ମୁମ୍ବାଇ: ଦେଶର ଆର୍ଥିକ ରାଜଧାନୀ ମୁମ୍ବାଇ ପୁଣି ଥରେ ସୁରକ୍ଷା ଦୃଷ୍ଟିରୁ ହାଇ ଆଲର୍ଟରେ। ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦର ଓ ଐତିହାସିକ ତାଜ ହୋଟେଲକୁ ବୋମା ମାଡ଼ରେ ଉଡ଼ାଇ ଦେବାର ଧମକ ମିଳିଛି । ଏହାପରେ ପୁଲିସ ଓ ଗୁଇନ୍ଦା ସଂସ୍ଥାମାନେ ସତର୍କ ହୋଇଛନ୍ତି। ଏକ ଇ-ମେଲ ଜରିଆରେ ଏହି ଧମକ ଆସିଛି, ଯାହା ମୁମ୍ବାଇ ଏୟାରପୋର୍ଟ ପୁଲିସକୁ ପଠାଯାଇଥିଲା।
ମିଳିଥିବା ସୂଚନା ଅନୁଯାୟୀ, ଏହି ଧମକପୂର୍ଣ୍ଣ ଇ-ମେଲରେ ଆତଙ୍କବାଦୀ ଅଫଜଲ ଗୁରୁ ଓ ସୈବାକୁ ଶଙ୍କରଙ୍କୁ “ଅନ୍ୟାୟପୂର୍ଣ୍ଣ ଫାଶୀ” ଦିଆଯାଇଥିବା ଉଲ୍ଲେଖ ରହିଛି । ଏହାପରେ ମୁମ୍ବାଇ ବିମାନବନ୍ଦର ଓ ତାଜ ହୋଟେଲକୁ ଉଡ଼ାଇ ଦେବାର କଥା କୁହାଯାଇଛି। ଇ-ମେଲ ମିଳିବା ମାତ୍ରେ ପୁଲିସ ଓ ଗୁଇନ୍ଦା ସଂସ୍ଥାମାନେ ତୁରନ୍ତ ତଦନ୍ତ ଆରମ୍ଭ କରିଛନ୍ତି। ମାମଲାର ଗମ୍ଭୀରତାକୁ ଦୃଷ୍ଟିରେ ରଖି ଏହି ମେଲ ପଠାଇଥିବା ବ୍ୟକ୍ତିଙ୍କୁ ଖୋଜି ବାହାର କରିବା ପାଇଁ ଚେଷ୍ଟା ଜାରି ରହିଛି।
ଧମକ ମିଳିବା ପରେ ମୁମ୍ବାଇରେ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ା କରାଯାଇଛି। ବିମାନବନ୍ଦର ଓ ତାଜ ହୋଟେଲ ଭଳି ସମ୍ବେଦନଶୀଳ ସ୍ଥାନଗୁଡ଼ିକରେ ଡଗ୍ ସ୍କ୍ୱାର୍ଡ, ବୋମା ନିଷ୍କ୍ରିୟକାରୀ ଟିମ୍ ଓ ଅନ୍ୟାନ୍ୟ ସୁରକ୍ଷାକର୍ମୀଙ୍କୁ ମୁତୟନ କରାଯାଇଛି। ପାରାମିଲିଟାରୀ ଫୋର୍ସ ମଧ୍ୟ ସହରର ପ୍ରମୁଖ ଅଞ୍ଚଳଗୁଡ଼ିକରେ ଗସ୍ତ କରୁଛନ୍ତି। ଏହାପୂର୍ବେ ମଧ୍ୟ ମୁମ୍ବାଇ ବିମାନବନ୍ଦରକୁ ବୋମା ମାଡ଼ରେ ଉଡ଼ାଇ ଦେବାର ଧମକ ମିଳିଥିଲା, ଯେଉଁଥିପାଇଁ ଏଭଳି ଘଟଣାକୁ ନେଇ ସୁରକ୍ଷାକର୍ମୀ ସର୍ବଦା ସତର୍କ ଆଲର୍ଟରେ ଅଛନ୍ତି।
ଏହି ଧମକକୁ ନିକଟରେ ଜମ୍ମୁ-କଶ୍ମୀରର ପହଲଗାମରେ ଘଟିଥିବା ଆତଙ୍କବାଦୀ ଆକ୍ରମଣ ସହ ଯୋଡ଼ି ଦେଖାଯାଉଛି। ଗତ ୨୨ ଏପ୍ରିଲରେ ହୋଇଥିବା ଏହି ଆକ୍ରମଣରେ ୨୬ ଜଣ ନିରୀହ ପର୍ଯ୍ୟଟକଙ୍କର ଜୀବନ ଚାଲିଯାଇଥିଲା। ମୃତକଙ୍କ ମଧ୍ୟରେ ଅନେକ ମହାରାଷ୍ଟ୍ରର ଥିଲେ। ଏହା ପରେ କେନ୍ଦ୍ର ସରକାର ଓ ସେନା କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରି ଅପରେସନ ସିନ୍ଦୂର ଜରିଆରେ ପାକିସ୍ତାନରେ ଥିବା ଆତଙ୍କବାଦୀ ଅଡ୍ଡାଗୁଡ଼ିକ ଉପରେ ମିଶାଇଲ ଓ ଡ୍ରୋନ୍ ଆକ୍ରମଣ କରିଥିଲେ। ଏହି ଆକ୍ରମଣରେ ଶହେରୁ ଅଧିକ ଆତଙ୍କବାଦୀ ନିପାତ ହୋଇଥିବା ଖବର ମିଳିଛି।
Comments are closed.