ବେଙ୍ଗାଲୁରୁ: କ୍ଷୀର-ଦହି, ବିଦ୍ୟୁତ୍ ପରେ ଏବେ କର୍ଣ୍ଣାଟକ ରାଜଧାନୀ ବେଙ୍ଗାଲୁରୁରେ ପାଣିର ମୂଲ୍ୟ ବୃଦ୍ଧି କରିଛନ୍ତି ସରକାର । ଏହା ପୂର୍ବରୁ ପାଣିର ଦର ବୃଦ୍ଧି ନେଇ ଉପମୁଖ୍ୟମନ୍ତ୍ରୀ ଡିକେ ଶିବକୁମାର ସଙ୍କେତ ଦେଇଥିଲେ । ନୂତନ ଜଳ ଦର ୧୦ ଏପ୍ରିଲରୁ ଲାଗୁ ହୋଇଛି ଏବଂ ମେ ମାସରେ ଆସୁଥିବା ବିଲ୍ ନୂତନ ଦର ଆଧାରରେ ଜାରି କରାଯିବ । ଏଠାରେ କ୍ଷୀର-ଦହି, ବିଦ୍ୟୁତ୍ ଏବଂ ପେଟ୍ରୋଲ-ଡିଜେଲର ମୂଲ୍ୟ ପୂର୍ବରୁ ବୃଦ୍ଧି କରାଯାଇଛି ।
ତେବେ ୧୧ ବର୍ଷ ପରେ ସରକାର ପାଣିର ମୂଲ୍ୟ ବୃଦ୍ଧି କରି ସାଧାରଣ ଲୋକଙ୍କ ସମସ୍ୟା ବଢ଼ାଇ ଦେଇଛନ୍ତି । ବେଙ୍ଗାଲୁରୁ ଦେଶର ସବୁଠାରୁ ମହଙ୍ଗା ସହର ମଧ୍ୟରେ ପୂର୍ବରୁ ରହିଛି ଏବଂ ଚଳିତ ବର୍ଷ ପ୍ରାୟ ସମସ୍ତ ଅତ୍ୟାବଶ୍ୟକୀୟ ସାମଗ୍ରୀ/ସେବାର ମୂଲ୍ୟ ବୃଦ୍ଧି ପାଇବା ସହିତ ବେଙ୍ଗାଲୁରୁରେ ରହିବା ଆହୁରି ମହଙ୍ଗା ହୋଇଯାଇଛି ।
୧୦ ଏପ୍ରିଲରୁ ଅର୍ଥାତ୍ ଆଜି ଠାରୁ ବେଙ୍ଗାଲୁରୁ ଜଳ ଯୋଗାଣ ଏବଂ ସ୍ୱେରେଜ ବୋର୍ଡ (BWSSB) ନୂତନ ସ୍ଲାବ ଉପରେ ଆଧାରିତ ଜଳ ବ୍ୟବହାର ଅନୁସାରେ ବିଲ୍ ଜାରି କରିବ । ଅତ୍ୟଧିକ ବ୍ୟବହାର ହ୍ରାସ କରିବା ଲକ୍ଷ୍ୟରେ ପାଣିର ମୂଲ୍ୟ ବୃଦ୍ଧି କରାଯାଇଛି । BWSSBର ଅଧ୍ୟକ୍ଷ ଡକ୍ଟର ରାମ ପ୍ରସାଦ ମନୋହର କହିଛନ୍ତି ଯେ, ଅତ୍ୟାବଶ୍ୟକୀୟ ପାଣିର ବ୍ୟବହାର ମିତବ୍ୟୟୀ ହେବ ଏବଂ ଅତ୍ୟଧିକ ବ୍ୟବହାର ଫଳରେ ଅଧିକ ବିଲ୍ ଆସିବ ।
ଘରୋଇ ବ୍ୟବହାରକାରୀଙ୍କ ପାଇଁ ନୂତନ ଶୁଳ୍କ ହାର
୦-୮,୦୦୦ ଲିଟର/ମାସ: ଲିଟର ପିଛା ୦.୧୫ ପଇସା
ମାସିକ ୮,୦୦୧-୨୫,୦୦୦ ଲିଟର: ପ୍ରତି ଲିଟର ୦.୪୦ ପଇସା
ମାସିକ ୨୫,୦୦୧-୫୦,୦୦୦ ଲିଟର: ପ୍ରତି ଲିଟର ୦.୮୦ ପଇସା
୫୦,୦୦୦ ଲିଟରରୁ ଅଧିକ (୧ ଲକ୍ଷ ଲିଟର ପର୍ଯ୍ୟନ୍ତ): ପ୍ରତି ଲିଟର ପାଇଁ ୧ ପଇସା
ବଡ଼ ଆପାର୍ଟମେଣ୍ଟ ପାଇଁ ନୂତନ ଟାରିଫ୍ ହାର
୦-୨ ଲକ୍ଷ ଲିଟର/ମାସ: ଲିଟର ପିଛା ୦.୩୦ ପଇସା
୨-୫ ଲକ୍ଷ ଲିଟର/ମାସ: ଲିଟର ପିଛା ୦.୬୦ ପଇସା
୫-୧୦ ଲକ୍ଷ ଲିଟର/ମାସ: ଲିଟର ପିଛା ୧.୦୦ ପଇସା
ବାଣିଜ୍ୟିକ ଏବଂ ଶିଳ୍ପ ବ୍ୟବହାର ପାଇଁ ନୂତନ ଶୁଳ୍କ ହାର
ମାସିକ ବ୍ୟବହାର ଉପରେ ନିର୍ଭର କରି ପ୍ରତି ଲିଟର ପିଛା ଚାର୍ଜ ୦.୯୦ ପଇସାରୁ ୧.୯୦ ପଇସା ମଧ୍ୟରେ ରହିବ ।
Comments are closed.