୍ଯ୍ୟ ବ୍ୟବସ୍ଥା ଅନୁଯାୟୀ ଆୟୋଗ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତି।
Comments are closed.