ନୂଆଦିଲ୍ଲୀ:୨୦୨୭ ଜନଗଣନା ପାଇଁ ତାରିଖ ଘୋଷଣା କରାଯାଇଛି। ଶୁକ୍ରବାର ଦିନ ଜନଗଣନା କମିଶନର ଘୋଷଣା କରିଛନ୍ତି ଯେ, ଯେଉଁ ଅଞ୍ଚଳଗୁଡ଼ିକରେ ନିର୍ବାଚନ ଚାଲିଥିବ କିମ୍ବା ଯେଉଁଠାରେ ବରଫପାତ ହେଉଥିବ, ସେହି ସ୍ଥାନଗୁଡ଼ିକୁ ବାଦ୍ ଦେଇ ସମଗ୍ର ଦେଶରେ ୨୦୨୭ ମସିହା ଜାନୁଆରୀ ୨୫ରୁ ଫେବୃଆରୀ ୨୮ ପର୍ଯ୍ୟନ୍ତ ଜନଗଣନା କାର୍ଯ୍ୟ ଅନୁଷ୍ଠିତ ହେବ। ବିଜ୍ଞପ୍ତି ଅନୁଯାୟୀ, ୨୦୨୭ ମାର୍ଚ୍ଚ ୧ରୁ ମାର୍ଚ୍ଚ ୫ ପର୍ଯ୍ୟନ୍ତ ଜନଗଣନା ପାଇଁ ଏକ ‘ସଂଶୋଧନ ପର୍ଯ୍ୟାୟ’ (revision round) ଅନୁଷ୍ଠିତ ହେବ।
ଭାରତର ରେଜିଷ୍ଟ୍ରାର୍ ଜେନେରାଲ୍ ତଥା ଜନଗଣନା କମିଶନର ମୃତ୍ୟୁଞ୍ଜୟ କୁମାର ନାରାୟଣଙ୍କ ଦ୍ୱାରା ଜାରି ଏକ ବିଜ୍ଞପ୍ତି ଅନୁଯାୟୀ, ୨୦୨୭ ମସିହା ଜାନୁଆରୀ ୨୫ ତାରିଖରୁ ଫେବୃଆରୀ ୨୮ ତାରିଖ ପର୍ଯ୍ୟନ୍ତ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଜନଗଣନା କାର୍ଯ୍ୟ ଅନୁଷ୍ଠିତ ହେବ। ତେବେ ଏଥିରୁ ମଣିପୁର,ଗୋଆ,ଉତ୍ତର ପ୍ରଦେଶ, ପଞ୍ଜାବ, ଉତ୍ତରାଖଣ୍ଡ, ଲଦାଖ ତଥା ହିମାଚଳ ପ୍ରଦେଶ ଓ ଜମ୍ମୁ-କଶ୍ମୀରର ବରଫାବୃତ ଅଞ୍ଚଳଗୁଡ଼ିକୁ (ଯେଉଁଠାରେ ଜନଗଣନା ସମୟସାରଣୀ ଭିନ୍ନ ଅଟେ) ବାଦ୍ ଦିଆଯାଇଛି।
ଏହି ବିଜ୍ଞପ୍ତିରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ, ଘରକୁ ଘର ଯାଇ କରାଯିବାକୁ ଥିବା ଜନଗଣନା ଆରମ୍ଭ ହେବା ପୂର୍ବରୁ,ଲୋକମାନେ ୧୦ ଜାନୁଆରୀ ୨୦୨୭ ରୁ ୨୪ ଜାନୁଆରୀ ୨୦୨୭ ମଧ୍ୟରେ ନିଜର ତଥ୍ୟ ପଞ୍ଜୀକରଣ କରିବାର ସୁଯୋଗ ପାଇବେ।
ଭାରତରେ ଶେଷ ଜନଗଣନା ୨୦୧୧ ମସିହାରେ କରାଯାଇଥିଲା। ଯଦିଓ ୨୦୨୧ ମସିହାରେ ଏକ ଜନଗଣନା ହେବାର ଥିଲା, କିନ୍ତୁ କୋଭିଡ୍-୧୯ ମହାମାରୀ କାରଣରୁ ଏହାକୁ ସ୍ଥଗିତ ରଖାଯାଇଥିଲା।
ବାସ୍ତବରେ ଯେକୌଣସି ଦେଶ ପାଇଁ ଜନଗଣନା ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ପ୍ରକ୍ରିୟା ଅଟେ। ଏହି ପ୍ରକ୍ରିୟା ମାଧ୍ୟମରେ ହିଁ କୌଣସି ଦେଶର ମୋଟ ଜନସଂଖ୍ୟା ଏବଂ ଜନସଂଖ୍ୟା ସମ୍ବନ୍ଧୀୟ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ତଥ୍ୟ ସଂଗ୍ରହ କରାଯାଇଥାଏ।