ମୁମ୍ବାଇ: ୨୦୨୧ରେ ରିଲିଜ୍ ହୋଇଥିବା ଫିଲ୍ମ ‘ପୁଷ୍ପା’ ବକ୍ସ ଅଫିସରେ ଏବଂ ଲୋକଙ୍କ ହୃଦୟରେ ଅନେକ ଦିନ ପର୍ଯ୍ୟନ୍ତ ରାଜ କରିଥିଲା । ଏହି ଚଳଚ୍ଚିତ୍ର ଏତେ ଲୋକପ୍ରିୟ ହୋଇପାରିଥିଲା ଯେ ଚଳଚ୍ଚିତ୍ରର ଗୀତ ଏବଂ ଡାଇଲଗ୍ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଥିଲା । ଅଲୁ ଅର୍ଜୁନ ନିଜ ଦମଦାର ଅଭିନୟରେ ଏହି ଚଳଚ୍ଚିତ୍ରରେ ଚାରଚାନ୍ଦ ଲଗାଇଥିଲା । ଏହି ଫିଲ୍ମର ନିର୍ଦ୍ଦେଶନା ସୁକୁମାର ଦେଇଥିବା ବେଳେ ମେଲ-ଫିମେଲ ଲିଡ କ୍ୟାରେକ୍ଟରରେ ଅଲ୍ଲୁ ଅର୍ଜୁନ-ରଶ୍ମୀକା ମନ୍ଦାନା ଅଭିନୟ କରିଥିଲେ । ଫିଲ୍ମର ଏପରି ଲୋକପ୍ରିୟତା ଦେଖି ମେକର୍ସ ‘ପୁଷ୍ପା ୨’ ଆଣିଛନ୍ତି । ଆସନ୍ତା ଡିସେମ୍ବର ୫ରେ ମୁକ୍ତିଲାଭ କରିବ ‘ପୁଷ୍ପା ୨’ l ତେବେ ଏହି ଫିଲ୍ମକୁ ନେଇ ପୂର୍ବରୁ ଅଭିନେତା ଅଲ୍ଲୁ ଅର୍ଜୁନ ଏକ ବଡ଼ ସୂଚନା ଦେଇଥିବା ବେଳେ ଏବେ ତାର ଆଉ ଏକ ଖୁଲାସା କରିଛନ୍ତି ଅଭିନେତ୍ରୀ ରଶ୍ମିକା ମନ୍ଦାନା l ‘ପୁଷ୍ପା ୨’ ପରେ ଆସିବ ‘ପୁଷ୍ପା ୩’ l
ମଙ୍ଗଳବାର ଦିନ ରଶ୍ମିକା ମନ୍ଦନା ତାଙ୍କ ସୋସିଆଲ ମିଡ଼ିଆ ଆକାଉଣ୍ଟରେ ଏକ ଲମ୍ବା ନୋଟ୍ ଲେଖିଥିଲେ, ଯେଉଁଥିରୁ ‘ପୁଷ୍ପା ୩’ ଆସିବା ନେଇ ସୂଚନା ମିଳିଛି l ଫିଲ୍ମର ସୁଟିଂ ଶେଷ କରିବା ପରେ ରଶ୍ମିକା ଏକ ଭାବପ୍ରବଣ ନୋଟ୍ ଲେଖିଥିଲେ। ସେ ଲେଖିଥିଲେ- ‘ପ୍ରିୟ ଡାଏରୀ, ୨୫ ନଭେମ୍ବର, ଏହି ଦିନ ମୋ ପାଇଁ ବହୁତ ଭାରୀ ଥିଲା l ଏନେଇ ମୁ କିପରି ପ୍ରତିକ୍ରିୟା ଦେବି ସେ ବିଷୟରେ ମୁଁ ନିଜେ ବି ଜାଣି ପାରୁନି l ପୁରା ଦିନର ସୁଟିଂ ପରେ ଆମେ ୨୪ ତାରିଖ ସନ୍ଧ୍ୟାରେ ବିମାନ ଯୋଗେ ଚେନ୍ନାଇ ଯାଇ ଏକ କାର୍ଯ୍ୟକ୍ରମରେ ଯୋଗ ଦେଇଥିଲୁ l ସେହିଦିନ ରାତିରେ ହିଁ ଆମେମାନେ ପୁଣି ହାଇଦ୍ରାବାଦ ଗଲୁ l ଘରକୁ ଯାଇ ପ୍ରାୟ ୪ ରୁ ୫ ଘଣ୍ଟା ଶୋଇବା ପରେ ପୁଷ୍ପାର ଶେଷ ଦିନର ସୁଟିଂ ପାଇଁ ପୁଣି ଗଲି l ମୁଁ ଜାଣିଥିଲି ଏହା ମୋର ସୁଟିଂର ଶେଷ ଦିନ ବୋଲି ସେଥିପାଇଁ ବହୁତ ଦୁଃଖ ବି ଲାଗୁଥିଲା l କିନ୍ତୁ ଯାହା ଯେମିତି କରିକି ଆମେ ସୁଟିଂ ଶେଷ କଲୁ l ଦୀର୍ଘ ୭-୮ ବର୍ଷ ହେବ ମୁଁ ଏହି ଇଣ୍ଡଷ୍ଟ୍ରିରେ ଅଛି l କିନ୍ତୁ ଗତ ୫ ବର୍ଷ ହେବ ଏହି ଇଣ୍ଡଷ୍ଟ୍ରି ସତେ ଯେପରି ମୋ ଘର ପାଲଟିଯାଇଛି l ତଥାପି ବହୁତ କାମ ଏବେ ବି ବାକି ଅଛି ଏବଂ ଏହାର ତୃତୀୟ ଭାଗ ମଧ୍ୟ ଅଛି l କିନ୍ତୁ ଦ୍ଵିତୀୟ ଭାଗ ମୋ ଜୀବନର ଗୋଟେ ବିଶେଷ ମୁହୂର୍ତ୍ତ ହୋଇ ରହିବ l ଶେଷରେ ରଶ୍ମିଙ୍କ ଲେଖିଛନ୍ତି, ପ୍ରିୟ ଡାଏରୀ, ୨୫ ନଭେମ୍ବର ୨୦୨୪ ବହୁତ କଷ୍ଟକର ଦିନ ଥିଲା କିନ୍ତୁ ମୁଁ ଆଶା କରୁଛି ଯେ ଦିନେ ଏହା ସବୁ ମୂଲ୍ୟବାନ ହେବ l
ତେବେ ରଶ୍ମିକାଙ୍କ ଏହି ପୋଷ୍ଟରୁ ଆଗକୁ ‘ପୁଷ୍ପା ୩’ ଆସିବା ନେଇ ସଂକେତ ମିଳିଛି l କହିରଖୁଛୁ ଯେ ଗତ କିଛି ଦିନ ତଳେ ଅଭିନେତା ଅଲ୍ଲୁ ଅର୍ଜୁନ ଏନେଇ ସୂଚନା ଦେଇଥିଲେ l ଅଲ୍ଲୁ ଅର୍ଜୁନ ନିଜ ଫିଲ୍ମ ‘ପୁଷ୍ପା ଦି ରାଇଜ’ର ସ୍କ୍ରିନିଂ ପାଇଁ ଗତ ୧୬ ଫେବୃଆରୀ ୨୦୨୪ ଦିନ ବର୍ଲିନ ଇଣ୍ଟରନେସନାଲ ଫିଲ୍ମ ଫେଷ୍ଟିଭାଲରେ ସାମିଲ ହୋଇଥିଲେ । ସେଠାରେ ସେ ଇଣ୍ଡିଆନ ସିନେମାକୁ ରିପ୍ରେଜେଣ୍ଟ କରିବା ପାଇଁ ଯାଇଥିଲେ । ସେଠାରେ ଅଲ୍ଲୁ ଅର୍ଜୁନ ମିଡିଆ ସହ କଥାବାର୍ତ୍ତା ସମୟରେ ‘ପୁଷ୍ପା ୩’କୁ ନେଇ ନିଶ୍ଚିତ କରି କହିଥିଲେ ଯେ, ‘ଆପଣ ‘ପୁଷ୍ପା ୩’ ପାଇଁ ଆଶା କରିପାରିବେ । ଆମେ ଏହାର ଫ୍ରାନଚାଇଜ ପ୍ରସ୍ତୁତ କରିବାକୁ ଚାହୁଁଛୁ ଏବଂ ଆମ ପାଖେ ଏକ୍ସାଇଟିଙ୍କ ଆଇଡିଆଜ୍ ମଧ୍ୟ ରହିଛି ।’ ତେବେ ତାଙ୍କ ବିବୃତ୍ତିରୁ ଏହା ସ୍ପଷ୍ଟ ହୋଇଥିଲା ଯେ, ଖୁବଶୀଘ୍ର ‘ପୁଷ୍ପା ୩’ ଦର୍ଶକଙ୍କ ପାଇଁ ପ୍ରସ୍ତୁତ କରାଯିବ ।