ନୂଆଦିଲ୍ଲୀ: ପହଲଗାମ ଆକ୍ରମଣ ପରେ ଭାରତ ପାକିସ୍ତାନ ଉପରେ ଆର୍ଥିକ ଭାବେ ପାନେ ଦେବାକୁ ଚେଷ୍ଟା କରୁଛି। ଭାରତ ପ୍ରଥମେ ପାକିସ୍ତାନ ସହ ସିଧାସଳଖ ବ୍ୟାପାର ଉପରେ ରୋକ ଲଗାଇଥିଲା। ଏବେ ଅନ୍ୟ ଦେଶ ମାଧ୍ୟମରେ ହେଉଥିବା ବ୍ୟାପାର ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି। ଏହା ଫଳରେ ପାକିସ୍ତାନକୁ ୪ ହଜାର କୋଟି ଟଙ୍କାରୁ ଅଧିକ ଆର୍ଥିକ କ୍ଷତି ହେବ। ଭାରତ ସରକାର ଏବେ ପରୋକ୍ଷ ପଥ, ଅର୍ଥାତ୍ ଅନ୍ୟ ଦେଶ ମାଧ୍ୟମରେ ପାକିସ୍ତାନରୁ ଆସୁଥିବା ସାମଗ୍ରୀ ଉପରେ ମଧ୍ୟ ରୋକ ଲଗାଇଛନ୍ତି। ଏହା ପୂର୍ବରୁ ଦୁଇ ଦେଶ ମଧ୍ୟରେ ସିଧାସଳଖ ବ୍ୟାପାର ଉପରେ ସମ୍ପୂର୍ଣ୍ଣ ପ୍ରତିବନ୍ଧକ ଲାଗୁ ହୋଇସାରିଛି।
ପାକିସ୍ତାନୀ ସାମଗ୍ରୀର ପରୋକ୍ଷ ପଥ
ପାକିସ୍ତାନୀ ସାମଗ୍ରୀ ବର୍ତ୍ତମାନ ଦୁବାଇ, ସିଙ୍ଗାପୁର ଓ ଶ୍ରୀଲଙ୍କା ଭଳି ଦେଶକୁ ଯାଇଥାଏ। ସେଠାରେ ପ୍ୟାକେଜିଂ ବଦଳାଇ ଏହା ଭାରତକୁ ପଠାଯାଇଥାଏ। ଏହା ଦ୍ୱାରା ‘ମେଡ୍ ଇନ୍ ପାକିସ୍ତାନ’ ଲେବଲ ଥିବା ସାମଗ୍ରୀ ଅନ୍ୟ ଦେଶର ସାମଗ୍ରୀ ଭାବେ ପରିଚୟ ପାଇ ଭାରତୀୟ ସୀମାରେ ପ୍ରବେଶ କରୁଥିଲା। ଏବେ ଭାରତ ଏହି ତୃତୀୟ ଦେଶ ମାଧ୍ୟମରେ ହେଉଥିବା ବ୍ୟାପାର ଉପରେ ମଧ୍ୟ କଡ଼ା କଟକଣା ଲାଗୁ କରିଛି। ଅନ୍ୟପକ୍ଷରେ, ଭାରତୀୟ କମ୍ପାନୀଗୁଡ଼ିକ ମଧ୍ୟ ଅନ୍ୟ ଦେଶ ମାଧ୍ୟମରେ ପାକିସ୍ତାନକୁ ସାମଗ୍ରୀ ପଠାଉଥିଲେ। ଏବେ ଉଭୟ ପକ୍ଷରୁ ଏଭଳି ବ୍ୟାପାର ସମ୍ପୂର୍ଣ୍ଣ ବନ୍ଦ ହୋଇଯାଇଛି।
ପାକିସ୍ତାନକୁ କେତେ କ୍ଷତି?
ପାକିସ୍ତାନ ତା’ର ଡ୍ରାଇ ଫ୍ରୁଟ୍, ଖଜୁରୀ ଓ ଅନ୍ୟାନ୍ୟ ସାମଗ୍ରୀ ପ୍ରଥମେ ଦୁବାଇ କିମ୍ବା ସିଙ୍ଗାପୁର ପଠାଇଥାଏ। ସେଠାରେ ପ୍ୟାକେଜିଂ ବଦଳାଇ ଏହା ଭାରତକୁ ପଠାଯାଇଥାଏ। ସେହିପରି, ପାକିସ୍ତାନୀ ରାସାୟନିକ ପଦାର୍ଥ, ସିମେଣ୍ଟ ଓ ଚମଡ଼ା ସାମଗ୍ରୀ ପ୍ରଥମେ ସିଙ୍ଗାପୁର କିମ୍ବା ଇଣ୍ଡୋନେସିଆ ଯାଇଥାଏ, ତା’ପରେ ପ୍ୟାକେଜିଂ ବଦଳାଇ ଭାରତକୁ ପଠାଯାଇଥାଏ। ସରକାରଙ୍କ ମତ ଥିଲା ଯେ ଏହି ଲୁଫୋଲ ମାଧ୍ୟମରେ ପାକିସ୍ତାନକୁ ଆର୍ଥିକ ସହାୟତା ମିଳୁଥିଲା। ଏହା ବନ୍ଦ ହେବା ଫଳରେ ପାକିସ୍ତାନକୁ ୫୦ କୋଟି ଡଲାର (ପ୍ରାୟ ୪,୨୦୦ କୋଟି ଟଙ୍କା)ର କ୍ଷତି ହୋଇଛି।
Comments are closed.