ନୂଆଦିଲ୍ଲୀ: ହିଣ୍ଡେନବର୍ଗ ରିପୋର୍ଟ ପରେ ବଜାରରେ ଅସ୍ଥିରତା ଦେଖାଦେବା ସହିତ ରାଜନୈତିକ ବୟାନବାଜି ମଧ୍ୟ ତେଜିବାରେ ଲାଗିଛି।ଏହି ପ୍ରସଙ୍ଗରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ କହିଛନ୍ତି ଯେ ସୁପ୍ରିମକୋର୍ଟ ଏହି ମାମଲାକୁ ଗ୍ରହଣ କରିଥିବାରୁ ଏହା ଉପରେ ମନ୍ତବ୍ୟ ଦେବା ତାଙ୍କ ପାଇଁ ଠିକ୍ ହେବ ନାହିଁ। ଆଦାନୀ ମାମଲାରେ ଭାରତୀୟ ଜନତା ପାର୍ଟିର ଲୁଚାଇବାକୁ କିଛି ନାହିଁ। ସେପଟେ କଂଗ୍ରେସ କହିଛି ଯେ ଯଦି ସରକାରଙ୍କର ଏହି ବିଷୟରେ କିଛି ଲୁଚାଇବାକୁ ନାହିଁ ତେବେ ଯୁଗ୍ମ ସଂସଦୀୟ କମିଟି (ଜେପିସି) ତଦନ୍ତ ନିର୍ଦ୍ଦେଶ କାହିଁକି ଦେଉନାହାନ୍ତି। ଗୃହମନ୍ତ୍ରୀ ଅମିତ ଶାହାଙ୍କ ବିବୃତ୍ତି ସମ୍ପର୍କରେ ଜୟରାମ ରମେଶ ଏହି ମନ୍ତବ୍ୟ ଦେଇଛନ୍ତି।
ଖବର ସରବରାହ ସଂସ୍ଥା ଏଏନଆଇକୁ ସାକ୍ଷାତକାର ଦେଇ ଅମିତ ଶାହ କହିଛନ୍ତି ଯେ ଆଦାନୀ ମାମଲା ସୁପ୍ରିମକୋର୍ଟରେ ଅଛି। କୋର୍ଟ ଏହା ଉପରେ ଦୃଷ୍ଟି ରଖିଛନ୍ତି, ତେଣୁ ମନ୍ତ୍ରୀ ପଦବୀରେ ଥିବାରୁ ଏହାଉପରେ କିଛି କହିବା ଠିକ୍ ହେବନି। କିନ୍ତୁ ତାଙ୍କ ଦଳ ବିଜେପି ପାଇଁ ଲୁଚାଇବା କିମ୍ବା ଭୟ କରିବାର କିଛି ନାହିଁ। ହିଣ୍ଡେନବର୍ଗ-ଆଦାନୀ ବିବାଦରେ କଂଗ୍ରେସ ଏବଂ ଅନ୍ୟ ବିରୋଧୀ ଦଳ ସରକାରଙ୍କୁ ପକ୍ଷପାତିତା ଏବଂ କ୍ୟାପିଟାଲ ପୁଞ୍ଜିବାଦ ବୋଲି ଅଭିଯୋଗ କରିଛନ୍ତି। ଯୁଗ୍ମ ସଂସଦୀୟ କମିଟିର ତଦନ୍ତ ଦାବି କରି ସଂସଦର ବଜେଟ୍ ଅଧିବେଶନରେ ଏହି ପ୍ରସଙ୍ଗ ଉଠାଇଥିଲେ।
ଏହି ପ୍ରସଙ୍ଗରେ ବିରୋଧୀ ଦଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମଧ୍ୟ ଟାର୍ଗେଟ କରିଛନ୍ତି। ସେ ଆଦାନୀ ଗୋଷ୍ଠୀରେ ଏଲଆଇସି ଏବଂ କିଛି ସରକାରୀ କ୍ଷେତ୍ରର ପୁଞ୍ଜି ବିନିଯୋଗ ଉପରେ ଉତ୍ତର ଲୋଡିଛନ୍ତି। ସୋମବାର ସୁପ୍ରିମକୋର୍ଟଙ୍କୁ ସରକାର କହିଛନ୍ତି ଯେ ଆଦାନୀ ଗ୍ରୁପ ଉପରେ ହିଣ୍ଡେନବର୍ଗ ରିପୋର୍ଟ ପରେ ନିବେଶକଙ୍କ ସ୍ୱାର୍ଥ ରକ୍ଷା ପାଇଁ ସେବି ଏକ କମିଟି ଗଠନ କରିବାକୁ ରାଜି ହୋଇଛି।
ଜୟରାମ ରମେଶ କହିଛନ୍ତି ଯେ ସେ ରିଜର୍ଭ ବ୍ୟାଙ୍କର ଗଭର୍ଣ୍ଣର ତଥା ସେବି ମୁଖ୍ୟଙ୍କୁ ଚିଠି ଲେଖି ଏହି ଘଟଣାର ନିରପେକ୍ଷ ତଦନ୍ତ ଦାବି କରିଛନ୍ତି। ଜେପିସିର ଦାବିରୁ କଂଗ୍ରେସ ପଛଘୁଞ୍ଚା ଦେବ ନାହିଁ ବୋଲି ସେ କହିଛନ୍ତି।
ରମେଶ କହିଛନ୍ତି, କଂଗ୍ରେସ ଉଦାରୀକରଣର ବିରୋଧୀ ନୁହେଁ, କିନ୍ତୁ ଉଦାରୀକରଣ ନିୟମ ଅନୁଯାୟୀ ଏବଂ ସ୍ୱଚ୍ଛତା ସହିତ ହେବା ଉଚିତ୍। ସେ କହିଛନ୍ତି ଯେ ଆଦାନୀ ମାମଲା ‘କ୍ୟାପିଟାଲ ପୁଞ୍ଜିପତି’ଙ୍କର ଏକ ଉଦାହରଣ।
Comments are closed.