ହାର୍ଭାଡ୍ ବିଶ୍ବବିଦ୍ୟାଳୟରେ ବିଦେଶୀ ଛାତ୍ରଙ୍କ ନାମଲେଖା ଉପରେ ରୋକ; ଭାରତ ଉପରେ କ’ଣ ପଡିବ ପ୍ରଭାବ…

ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ଏକ ବଡ଼ ନିଷ୍ପତ୍ତି ନେଇଛି । ଏବେ ହାର୍ଭାଡ୍ ବିଶ୍ୱବିଦ୍ୟାଳୟରେ ବିଦେଶୀ ଛାତ୍ରଙ୍କ ଆଡ୍‌ମିସନ୍ ଉପରେ କଟକଣା ଲଗାଯାଇଛି । ନୂତନ ବିଦେଶୀ ଛାତ୍ରମାନଙ୍କୁ ଆଉ ପ୍ରବେଶ ଦିଆଯିବ ନାହିଁ । ଟ୍ରମ୍ପ ପ୍ରଶାସନ ଏହାକୁ ବନ୍ଦ କରିଦେଇଛି । ହାର୍ଭାଡ୍‌ର SEVPକୁ ପ୍ରତ୍ୟାହାର କରିନେଲା ଟ୍ରମ୍ପ ପ୍ରଶାସନ ।

ଭାରତରୁ ମଧ୍ୟ ବହୁ ସଂଖ୍ୟକ ଛାତ୍ର ହାର୍ଭାଡ୍ ବିଶ୍ୱବିଦ୍ୟାଳୟରେ ପଢ଼ନ୍ତି ଏବଂ ଅନେକ ସେଠାକୁ ସ୍ନାତକ ଏବଂ ମାଷ୍ଟର୍ସ ପାଇଁ ଯିବାକୁ ପ୍ରସ୍ତୁତ ହେଉଥିଲେ, କିନ୍ତୁ ବର୍ତ୍ତମାନ ଏହି ନିଷ୍ପତ୍ତି ସେମାନଙ୍କୁ ଧକ୍କା ଲାଗିଛି । ହାର୍ଭାଡ୍ ବିଶ୍ୱବିଦ୍ୟାଳୟର ସରକାରୀ ୱେବସାଇଟ୍ ଅନୁଯାୟୀ, ପ୍ରତିବର୍ଷ ୫୦୦ ରୁ ୮୦୦ ଭାରତୀୟ ଛାତ୍ରଛାତ୍ରୀ ବିଶ୍ୱବିଦ୍ୟାଳୟରେ ପ୍ରବେଶ କରନ୍ତି । ବର୍ତ୍ତମାନ, ବିଶ୍ୱବିଦ୍ୟାଳୟରେ ୭୮୮ ଜଣ ଭାରତୀୟ ଛାତ୍ର ଅଧ୍ୟୟନ କରୁଛନ୍ତି ।

ଏହି ପଦକ୍ଷେପ ହାର୍ଭାଡ ବିଶ୍ୱବିଦ୍ୟାଳୟକୁ ପ୍ରଭାବିତ କରିବ । ଏହି ବିଶ୍ୱବିଦ୍ୟାଳୟରେ ପ୍ରତିବର୍ଷ ପ୍ରାୟ ୬,୮୦୦ ଅନ୍ତର୍ଜାତୀୟ ଛାତ୍ରଛାତ୍ରୀ ଏଠାରେ ଆଡମିସନ କରିଥାନ୍ତି । ସେମାନଙ୍କ ମଧ୍ୟରୁ ଅଧିକାଂଶ ଗ୍ରାଜୁଏସନ ବା ସ୍ନାତକ ଛାତ୍ର । ତଥାପି, ଏବେ ସେହି ଛାତ୍ରଛାତ୍ରୀମାନଙ୍କୁ ସେମାନଙ୍କର ପରବର୍ତ୍ତୀ ପଦକ୍ଷେପ ବିଷୟରେ ଚିନ୍ତା କରିବାକୁ ପଡିବ ଯେ ସେମାନେ ମାଷ୍ଟରସ୍ ଏବଂ ଅଧିକ ଅଧ୍ୟୟନ ପାଇଁ କେଉଁ ବିଶ୍ୱବିଦ୍ୟାଳୟକୁ ଯିବେ ।

ତେବେ ଏହା ହମାସ ସହିତ ଜଡିତ । ଗୃହ ସୁରକ୍ଷା ସଚିବ କ୍ରିଷ୍ଟି ନୋଏମ ଏକ ଚିଠିରେ କହିଛନ୍ତି ଯେ, ହାର୍ଭାଡ ବିଶ୍ୱବିଦ୍ୟାଳୟ ଏହାର ବିଦେଶୀ ଛାତ୍ରଛାତ୍ରୀମାନଙ୍କ ବିଷୟରେ ରେକର୍ଡ ପ୍ରସ୍ତୁତ କରିବାକୁ ମନା କରିବାରୁ ଗୃହ ସୁରକ୍ଷା ବିଭାଗ ଏହି ପଦକ୍ଷେପ ନେଇଛି ।

ନୋଏମ ହାର୍ଭାଡ ପରିସରରେ ଏକ ଅସୁରକ୍ଷିତ ପରିବେଶ ଲାଗି ରହିଥିବା ଅଭିଯୋଗ କରିଥିଲେ । ଯାହା ଯିହୁଦୀ ଛାତ୍ରମାନଙ୍କ ପ୍ରତି ଶତ୍ରୁତା ବଢାଇବା ଏବଂ ହମାସମାନଙ୍କୁ ସମର୍ଥନ କରୁଥିଲା । ହାର୍ଭାଡ ପକ୍ଷରୁ କୁହାଯାଇଛି ଯେ, ଏହି କାର୍ଯ୍ୟ ବେଆଇନ ଏବଂ ବିଶ୍ବବିଦ୍ୟାଳୟର ରିସର୍ଚ୍ଚ ମିଶନକୁ ଦୁର୍ବଳ କରିଛି ।

ଏହି ନିଷ୍ପତ୍ତି ଅନୁଯାୟୀ, ନୂଆ ଆଡମିସନ ନେବାକୁ ଥିବା ବିଦେଶୀ ଛାତ୍ରମାନେ ହାର୍ଭାଡ ବିଶ୍ୱବିଦ୍ୟାଳୟରେ ପ୍ରବେଶ କରିପାରିବେ ନାହିଁ, କିନ୍ତୁ ଯେଉଁମାନେ ବର୍ତ୍ତମାନ ଅଧ୍ୟୟନ କରୁଛନ୍ତି ଏବଂ ଗ୍ରାଜୁଏଟ୍ ହେବାକୁ ଯାଉଛନ୍ତି ସେମାନେ ସେମାନଙ୍କର ଗ୍ରାଜୁଏସନ୍ ଶେଷ କରିପାରିବେ । ଏହି ସେମିଷ୍ଟରରେ ଡିଗ୍ରୀ ସମାପ୍ତ କରିଥିବା ଛାତ୍ରଛାତ୍ରୀମାନଙ୍କୁ ଗ୍ରାଜୁଏସନ କରିବାକୁ ଅନୁମତି ଦିଆଯିବ । ନୋଏମଙ୍କ ଚିଠିରେ କୁହାଯାଇଛି ଯେ, ଏହି ପରିବର୍ତ୍ତନ ୨୦୨୫-୨୦୨୬ ଶିକ୍ଷାବର୍ଷରୁ କାର୍ଯ୍ୟକାରୀ ହେବ । ହାର୍ଭାଡର ୨୦୨୫ ମସିହାର ବ୍ୟାଚ୍ ଆସନ୍ତା ସପ୍ତାହରେ ଶେଷ ହେବାର ଆଶା କରାଯାଉଛି ।