ନୂଆଦିଲ୍ଲୀ: ଯେଉଁମାନେ ପର୍ଯ୍ୟଟକ ଭାବରେ ଅଥବା ଶିକ୍ଷା, ସ୍ୱାସ୍ଥ୍ୟସେବା ଏବଂ ବ୍ୟବସାୟ ପାଇଁ ଭାରତକୁ ଆସୁଛନ୍ତି ସେମାନଙ୍କୁ ସ୍ୱାଗତ କରାଯିବ କିନ୍ତୁ ଯେଉଁମାନେ ଦେଶ ଉପରେ ବିପଦ ସୃଷ୍ଟି କରିବା ଉଦ୍ଦେଶ୍ୟ ରେ ଆସିବାକୁ ଚାହୁଁଛନ୍ତି ସେମାନଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଲୋକସଭାରେ ଆଜି ପ୍ରବାସ ଏବଂ ବିଦେଶୀ ବିଲ୍ ଆଲୋଚନାରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏଭଳି କହିଛନ୍ତି।
ସେ ଆହୁରି କହିଥିଲେ ଯେ ଭାରତ ଏକ ଧର୍ମଶାଳା ନୁହେଁ। ‘ଯେଉଁମାନେ ଜାତୀୟ ସୁରକ୍ଷା ପାଇଁ ବିପଦ ସୃଷ୍ଟି କରିବେ ସେମାନଙ୍କୁ କୌଣସି ପରିସ୍ଥିତିରେ ମଧ୍ୟ ଦେଶରେ ପ୍ରବେଶ କରିବାକୁ ଦିଆଯିବ ନାହିଁ। ତେବେ ଯେଉଁମାନେ ଦେଶର ବିକାଶରେ ସହାୟକ ହେବେ ସେମାନଙ୍କୁ ସବୁ ସମୟରେ ସ୍ୱାଗତ କରାଯିବ।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଏହି ଆଇନ ଦ୍ୱାରା ଦେଶର ସୁରକ୍ଷା ସୁଦୃଢ଼ ହେବା ସହ ଅର୍ଥନୀତି ଏବଂ ବାଣିଜ୍ୟରେ ମଧ୍ୟ ବୃଦ୍ଧି ହେବ ଓ ଏହା ସ୍ୱାସ୍ଥ୍ୟ ଏବଂ ଶିକ୍ଷା କ୍ଷେତ୍ରକୁ ମଧ୍ୟ ପ୍ରୋତ୍ସାହିତ କରିବ। ତେବେ ଏହି ବିଲ୍ ଦ୍ୱାରା ଭାରତକୁ ଆସୁଥିବା ପ୍ରତ୍ୟେକ ବିଦେଶୀଙ୍କ ବିଷୟରେ ସଦ୍ୟତମ ସୂଚନା ମିଳିପାରିବ।
ମିଆଁମାର ଏବଂ ବାଂଲାଦେଶୀମାନଙ୍କ ଦ୍ୱାରା ଭାରତରେ ରୋହିଙ୍ଗ୍ୟାମାନଙ୍କ ଅବୈଧ ଅନୁପ୍ରବେଶ ପ୍ରସଙ୍ଗରେ ଶାହ ଗୁରୁତ୍ୱାରୋପ କରି କହିଥିଲେ ଯେ ବ୍ୟକ୍ତିଗତ ସ୍ୱାର୍ଥ ପାଇଁ ଭାରତରେ ଆଶ୍ରୟ ନେଉଥିବା ଲୋକଙ୍କ ସଂଖ୍ୟା କିଛି ବର୍ଷ ମଧ୍ୟରେ ବୃଦ୍ଧି ପାଇଛି ଯାହାକି ଦେଶକୁ ଅସୁରକ୍ଷିତ କରିଛି। ତେବେ ସେମାନଙ୍କ ପ୍ରତି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି।ଏହି ବିଲ୍ ଦ୍ୱାରା ଭାରତ ୨୦୪୭ ସୁଦ୍ଧା ଦୁନିଆର ସବୁଠାରୁ ବିକଶିତ ଦେଶ ହୋଇପାରିବ ବୋଲି ସେ କହିଛନ୍ତି।
Comments are closed.