ଅନଲାଇନ୍ ବେଟିଂ ଜରିଆରେ ୧ କୋଟିରୁ ଅଧିକ ଠକେଇ, ୨ ଗିରଫ

ଭୁବନେଶ୍ୱର: ଓଡ଼ିଶା କ୍ରାଇମ୍ ବ୍ରାଞ୍ଚ ଏକ ଅନଲାଇନ୍ ବେଟିଂ ରାକେଟର ପର୍ଦ୍ଦାଫାସ କରିଛି। ଏଥିରେ ଦୁଇଜଣ ବ୍ୟକ୍ତି ଯାଜପୁରର ଜଣେ ବାସିନ୍ଦାଙ୍କ ଠାରୁ ୧.୦୮ କୋଟି ଟଙ୍କା ଠକି ନେଇଥିଲେ।

ଗିରଫ ୨ ବ୍ୟକ୍ତି ହେଲେ ପଶ୍ଚିମବଙ୍ଗର କଣ୍ଟାଇର ରାୟପୁର ପଶିମ୍ବର୍ହରର ରୋହନ ଓରଫ ଏସକେ ୱାସିଉଲ୍ ଇସଲାମ (୨୯) ଏବଂ ଭୁବନେଶ୍ୱରର ୟୁନିଟ୍-୩ର ଜ୍ୟୋତି ପ୍ରକାଶ ପଲ୍ଲାଇ (୩୬)। ଇସଲାମ କ୍ରୀଡା ସାମଗ୍ରୀ ଏବଂ କାଜୁ ବ୍ୟବସାୟ କରୁଥିବା ବେଳେ ଜ୍ୟୋତି ପ୍ରକାଶ ନିର୍ମାଣ କାର୍ଯ୍ୟରେ ଜଡିତ।

କ୍ରାଇମ୍ ବ୍ରାଞ୍ଚର ଏକ ବିଜ୍ଞପ୍ତି ଅନୁଯାୟୀ, ମେ ୧ ତାରିଖରେ ଯାଜପୁର କଳିଙ୍ଗନଗର ଜଣେ ବାସିନ୍ଦାଙ୍କ ଦ୍ୱାରା ଦାଖଲ କରାଯାଇଥିବା ଅଭିଯୋଗ ଆଧାରରେ ସେମାନଙ୍କୁ ଗିରଫ କରାଯାଇଛି। ତାଙ୍କ କହିବାନୁଯାୟୀ, ସାଇବର ଅପରାଧୀମାନେ ଅଧିକ ଲାଭ ପାଇଁ www.dream444.com ଏବଂ www.dream666.com ୱେବସାଇଟ୍ ରେ ଟଙ୍କା ନିବେଶ କରିବାକୁ ପ୍ରଲୋଭିତ କରିଥିଲେ। ସେ ଅଗଷ୍ଟ ୨୦୨୨ରୁ ଜାନୁଆରୀ ୨୦୨୫ ମଧ୍ୟରେ ନିଜ ଆକାଉଣ୍ଟ ଏବଂ ତାଙ୍କ ସ୍ତ୍ରୀ, ବନ୍ଧୁ ଏବଂ କର୍ମଚାରୀଙ୍କ ଆକାଉଣ୍ଟରୁ ୧.୦୮ କୋଟି ଟଙ୍କା ଟ୍ରାନ୍ସଫର କରିଥିଲେ।

ତେବେ ତଦନ୍ତରୁ ଜଣାପଡିଛି ଯେ ଠକମାନେ ଅଧିକ ରିଟର୍ଣ୍ଣ ପ୍ରତିଶ୍ରୁତି ଦେବା ସହିତ ଏଭଳି ଗେମିଂ ଆପ୍ସକୁ ପ୍ରୋତ୍ସାହିତ କରିବା ପାଇଁ ହ୍ୱାଟ୍ସଆପ୍, ଟେଲିଗ୍ରାମ ଏବଂ ସୋସିଆଲ ମିଡିଆ ବିଜ୍ଞାପନ ବ୍ୟବହାର କରିଥିଲେ। ପୀଡିତମାନଙ୍କୁ UPI ବିବରଣୀ ଏବଂ OTP ଭଳି ସମ୍ବେଦନଶୀଳ ସୂଚନା ସେୟାର କରିବାକୁ ପ୍ରବର୍ତ୍ତାଉ ଥିଲେ।

ଅଭିଯୁକ୍ତମାନେ କେବଳ ଫିସିଂ ୱେବସାଇଟ୍ ଚଲାଇ ନଥିଲେ ବରଂ ନକଲି ବ୍ୟାଙ୍କ ଆକାଉଣ୍ଟ ଖୋଲିବା ପାଇଁ ବ୍ୟକ୍ତିଗତ ତଥ୍ୟର ଅପବ୍ୟବହାର ମଧ୍ୟ କରିଥିଲେ। ସେମାନଙ୍କଠାରୁ ପାସବୁକ୍, ଚେକ୍ ବୁକ୍, ମୋବାଇଲ୍ ଫୋନ୍, ସିମ୍ କାର୍ଡ, ଆଧାର କାର୍ଡ, ପାନ କାର୍ଡ ଏବଂ ଏକ GST ସାର୍ଟିଫିକେଟ୍ ସମେତ ଅନେକ ଅପରାଧିକ ଜିନିଷ ଜବତ କରାଯାଇଛି। ଏହାବ୍ୟତୀତ ଠକେଇ ସହିତ ଜଡିତ ଅନେକ ବ୍ୟାଙ୍କ ଆକାଉଣ୍ଟକୁ ଫ୍ରିଜ୍ ମଧ୍ୟ କରାଯାଇଛି।