ଦଳାଚକଟା ଘଟଣାରେ ବଡ କାର୍ଯ୍ୟନୁଷ୍ଠାନ: ଟପ୍ ଅଧିକାରୀ ସସପେଣ୍ଡ, ଆରସିବି ମାର୍କେଟିଂ ହେଡ୍ ସହ ୩ ଗିରଫ

ବେଙ୍ଗାଲୁରୁ: ବେଙ୍ଗାଲୁରୁରେ ଆରସିବି ବିଜୟ ଉତ୍ସବରେ ଦଳାଚକଟା ଘଟଣାରେ ବଡ କାର୍ଯ୍ୟନୁଷ୍ଠାନ ଗ୍ରହଣ କରିଛନ୍ତି କର୍ଣ୍ଣାଟକ ସରକାର ।  କର୍ଣ୍ଣାଟକ ପୋଲିସ ଚାରି ଜଣଙ୍କୁ ଗିରଫ କରିଛି। ସେମାନଙ୍କ ମଧ୍ୟରେ ଆରସିବିର ମାର୍କେଟିଂ ମୁଖ୍ୟଙ୍କୁ ଗିରଫ କରାଯାଇଛି । ଏଥିସହିତ ଆଉ ତିନି ଜଣଙ୍କୁ ଅଟକ ରଖାଯାଇଛି । ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ମାର୍କେଟିଂ ମୁଖ୍ୟ ନିଖିଲ ସୋସଲେ ମୁମ୍ବାଇ ପଳାଇବାକୁ ଚେଷ୍ଟା କରୁଥିବା ବେଳେ ତାଙ୍କୁ ଗିରଫ କରିଥିଲା କର୍ଣ୍ଣାଟକ ପୋଲିସ୍ । କର୍ଣ୍ଣାଟକ ପୋଲିସ ତାଙ୍କୁ ବେଙ୍ଗାଲୁରୁ ବିମାନବନ୍ଦରରୁ ଗିରଫ କରିଛି । ସକାଳ ପ୍ରାୟ ସାଢ଼େ ୬ଟାରେ ନିଖିଲଙ୍କୁ ବେଙ୍ଗାଲୁରୁର କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦରରୁ ଗିରଫ କରାଯାଇଛି । ନିଖିଲଙ୍କ ବ୍ୟତୀତ ଇଭେଣ୍ଟ ମ୍ୟାନେଜମେଣ୍ଟ କମ୍ପାନୀ ଡିଏନଏ ଏଣ୍ଟରଟେନମେଣ୍ଟ ପ୍ରାଇଭେଟ୍ ଲିମିଟେଡର ସଦସ୍ୟ ସୁନୀଲ ମାଥ୍ୟୁ, କିରଣ ଏବଂ ସୁମନ୍ତଙ୍କୁ ମଧ୍ୟ ଅଟକ ରଖାଯାଇଛି। ସୁନୀଲ ଉପାଧ୍ୟକ୍ଷ ପଦବୀରେ ରହିଥିବା ବେଳେ ଡିଏନଏ ପାଇଁ ଆଇପିଏଲ କାର୍ଯ୍ୟକ୍ରମ ପରିଚାଳନା କରନ୍ତି ।

ସେପଟେ ବେଙ୍ଗାଲୁରୁ ପୋଲିସ କମିଶନର ବି. ଦୟାନନ୍ଦଙ୍କ ସମେତ ୱେଷ୍ଟ ଡିଭିଜନ୍ ଏସିପି, ସେଣ୍ଟ୍ରାଲ ଡିଭିଜନ୍ ଡିସିପି, କ୍ୟୁବନ ପାର୍କ ଡିଭିଜନ୍ ଏସିପି ଏବଂ କ୍ୟୁବନ୍ ପାର୍କ ପୋଲିସ ଷ୍ଟେସନ ଇନସ୍ପେକ୍ଟରଙ୍କ ସହ ଷ୍ଟାଡିୟମ ଇନଚାର୍ଜଙ୍କୁ ନିଲମ୍ବନ କରିଛନ୍ତି କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ।

ତେବେ ଆରସିବି ପ୍ରଥମ ଥର ପାଇଁ ଆଇପିଏଲ ଜିତିବା ପରେ ଉଦ୍ଯାପନୀ ସମୟରେ ବେଙ୍ଗାଲୁରୁର ଚିନ୍ନାସ୍ୱାମୀ ଷ୍ଟାଡିୟମ ବାହାରେ ଦଳାଚକଟା ଭଳି ସ୍ଥିତି ଉତ୍ପନ୍ନ ହୋଇଥିଲା । ଏଥିରେ ୧୧ ଜଣଙ୍କର ମୃତ୍ୟୁ ହୋଇଛି । ଯାହାଙ୍କ ମଧ୍ୟରେ ଶିଶୁ ଏବଂ ମହିଳା ରହିଛନ୍ତି । ଏହା ସହିତ, ୬୦ ରୁ ଅଧିକ ଲୋକ ଆହତ ହୋଇଥିବା ସୂଚନା ରହିଛି । ତଥାପି, ଅଧିକାରୀମାନେ କହିଛନ୍ତି ଯେ ସମସ୍ତ ଆହତଙ୍କ ଅବସ୍ଥା ସ୍ୱାଭାବିକ ରହିଛି। ପୀଡିତଙ୍କ ପରିବାର ଦଳାଚକଟା ପାଇଁ କର୍ତ୍ତୃପକ୍ଷଙ୍କୁ ଦାୟୀ କରିଛନ୍ତି ।

ଯାହାକୁ ଆଧାର କରି ଉତ୍ସବ ପାଳନ ସମୟରେ ଦଳାଚକଟାରେ ୧୧ ଜଣଙ୍କ ମୃତ୍ୟୁ ପରେ ଭାରତୀୟ ଦଣ୍ଡ ସଂହିତାର ବିଭିନ୍ନ ଧାରା ଅନୁଯାୟୀ ଏକ ଏଫଆଇଆର ରୁଜୁ ହୋଇଥିଲା। କିଛି ଘଣ୍ଟା ପରେ ଚାରି ଜଣଙ୍କୁ ଗିରଫ କରାଯାଇଛି। ଏଫଆଇଆରରେ ଲଗାଯାଇଥିବା ଅଭିଯୋଗରେ ଦୋଷୀ ହତ୍ୟା ମଧ୍ୟ ଅନ୍ତର୍ଭୁକ୍ତ। ଏଫଆଇଆର ଅନୁଯାୟୀ, ସକ୍ଷମ ଅଧିକାରୀଙ୍କଠାରୁ ଅନୁମତି ନ ନେଇ ମଧ୍ୟ ଆରସିବି ଫ୍ରାଞ୍ଚାଇଜ୍ ସୋସିଆଲ ମିଡିଆରେ କାର୍ଯ୍ୟକ୍ରମ ଘୋଷଣା କରି ଲୋକଙ୍କୁ ନିମନ୍ତ୍ରଣ କରିଥିଲା। ଗୁରୁବାର ମୁଖ୍ୟମନ୍ତ୍ରୀ ସିଦ୍ଧରମୈୟା ଆରସିବି ଦଳ, ଡିଏନଏ ଏଣ୍ଟରଟେନମେଣ୍ଟ ପ୍ରାଇଭେଟ୍ ଲିମିଟେଡ୍ ଏବଂ କର୍ଣ୍ଣାଟକ ରାଜ୍ୟ କ୍ରିକେଟ୍ ସଂଘ (କେଏସସିଏ)ର ପ୍ରତିନିଧିମାନଙ୍କୁ ଗିରଫ କରିବାକୁ ନିର୍ଦ୍ଦେଶ ଦେଇଥିଲେ।

ସେପଟେ କର୍ଣ୍ଣାଟକ ରାଜ୍ୟ କ୍ରିକେଟ୍ ସଂଘର ଦୁଇ ଅଧିକାରୀ, ସଚିବ ଶଙ୍କର ଏବଂ କୋଷାଧ୍ୟକ୍ଷ ଜୟରାମ ଫେରାର୍ ଅଛନ୍ତି। ସେମାନଙ୍କୁ ଖୋଜିବା ପାଇଁ ପ୍ରୟାସ ଜାରି ରହିଛି। ପୋଲିସ କହିଛି ଯେ ସେମାନଙ୍କୁ ସେମାନଙ୍କ ଘରେ ମିଳିନାହିଁ। ପୋଲିସ କହିଛି ଯେ ଡେପୁଟି କମିଶନର ଅଫ୍ ପୋଲିସ ଅକ୍ଷୟଙ୍କ ନେତୃତ୍ୱରେ କେନ୍ଦ୍ରୀୟ ଅପରାଧ ଶାଖା ରାତିସାରା ଏକ ଅଭିଯାନ ଚଳାଇ ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତଙ୍କୁ ଆଜି ଅପରାଧ ତଦନ୍ତ ବିଭାଗକୁ ହସ୍ତାନ୍ତର କରାଯାଇପାରେ। ଗୁରୁବାର ମୁଖ୍ୟମନ୍ତ୍ରୀ ସିଦ୍ଧରମୈୟା ବେଙ୍ଗାଲୁରୁ ପୋଲିସ କମିଶନର ଦୟାନନ୍ଦ ଏବଂ ଅନ୍ୟ ଅନେକ ବରିଷ୍ଠ ପୋଲିସ ଅଧିକାରୀଙ୍କୁ ନିଲମ୍ବିତ କରିବା ପରେ  ସୀମାନ୍ତ କୁମାର ସିଂହଙ୍କୁ ନୂତନ ପୋଲିସ କମିଶନର ଭାବରେ ନିଯୁକ୍ତ କରାଯାଇଛି ।