କଟକ: ଏକ ଦୁର୍ଭାଗ୍ୟଜନକ ଘଟଣାକ୍ରମରେ ବାରବାଟୀ ଷ୍ଟାଡିୟମ, ଯୋବ୍ରା, ଓ ଚାଉଳିଆଗଞ୍ଜ ନିକଟରେ ଜଣେ ନିଶାସକ୍ତ ବ୍ୟକ୍ତିଙ୍କ ଦ୍ୱାରା ପରିଚାଳିତ ଏକ କାର୍ ଏକାଧିକ ଗାଡ଼ିକୁ ଧକ୍କା ଦେବା ଫଳରେ କଟକରେ ସିରିଜ ଦୁର୍ଘଟଣା ଦେଖିବାକୁ ମିଳିଛି। ବେପରୁଆ ଡ୍ରାଇଭର ଜଣଙ୍କୁ ପରେ ସ୍ଥାନୀୟ ଲୋକେ କାବୁ କରି ମାଡ ମାରିଥିବା ଜଣାପଡ଼ିଛି।
ପ୍ରତ୍ୟକ୍ଷଦର୍ଶୀମାନେ ସୂଚନା ଦେଇଛନ୍ତି ଯେ ବାରବାଟୀ ଷ୍ଟାଡିୟମ ନିକଟରେ ଏହି ଘଟଣା ଆରମ୍ଭ ହୋଇଥିଲା। ଯେଉଁଠି ନିଶାଶକ୍ତ ଅବସ୍ଥାରେ ଥିବା ଗାଡି ଚାଳକ ଜଣଙ୍କ ପ୍ରଥମେ ଏକ ଗାଡ଼ି ଉପରକୁ ନିୟନ୍ତ୍ରଣ ହରାଇ ଧକ୍କା ଦେଇଥିଲା। ପରେ ଅନ୍ୟ ଗାଡି ଗୁଡିକ ମଧ୍ୟ ଦୁର୍ଘଟଣାର ଶିକାର ହୋଇଥିଲା। ଏହାର ପ୍ରଭାବରେ ସମ୍ପୃକ୍ତ ଗାଡ଼ିଗୁଡ଼ିକ ଯଥେଷ୍ଟ କ୍ଷତି ହୋଇଥିଲା। ଯାହା ଫଳରେ ଯାତ୍ରୀମାନେ ଆଶ୍ଚର୍ଯ୍ୟ ହୋଇଯାଇଥିଲେ ଏବଂ ସେମାନଙ୍କ ସୁରକ୍ଷା ପାଇଁ ଚିନ୍ତିତ ହୋଇପଡ଼ିଥିଲେ। ପରେ ପୋଲିସକୁ ଖବର ଦେଇଥିଲେ।
ଏହି ସମୟରେ କିନ୍ତୁ ମଦ୍ୟପାନ କରି ବେପରୁଆ ଗାଡ଼ି ଚାଳକ ଦୁର୍ଘଟଣାସ୍ଥଳରୁ ଖସି ପଳାଇବାକୁ ଉଦ୍ୟମ କରୁଥିଲା। ତେବେ ସ୍ଥାନୀୟ ଲୋକେ ଏହି ନିଶାଶକ୍ତ ଗାଡି ଚାଳକକୁ ଗୋଡାଇ ରାଜେନ୍ଦ୍ର ନଗର ନିକଟରେ କାବୁ କରିଥିଲେ। ଏମିତିକି ସଂପୃକ୍ତ ବ୍ୟକ୍ତିର କାରଟିକୁ ମଧ୍ୟ ଭଙ୍ଗାରୁଜା କରିଛନ୍ତି। ପରେ ମଧୁପାଟଣା ପୋଲିସ ଏହି ବେପରୁଆ ଗାଡି ଚାଳକକୁ ନିଜ ହେପାଜତକୁ ନେଇଛି।
ମଧୁପାଟଣା ଥାନାର ପ୍ରମୁଖ ଥାନାଧିକାରୀ ଓ ଅନ୍ୟମାନେ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଛନ୍ତି। ଲୋକଙ୍କ ଆକ୍ରୋଶ ଦେଖି ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ନିଶାସକ୍ତ ଡ୍ରାଇଭରକୁ ଅଟକ ରଖି ତଦନ୍ତ ଆରମ୍ଭ କରିଛି। ପ୍ରାଥମିକ ତଦନ୍ତରୁ ଜଣାପଡିଛି ଯେ ଘଟଣା ସମୟରେ ଡ୍ରାଇଭର ଅତ୍ୟଧିକ ନିଶାସକ୍ତ ଥିଲା, ଯାହା ପ୍ରଭାବରେ ବେପରୁଆ ଭାବେ ଗାଡ଼ି ଚଳାଇଥିଲା।
Comments are closed.