“ଶୀଘ୍ର ନିଅ ମେଣ୍ଟ ନିଷ୍ପତି”

ଭୁବନେଶ୍ବର: ଘୁଂଚି ଘୁଂଚି ଚାଲିଛି ମେଂଟ ପଦ୍ମ । ବିଜେଡି-ବିଜେପି ମେଂଟ ରାସ୍ତାରେ କଂଟା ରାଜ୍ୟ ଗେରୁଆ ଦଳ ନେତା । ଚବିଶ ମହାସମରକୁ ଆଉ ଅଳ୍ପଦିନ । ମେଂଟ ଘୁଂଚିଲେ ଲାଭଠୁ ବଳିଯିବ କ୍ଷତି । ତେଣୁ ଆଜି ରାତି ସୁଦ୍ଧା ନିଷ୍ପତି ନେବାକୁ ଅନୁରୋଧ କରିଛି ବିଜେଡି । ମେଂଟ ଡିଲ୍ ନେଇ ଟପ୍ ଲିଡରଙ୍କ ମଧ୍ୟରେ ଚର୍ଚ୍ଚା ସରିଛି । ବିଜେପି ନିଜ ଘର ସଜାଡୁ । ଆଉ ବେଶୀ ଡେରି ହେଲେ ସମୟ ନଷ୍ଟ ସାଙ୍ଗକୁ କନଫ୍ୟୁଜ ହେବେ କର୍ମୀ ଓ ସମର୍ଥକ । ଯେକୌଣସି ମୁହୁର୍ତରେ ନିର୍ବାଚନ ତାରିଖ ଘୋଷଣା ହୋଇପାରେ । ତେଣୁ ଯଥାଶୀଘ୍ର ମେଂଟ ସସପେନସ ଶେଷ କରିବାକୁ ବିଜେଡି ବିଜେପିକୁ କହିଥିବା ଜଣାପଡିଛି ।
ମେଂଟ ଚର୍ଚ୍ଚା ପରଠୁ ସପ୍ତାହେ ହେଲା ବିଜେଡିର ସଂଗଠନ ଶିଥିଳ ପଡିଛି । ନିର୍ବାଚନ କାଉଂଟଡାଉନ୍ ଆରମ୍ଭ ହୋଇଥିବା ବେଳେ ମେଂଟ ନେଇ ସ୍ପଷ୍ଟ ଚିତ୍ର ଦେବାକୁ ବିଜେପି ଉପରେ ଚାପ ପକାଉଛି ବିଜେଡି । ୧୫ବର୍ଷର ବିଚ୍ଛେଦ ପରେ ବିଜେପି ସହ ପୁନର୍ବିବାହ ନେଇ ବିଜେଡି ଏଯାଏଁ ମୁହଁ ବନ୍ଦ କରିରହିଛି । ଗତ ସପ୍ତାହରେ ବିଜେଡିର ବରିଷ୍ଠ ନେତା ଦେବୀପ୍ରସାଦ ମିଶ୍ର ଓ ଅରୁଣ ସାହୁ ମେଂଟ ନେଇ ଇସାରା ଦେଇଥିଲେ । ତେବେ ନବୀନ ହିଁ ନିଷ୍ପତିରେ ମୋହର ମାରିବେ କହିଥିଲେ ବିଜେଡି ନେତା ନୃସିଂହ ସାହୁ । ମାର୍ଚ୍ଚ ୭ତାରିଖ ସଂଧ୍ୟାରେ ବିଜେଡିର ଟପ୍ ନେତା ଭିକେ ପାଣ୍ଡିଆନ ଓ ପ୍ରଣବ ପ୍ରକାଶ ଦାସ ଦିଲ୍ଲୀ ଯାଇ ବିଜେପି ସହ ମେଂଟ ଓ ସିଟ୍ ସେୟାରିଂ ନେଇ ଆଲୋଚନା କରିଥିବା କୁହାଯାଉଛିା ବିଜେଡି ଅନ୍ଦରମହଲରୁ ସୂଚନା, ମେଂଟ ପ୍ରସ୍ତାବ ବିଜେପି ଆଡୁ ଆସିଥିଲା । ନବୀନଙ୍କ ନେତୃତ୍ୱରେ ଷଷ୍ଠ ଥର କ୍ଷମତା ଦଖଲ ପାଇଁ ବିଜେଡି ପ୍ରସ୍ତୁତ । ଏଭଳି ସ୍ଥିତିରେ କାହିଁକି ବିଜେଡି ଚାହିଁବ ମେଂଟ ? ୨୦୧୯ ନିର୍ବାଚନରେ ୧୧୨ ବିଧାନସଭା ଓ ୧୨ ଲୋକସଭା ଆସନ ଜିତିଥିଲା ବିଜେଡି । ଗତ ୫ବର୍ଷ ମଧ୍ୟରେ ହୋଇଥିବା ୮ ଉପନିର୍ବାଚନରୁ ୭ଟିରେ ବିଜୟୀ ହୋଇଛି ଦଳ । ପଂଚାୟତରୁ ପୌର, ଜବରଦସ୍ତ ପରଫର୍ମାନ୍ସ କରିଛି ବିଜେଡି । ଦଳର ସର୍ଭେ କହୁଛି ଶହେରୁ ଅଧିକ ଆସନରେ ହେବ ଶଙ୍ଖନାଦ । ବିଜେଡି କ୍ୟାମ୍ପର ମତ, ମେଂଟ ଉଭୟ ବିଜେଡି-ବିଜେପି ପାଇଁ ୱିନ୍‌- ୱିନ୍ ହେବ । ଗତ କିଛି ବର୍ଷ ହେଲା ଉଭୟ ଦଳ ମଧ୍ୟରେ ଭଲ ବୁଝାମଣା ରହିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମ୍ବଲପୁରରେ ନବୀନଙ୍କୁ ବନ୍ଧୁ କହିଛନ୍ତି ତ ଚଣ୍ଡିଖୋଲରେ କହିଛନ୍ତି ଲୋକପ୍ରିୟ ମୁଖ୍ୟମନ୍ତ୍ରୀ । ପାଣ୍ଡିଆନଙ୍କ ଭିଆରଏସ ଆବେଦନର ଶୀଘ୍ର ମଂଜୁରୀ ହେଉ କି ଅଶ୍ୱିନୀ ବୈଷ୍ଣବଙ୍କୁ ରାଜ୍ୟସଭା ପଠାଇବା ହେଉ, ଅଲଗା ଥାଇ ବି ଏକାଠି ରହିଛନ୍ତି ବିଜେଡି-ବିଜେପି । ବିଜେଡିକୁ କେନ୍ଦ୍ର ବିଜେପିର ପ୍ରଶଂସା ରାଜ୍ୟ ବିଜେପି ନେତାଙ୍କ ମୁହଁ ବନ୍ଦ କରିଛି । କେଉଁଠି ନା କେଉଁଠି ସେମାନେ ଏହାକୁ ହଜମ କରିପାରୁନାହାନ୍ତି । କୁହାଯାଉଛି, ଲାଭ କ୍ଷତିର ହିସାବ କରି ଯଥାଶୀଘ୍ର ମେଂଟ ଗଣିତ କଷିବାକୁ ରାଜ୍ୟ ବିଜେପିକୁ କହିଛନ୍ତି କେନ୍ଦ୍ରୀୟ ନେତା । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବାସଭବନରେ ଥିବା ରାଜ୍ୟ ବିଜେପି ନେତା ଏବେ ଟାଇଟ୍ ସ୍ପଟରେ । ଏନଡିଏ ନେତାଙ୍କ ମାର୍ଚ୍ଚ ୧୪ ବୈଠକ ପୂର୍ବରୁ ନିଷ୍ପତି ନେବାକୁ ଡେଡଲାଇନ୍ ଦିଆଯାଇଥିବା ଚର୍ଚ୍ଚା ହେଉଛି ।