ଫୋକସରେ ୬ ଲୋକସଭା, ୪୨ ବିଧାନସଭା: ଶେଷ ପର୍ଯ୍ୟାୟରେ ଶେଷ ସ୍ପର୍ଶ ଦେବାକୁ ନେତାଙ୍କ ପ୍ରୟାସ

ଭୁବନେଶ୍ୱର: ଜୁନ ୧ରେ ୬ଟି ଲୋକସଭା ଏବଂ ୪୨ ବିଧାନସଭା ଆସନରେ ମତଦାନ ହେବ। ୧୪୭ ଲୋକସଭା ଏବଂ ୨୧ ଲୋକସଭା ଆସନ ମଧ୍ୟରୁ ଶେଷ ପର୍ଯ୍ୟାୟରେ ନିର୍ବାଚନ ସରିଥିବା ସ୍ଥାନର ନେତାଙ୍କୁ ଆଣି ଜୋରଦାର ପ୍ରଚାର କରୁଛନ୍ତି ନେତା। ବାଂଲାଦେଶରେ ବାତ୍ୟା ପାଇଁ ଓଡ଼ିଶାରେ ଉପକୂଳରେ ପାଗ ଟିକିଏ ଖରାପ ରହିଥିଲେ ମଧ୍ୟ ନେତା କିନ୍ତୁ ଜୋରଦାର ପ୍ରଚାର କରୁଛନ୍ତି।

ଉପକୂଳ ଓଡ଼ିଶାରେ ଉଭୟ ବିଜେଡି ଓ ବିଜେପିର ଭୋଟ୍ ବ୍ୟାଙ୍କ ରହିଛି। ନିର୍ବାଚନ ବେଳେ ଉପକୂଳ ଓଡ଼ିଶାର ଗୋଟିଏ ବଡ଼ ପ୍ରଭାବ ରହିଛି। ଅନ୍ତିମ ଲୋକସଭା ନିର୍ବାଚନରେ ଏହି ୬ଟିରୁ ବିଜେପି ୨ଟି ଆସନରେ ଜିିତିଥିବା ବେଳେ ବିଜେଡି ୪ଟି ଲୋକସଭା ଆସନରେ ଜିତିଥିଲା। ଏଥର କିନ୍ତୁ ଶାସକ ଦଳ ବିରୋଧୀ ହାଓ୍ୱା ଏବଂ କଂଗ୍ରେସ ସକ୍ରିୟ ହୋଇଥିବାରୁ ଆସନ ଏପେଟ ସେପଟ ହେବାର ସମ୍ଭାବନାକୁ ଦେଖି ତିନି ଦଳ ନିଜ ଗଡ ବଂଚାଇବା ସହ ଅଧିକରୁ ଅଧିକ ଆସନ ଜିତିବାକୁ ସମସ୍ତ ପ୍ରୟାସ କରୁଛନ୍ତି।

୩୦ ତାରିଖ ପ୍ରଚାରର ଶେଷ ତାରିଖ ରହିଛି। ଏହାପୂର୍ବରୁ ବିଜେପି ଏବଂ କଂଗ୍ରେସ କେନ୍ଦ୍ରୀୟ ନେତୃତ୍ୱଙ୍କୁ ଆଣି ଜୋରଦାର ପ୍ରଚାର କରିବାକୁ ପ୍ରୟାସ କରିଛନ୍ତି। ବିଜେପି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ ଶାହଙ୍କ ଭଳି ନେତାଙ୍କୁ ମୈଦାନକୁ ଓହ୍ଲାଉବାକୁ ନିଷ୍ପତ୍ତି ନେଇଛି। ସେହିପରି କଂଗ୍ରେସ ମଧ୍ୟ ଦଳର ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଏବଂ ସାଂସଦ ରାହୁଲ ଗାନ୍ଧୀଙ୍କୁ ପ୍ରଚାର କରାଇବାକୁ ନିଷ୍ପତ୍ତି ନେଇଛି।

ରାଜ୍ୟ ଉପସଭାପତି ଗୋଲକ ମହାପାତ୍ର କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସନ୍ତା ୨୯ ତାରିଖରେ ଓଡ଼ିଶା ଆସିବେ। ଅପରାହ୍ନ ୧ଟାରେ ବାରିପଦା ଛଉ ପଡ଼ିଆ, ଅପରାହ୍ନ ୧ଟାରେ ବାଲେଶ୍ୱର ଓ ଅପରାହ୍ନ ୩ଟାରେ କେନ୍ଦ୍ରାପଡ଼ାରେ ଏକ ସାଧାରଣ ସଭାକୁ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି। ଏହି ତିନି ସ୍ଥାନରେ ଦଳର ସାଂସଦ ପ୍ରାର୍ଥୀ ରହିଛନ୍ତି, ପ୍ରତାପ ଷଡଙ୍ଗୀ, ବୈଜୟନ୍ତ ପଣ୍ଡା ଏବଂ ନବ ଚରଣ ମାଝୀ। ଏହାପୂର୍ବରୁ ୨୮ ତାରିଖରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଚାନ୍ଦବାଲି, କୋରେଇ ଓ ନିମାପଡ଼ାରେ ଜନସଭାକୁ ସମ୍ବୋଧିତ କରିବେ। ଯାହା ଭଦ୍ରକ, ଯାଜପୁର ଏବଂ ଜଗତସିଂହପୁର ଲୋକସଭା ଅଧୀନରେ ଆସୁଛି।

ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ମଧ୍ୟ ଆସନ୍ତାକାଲି ଦୁଇ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି। ସେ ଆସନ୍ତାକାଲି ଭଦ୍ରକ, ଯାଜପୁର, କେନ୍ଦ୍ରାପଡ଼ା ଓ କାକଟପୁର ଏବଂ ୨୮ ତାରିଖରେ ରାଇରଙ୍ଗପୁର, ମୋରଡ଼ା, ସୋର ଓ ଜଗତସିଂହପୁରରେ ଜନସଭାକୁ ସମ୍ବୋଧିତ କରିବେ।

ଗୋଲକ ମହାପାତ୍ର ଆହୁରି ମଧ୍ୟ କହିଛନ୍ତି ଯେ ଚୂଡ଼ାନ୍ତ ପର୍ଯ୍ୟାୟ ନିର୍ବାଚନ ପାଇଁ ଦଳ ପ୍ରଚାରକୁ ଜୋରଦାର କରିବ । ଏହାର ସାଂସଦ ପ୍ରାର୍ଥୀ ସମ୍ବିତ ପାତ୍ର, ଅପରାଜିତା ଷଡ଼ଙ୍ଗୀ ଓ ପ୍ରଦୀପ ପାଣିଗ୍ରାହୀ ୬ଟି ଲୋକସଭା ନିର୍ବାଚନ ମଣ୍ଡଳୀରେ ରାଲି କରି ଓଡ଼ିଆ ଅସ୍ମିତା , ସଂସ୍କୃତି ଓ ପରମ୍ପରାକୁ ରକ୍ଷା କରିବା ସହ ଭୋଟ ଦେବାକୁ ଲୋକଙ୍କୁ ଆହ୍ୱାନ ଦେବେ।

ସେହିପରି ଏଆଇସିସିର ଓଡ଼ିଶା ପ୍ରଭାରୀ ଅଜୟ କୁମାର କହିଛନ୍ତି ଯେ କଂଗ୍ରେସର ଦୁଇ ବରିଷ୍ଠ ନେତା ଅଲଗା ଅଲଗା ଦିନରେ ରାଜ୍ୟକୁ ଆସି ବିଭିନ୍ନ ସ୍ଥାନରେ ସାଧାରଣ ସଭାରେ ଯୋଗଦେବେ। ୨୯ ତାରିଖରେ ଖଡଗେ ବାଲେଶ୍ୱରରେ ପହଞ୍ଚି ପୂର୍ବାହ୍ନ ୧୧ଟାରେ ଏକ ନିର୍ବାଚନୀ ସଭାରେ ଯୋଗଦେବେ। ଏହାପରେ ଅପରାହ୍ନ ୩ଟାରେ ଭଦ୍ରକରେ ଦଳର ଆଉ ଏକ ନିର୍ବାଚନୀ ସଭାରେ ଯୋଗଦେବା ପରେ ଫେରିଯିବେ।

ସେହିପରି ରାହୁଲ ଗାନ୍ଧୀ ଆସନ୍ତା ୩୦ ତାରିଖରେ ଆସି ବାଲେଶ୍ୱର ଜିଲ୍ଲା ସିମୁଳିଆ ସାନମହିତପୁରରେ ପୂର୍ବାହ୍ନ ୧୧ଟାରେ ଏକ ସଭାରେ ଯୋଗଦେବେ।

ଉଲ୍ଲେଖଯୋଗ୍ୟ, ରାହୁଲ ଗାନ୍ଧି ପୂର୍ବରୁ ଓଡ଼ିଶାରେ ଦୁଇଥର ପ୍ରଚାର କରିଥିଲେ। ଗତ ଏପ୍ରିଲ ୨୮ ତାରିଖରେ କଟକ ଜିଲ୍ଲା ସାଲେପୁରରୁ ପ୍ରଚାର ଆରମ୍ଭ କରିଥିବା ବେଳେ ୧୫ ତାରିଖରେ ବଲାଙ୍ଗୀରରେ ନିର୍ବାଚନୀ ରାଲି କରିଥିଲେ।