ଭୁବନେଶ୍ୱର: ବୁଧବାର ଓଡ଼ିଶା ସରକାର ୩ ଜଣ ଆଇପିଏସ୍ ଅଧିକାରୀଙ୍କୁ ପୁଲିସ ମହାନିର୍ଦ୍ଦେଶକ ପାହ୍ୟାକୁ ପଦୋନ୍ନତି ଦେବା ନେଇ ଘୋଷଣା କରିଛନ୍ତି। ତିନି ଅଧିକାରୀ ଅରୁଣ ଷଡ଼ଙ୍ଗୀ, ସୁଧାଂଶୁ ଷଡ଼ଙ୍ଗୀ, ଓ୍ୱାଇ. ବି. ଖୁରାନିଆ ସମସ୍ତେ ୧୯୯୦ ବ୍ୟାଚର। ଓଡ଼ିଶା ସରକାରଙ୍କ ସାଧାରଣ ପ୍ରଶାସନ ଓ ଜନ ଅଭିଯୋଗ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି।
ବର୍ତ୍ତମାନ ଏଡିଜିପି ଓ ବିଜୁ ପଟ୍ଟନାୟକ ରାଜ୍ୟ ପୋଲିସ ଏକାଡେମୀର ନିର୍ଦ୍ଦେଶକ ଭାବେ କାର୍ଯ୍ୟରତ ଅରୁଣ ଷଡ଼ଙ୍ଗୀଙ୍କୁ ଡିଜି ପାହ୍ୟାକୁ ପଦୋନ୍ନତି ମିଳିଛି। ସେହିପରି ସୁଧାଂଶୁ ଷଡ଼ଙ୍ଗୀ ଏବେ ଭୁବନେଶ୍ୱରସ୍ଥିତ ଓଡ଼ିଶା ରାଜ୍ୟ ପୁଲିସ ହାଉସିଂ ଆଣ୍ଡ ଓ୍ୱେଲଫେୟାର କର୍ପୋରେସନ୍ ଲିମିଟେଡର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ଭାବେ କାର୍ଯ୍ୟ କରୁଛନ୍ତି।
କେନ୍ଦ୍ରୀୟ ଡେପୁଟେସନରେ ଥିବା ଯୋଗେଶ ବାହାଦୂର ଖୁରାନିଆଙ୍କୁ ବେତନ ମ୍ୟାଟ୍ରିକ୍ସର ଲେଭଲ ୧୬ରେ ଆଇପିଏସରେ ପୋଲିସ ଡିଜି ଗ୍ରେଡକୁ ପ୍ରୋ-ଫର୍ମା ପଦୋନ୍ନତି ଅନୁମତି ଦିଆଯାଇଛି। ଏହି ପଦୋନ୍ନତି ଫଳରେ ଖୁରାନିଆଙ୍କୁ ଡିଜି ପାହ୍ୟା ସହ ମିଳୁଥିବା ସୁବିଧା ସୁଯୋଗ ମିଳିବ, ଯଦିଓ ସେ ଏବେ ଭିନ୍ନ ପଦବୀରେ କାର୍ଯ୍ଯ କରୁଛନ୍ତି।
ଏହି ତିନି ଅଧିକାରୀଙ୍କ ପଦୋନ୍ନତି ଦ୍ୱାରା ରାଜ୍ୟ ପୁଲିସ ବାହିନୀ ସୁଦୃଢ଼ ହେବା ସହ ଆଇନ ଶୃଙ୍ଖଳା ରକ୍ଷାରେ ଏହାର ଦକ୍ଷତା ବୃଦ୍ଧି ପାଇବ ବୋଲି ଆଶା କରାଯାଉଛି। ଏହି ପଦକ୍ଷେପ ସେମାନଙ୍କ ବର୍ଷ ବର୍ଷର ସେବା ଓ ପୁଲିସ ବାହିନୀ ପ୍ରତି ସମର୍ପଣର ସ୍ୱୀକୃତି ଭାବେ ମଧ୍ୟ ଦେଖାଯାଉଛି।
Comments are closed.