ନୂଆଦିଲ୍ଲୀ: ଭାରତ ପାକିସ୍ତାନକୁ ଆଉ ଏକ ଜୋରଦାର ଝଟକା ଦେଇଛି। ଭାରତର ବାଣିଜ୍ୟ ମନ୍ତ୍ରଣାଳୟ ପାକିସ୍ତାନରୁ ସମସ୍ତ ଜିନିଷର ପ୍ରତ୍ୟକ୍ଷ ବା ପରୋକ୍ଷ ଆମଦାନୀ ଉପରେ ତୁରନ୍ତ ପ୍ରଭାବରୁ ପ୍ରତିବନ୍ଧକ ଲଗାଇଛି। ମେ ୨ ତାରିଖରେ ଜାରି ହୋଇଥିବା ଏକ ବିଜ୍ଞପ୍ତିରେ କୁହାଯାଇଛି ଯେ ବୈଦେଶିକ ବ୍ୟାପାର ନୀତି (ଏଫ୍ଟିପି) ୨୦୨୩ରେ ଏହି ସମ୍ବନ୍ଧରେ ଏକ ନୂଆ ପ୍ରାବଧାନ ଯୋଡ଼ାଯାଇଛି। ଏହା ସହିତ କୁହାଯାଇଛି ଯେ ପରବର୍ତୀ ଆଦେଶ ପର୍ଯ୍ୟନ୍ତ ତୁରନ୍ତ ପ୍ରଭାବରୁ ପାକିସ୍ତାନରୁ ଆସୁଥିବା ବା ରପ୍ତାନୀ ହେଉଥିବା ସମସ୍ତ ସାମଗ୍ରୀର ପ୍ରତ୍ୟକ୍ଷ ବା ପରୋକ୍ଷ ଆମଦାନୀ ଓ ରପ୍ତାନୀ ଉପରେ ପ୍ରତିବନ୍ଧକ ଲଗାଯାଇଛି।
ପହଲଗାମ ଆକ୍ରମଣ ପରେ ଭାରତ ପାକିସ୍ତାନକୁ ଆଣ୍ଠେଇବାକୁ ବାଧ୍ୟ କରିଛି। ଭାରତ ଯେତେବେଳେ ସିନ୍ଧୁ ଜଳ ଚୁକ୍ତି ରଦ୍ଦ କଲା, ପ୍ରଥମେ ପାକିସ୍ତାନୀ ନେତାମାନେ ଜୋରଦାର ଧମକ ଦେଇଥିଲେ। ଏହାପରେ ସେମାନେ ତୁରନ୍ତ ପଶ୍ଚିମୀ ଦେଶମାନଙ୍କ ଶରଣାପନ୍ନ ହେଲେ। ତଥାପି କୌଣସି ସମାଧାନ ନ ମିଳିବାରୁ ସେମାନେ ଏହି ବିଷୟକୁ ସଂଯୁକ୍ତ ରାଷ୍ଟ୍ରସଂଘରେ ଉଠାଇଛନ୍ତି। ସଂଯୁକ୍ତ ରାଷ୍ଟ୍ରସଂଘରେ ପାକିସ୍ତାନର ସ୍ଥାୟୀ ପ୍ରତିନିଧି ରାଜଦୂତ ଅସିମ ଇଫ୍ତିଖାର ଅହମଦ ଏହାକୁ ବୈଶ୍ୱିକ ଶାନ୍ତି ଓ ସ୍ଥିରତା ପାଇଁ ବିପଦ ବୋଲି ଅଭିହିତ କରିଛନ୍ତି। ଏହା ସହିତ ସେ ଭାରତ ବିରୋଧରେ ଧମକପୂର୍ଣ୍ଣ ବୟାନ ମଧ୍ୟ ଦେଇଛନ୍ତି।
ପହଲଗାମ ଆକ୍ରମଣ ପରେ ପାକିସ୍ତାନକୁ ସବୁଆଡ଼ୁ ଘେରିବା ପାଇଁ ରଣନୀତି ଚାଲିଛି। କେବଳ ଆକ୍ରମଣ ନୁହେଁ, କୂଟନୀତି ମାଧ୍ୟମରେ ମଧ୍ୟ ପାକିସ୍ତାନକୁ ଚାପରେ ରଖିବା ପାଇଁ ପ୍ରସ୍ତୁତି ଚାଲିଛି। ଏହି ପରିପ୍ରେକ୍ଷୀରେ ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ଶୁକ୍ରବାର ଦିନ ଇଉରୋପୀୟ ସଂଘର ତାଙ୍କ ସମକକ୍ଷ କାଜା କାଲ୍ଲାସଙ୍କ ସହ ଆଲୋଚ କରିଛନ୍ତି। ସେ ପହଲଗାମରେ ପାକିସ୍ତାନୀ ଆତଙ୍କବାଦୀମାନଙ୍କ ଦ୍ୱାରା ହିନ୍ଦୁମାନଙ୍କ ବିରୋଧରେ ହୋଇଥିବା ନିର୍ମମତା ବିଷୟରେ ସୂଚନା ଦେଇଥିଲେ।
ଇଉରୋପୀୟ ସଂଘ ନୂଆଦିଲ୍ଲୀ ଓ ଇସ୍ଲାମାବାଦକୁ “ସଂଯମ” ଦେଖାଇବାକୁ ଅନୁରୋଧ କରିଛି। ଏହା ସହିତ, ଭାରତର ସମ୍ଭାବ୍ୟ ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ନେଇ ଚର୍ଚ୍ଚା ମଧ୍ୟରେ ଉତ୍ତେଜନା ହ୍ରାସ କରିବା ପାଇଁ ଆଲୋଚନାର ପଥ ଗ୍ରହଣ କରିବା ଉପରେ ଜୋର ଦେଇଛି। ଇଉରୋପୀୟ ସଂଘର ଏହି ପ୍ରତିକ୍ରିୟା ଆମେରିକୀୟ ବୈଦେଶିକ ମନ୍ତ୍ରୀ ମାର୍କୋ ରୁବିଓଙ୍କ ଦ୍ୱାରା ଉଭୟ ଦେଶକୁ ପହଲଗାମ ଆତଙ୍କୀ ଆକ୍ରମଣ ନେଇ ଉତ୍ତେଜନା ହ୍ରାସ କରିବା ପାଇଁ ଏକଜୁଟ ହୋଇ କାମ କରିବାକୁ ଅନୁରୋଧ କରିଛନ୍ତି।
Comments are closed.