୧୩ ସାଂସଦଙ୍କ ନିଲମ୍ବନକୁ ପୁନର୍ବିଚାର କରିବା ପାଇଁ ଲୋକସଭା ବାଚସ୍ପତିଙ୍କୁ ଚିଠି ଲେଖିଲେ ଅଧୀର ରଞ୍ଜନ

ନୂଆଦିଲ୍ଲୀ: କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଚିଠି ଲେଖି ସଂସଦରେ ସୁରକ୍ଷା ଭଙ୍ଗ ଘଟଣାକୁ ନେଇ ଗୁରୁବାର ଗୃହରେ ହଙ୍ଗାମା କରିଥିବା ୧୩ ଜଣ ସାଂସଦଙ୍କ ନିଲମ୍ବନ ପ୍ରତ୍ୟାହାର କରିବା ଉପରେ ବିଚାର କରିବାକୁ ଅନୁରୋଧ କରିଛନ୍ତି।

ଅଧୀର ଚୌଧୁରୀ ତାଙ୍କ ଚିଠିରେ ଯୁକ୍ତି ଦର୍ଶାଇଛନ୍ତି ଯେ ନିଲମ୍ବିତ ସାଂସଦ କେବଳ ସୁରକ୍ଷା ଭଙ୍ଗ ନେଇ ସରକାରଙ୍କ ଠାରୁ କୈଫିୟତ ମାଗିବା ପାଇଁ ଚାପ ପକାଉଛନ୍ତି ଏବଂ ସେମାନଙ୍କ ଚିନ୍ତା ଓ ମତ ଶୁଣିବା ଠିକ୍ ହେବ।

ସୁରକ୍ଷା ବ୍ୟବସ୍ଥାରେ ତ୍ରୁଟି ନେଇ ଗୃହମନ୍ତ୍ରୀ ଅମିତ ଶାହାଙ୍କ ବିବୃତି ଦାବିକୁ ବିରୋଧୀ ଦୋହରାଇଛନ୍ତି। ତତ୍କାଳିନ କଂଗ୍ରେସ ସଭାପତି ସୋନିଆ ଗାନ୍ଧୀଙ୍କ କଥା କହି କହିଛନ୍ତି, ୨୦୦୧ ସଂସଦ ଆକ୍ରମଣ ପରେ ପ୍ରଧାନମନ୍ତ୍ରୀ ଏବଂ ଗୃହମନ୍ତ୍ରୀଙ୍କ ନିକଟକୁ ଯାଇ ସେମାନଙ୍କ ଭଲମନ୍ଦ ପଚାରି ବୁଝିଥିଲେ। ନିକଟରେ ଘଟିଥିବା ଘଟଣା ସମୟରେ ପରିସ୍ଥିତିକୁ ନିୟନ୍ତ୍ରଣ କରିବାରେ ସଂସଦ ସୁରକ୍ଷା ସେବାର କର୍ମଚାରୀମାନେ ତ୍ୱରିତ ପଦକ୍ଷେପ ଗ୍ରହଣ କରିଥିବାରୁ ସେ ସେମାନଙ୍କୁ ପ୍ରଶଂସା କରିଥିଲେ।

ଭବିଷ୍ୟତରେ ଅନୁରୂପ ସୁରକ୍ଷା ଉଲ୍ଲଙ୍ଘନକୁ ରୋକିବା ପାଇଁ ସଂସଦକୁ ଭିଜିଟର୍ସ ପ୍ରବେଶକୁ ଜାରି କରିବା ଏବଂ ନିୟନ୍ତ୍ରଣ କରିବା ପାଇଁ ପ୍ରୋଟୋକଲ ଏବଂ ପ୍ରକ୍ରିୟାଗୁଡ଼ିକର ସମୀକ୍ଷା କରିବାର ଆବଶ୍ୟକତା ଉପରେ ଲେଖିଥିବା ଚିଠିରେ ଗୁରୁତ୍ୱ ଦେଇଛନ୍ତି।

ଲୋକସଭା ବାଚସ୍ପତି ଓମ୍ ବିର୍ଲା ପୂର୍ବରୁ ସ୍ପଷ୍ଟ କରିଥିଲେ ଯେ ସଂସଦରେ ନିଲମ୍ବନ ସୁରକ୍ଷା ଭଙ୍ଗ ଘଟଣା ସହ ଜଡିତ ନୁହେଁ। ବରଂ ଗୃହର ପବିତ୍ରତା ବଜାୟ ରଖିବା ପାଇଁ କରାଯାଇଛି। ସେ ଆହୁରି ମଧ୍ୟ କହିଥିଲେ ଯେ ସୁରକ୍ଷାରେ ତ୍ରୁଟିର ତଦନ୍ତ ପାଇଁ ଏକ ଉଚ୍ଚସ୍ତରୀୟ କମିଟି ଗଠନ କରାଯାଇଛି ଏବଂ ଏଭଳି ଘଟଣା ଯେପରି ଆଉ ନଘଟେ ସେଥିପାଇଁ ଏକ ଆକ୍ସନ ପ୍ଲାନ୍ ପ୍ରସ୍ତୁତ କରାଯାଇଛି।

ସଂସଦ ଅଧିବେଶନରେ ବିଶୃଙ୍ଖଳିତ ଆଚରଣ ପାଇଁ ଗୁରୁବାର କଂଗ୍ରେସ, ସିପିଏମ୍, ସିପିଆଇ, ଡିଏମକେ ସମେତ ବିଭିନ୍ନ ବିରୋଧୀ ଦଳର ୧୩ ଜଣ ସାଂସଦଙ୍କୁ ନିଲମ୍ବିତ କରାଯାଇଛି। ଏହି ଘଟଣା ସେତେବେଳେ ଘଟିଥିଲା, ଯେତେବେଳେ ଦୁଇ ଜଣ ବ୍ୟକ୍ତି ଭିଜିଟର ଗ୍ୟାଲେରୀରୁ ଲୋକସଭା ଚ୍ୟାମ୍ବର ଭିତରକୁ ଡେଇଁ ପଡ଼ିଥିଲେ ଏବଂ ଧୂଆଁ ଛାଡ଼ି ଦେଇଥିଲେ।

ସୁରକ୍ଷା ବ୍ୟବସ୍ଥାରେ ତ୍ରୁଟିକୁ ନେଇ ବିରୋଧୀ ଦଳ ସାଂସଦ ଗୃହ ମନ୍ତ୍ରୀ ଅମିତ ଶାହଙ୍କ ବିବୃତି ଦାବି କରୁଥିବା ବେଳେ ସରକାର ଏହି ସମସ୍ୟାର ସମାଧାନ ଓ ଭବିଷ୍ୟତରେ ଘଟୁଥିବା ଘଟଣାକୁ ରୋକିବା ପାଇଁ ଆବଶ୍ୟକ ପଦକ୍ଷେପ ନିଆଯାଉଛି ବୋଲି କହିଛନ୍ତି।