ଟୋକିଓ: ଜାପାନ ଏୟାରଲାଇନ୍ସ (ଜେଏଏଏଲ) ଉପରେ ଏକ ବଡ଼ ସାଇବର ଆଟାକ ହୋଇଛି । ଏହା ଦ୍ୱାରା ଶହ ଶହ ବିମାନ ପ୍ରଭାବିତ ହୋଇଛି । ଜାପାନ ଏୟାରଲାଇନ୍ସ କହିଛି ଯେ ଗୁରୁବାର ଦିନ ସାଇବର ଆକ୍ରମଣ ହେତୁ ଏହାର ୨୦ରୁ ଅଧିକ ଘରୋଇ ବିମାନ ବିଳମ୍ବ ହୋଇଛି । ଏହା ସହ ଅନ୍ୟ ବିମାନ ମଧ୍ୟ ପ୍ରଭାବିତ ହୋଇଛି । ତେବେ କିଛି ଘଣ୍ଟା ପରେ ଏହାର ସିଷ୍ଟମକୁ ପୁନଃ ସ୍ଥାପିତ କରିଥିବା କମ୍ପାନୀ ଦାବି କରିଛି । ବିମାନ ସୁରକ୍ଷା ଉପରେ ଏହାର କୌଣସି ବଡ଼ ପ୍ରଭାବ ପଡି ନାହିଁ ।
ଏୟାରଲାଇନ୍ସ କହିଛି ଯେ, ଗୁରୁବାର ସକାଳେ କମ୍ପାନୀର ଆଭ୍ୟନ୍ତରୀଣ ଏବଂ ବାହ୍ୟ ସିଷ୍ଟମକୁ ସଂଯୋଗ କରୁଥିବା ନେଟୱାର୍କରେ ତ୍ରୁଟିପୂର୍ଣ୍ଣ ହେବା ଆରମ୍ଭ କଲାବେଳେ ଏହି ସମସ୍ୟା ଆରମ୍ଭ ହୋଇଥିଲା । ତେବେ ଜାପାନ ଏୟାରଲାଇନ୍ସ ହେଉଛି ଦେଶର ଦ୍ଵିତୀୟ ସବୁଠୁ ବଡ଼ ଏୟାରଲାଇନ୍ କମ୍ପାନୀ ।
ଏୟାରଲାଇନ୍ସ କହିଛି ଯେ ଏହାର କାରଣ ଖୋଜାଯାଇଛି ଯେ, ଏହି ଆକ୍ରମଣ ନେଟୱାର୍କ ସିଷ୍ଟମକୁ ତଥ୍ୟର ବ୍ୟାପକ ପ୍ରସାରଣରେ ବାଧା ଦେବା ପାଇଁ ଉଦ୍ଦିଷ୍ଟ । ଏହିପରି ଆକ୍ରମଣଗୁଡିକ ସିଷ୍ଟମ କିମ୍ବା ନେଟୱାର୍କକୁ ଅତ୍ୟଧିକ ବ୍ୟସ୍ତ ରଖେ ଯେପର୍ଯ୍ୟନ୍ତ ଟାର୍ଗେଟେଡ୍ ପ୍ରତିକ୍ରିୟା ହାସଲ ନହେବା ପର୍ଯ୍ୟନ୍ତ କିମ୍ବା ସିଷ୍ଟମ୍ କ୍ରାସ୍ ନହୋଇଛି ।
ଏୟାରଲାଇନ୍ସ ଆହୁରି କହିଛି ଯେ, ଏହି ଆକ୍ରମଣରେ କୌଣସି ଭାଇରସ ଜଡିତ ନାହିଁ କିମ୍ବା ଏହା କୌଣସି ଗ୍ରାହକଙ୍କ ତଥ୍ୟ ଲିକ୍ କରି ନାହିଁ । ସକାଳ ସୁଦ୍ଧା ସାଇବର ଆଟାକ ହେତୁ ୨୪ ଟି ଘରୋଇ ବିମାନ ୩୦ ମିନିଟରୁ ଅଧିକ ବିଳମ୍ବ ହୋଇଛି ବୋଲି ଏଥିରେ କୁହାଯାଇଛି ।
ଏୟାରଲାଇନ୍ସ ‘ଏକ୍ସ’ରେ ଏକ ପୋଷ୍ଟ ସେୟାର କରି କହିଛି, ଆମେ ସାଇବର ଆଟାକ୍ ଚିହ୍ନଟ କରିଛୁ । ଆମେ ସିଷ୍ଟମର ରିକଭରୀ ଷ୍ଟାଟସ୍ (ପୁନରୁଦ୍ଧାର ସ୍ଥିତି) ଯାଞ୍ଚ କରୁଛୁ । ଏହାରି ମଧ୍ୟରେ ଆଜି ଉଡ଼ାଣ ଭରିବାକୁ ଥିବା ଘରୋଇ ଏବଂ ଅନ୍ତର୍ଜାତୀୟ ବିମାନଗୁଡ଼ିକ ପାଇଁ ଟିକେଟ ବିକ୍ରି ବନ୍ଦ କରି ଦିଆଯାଇଛି । ଏହାଦ୍ୱାରା ହୋଇଥିବା ଅସୁବିଧା ପାଇଁ ଆମେ ଦୁଃଖିତ ।