ବିଜେପି ସରକାରକୁ ବର୍ଷେ…କରିଛନ୍ତି କେତେ ?

ଭୁବନେଶ୍ବର: ରାଜ୍ୟରେ ବିଜେପି ସରକାରକୁ ବର୍ଷେ ପୂରିଛି । ବର୍ଷକ ତଳେ ଜୁନ୍ ୧୨ତାରିଖରେ ଓଡିଶା ଦେଖିଥିଲା ନୂଆ ମୁଖ୍ୟମନ୍ତ୍ରୀଙ୍କୁ । ଜନତା ମଇଦାନରେ ଭବ୍ୟ ସମାରୋହରେ ଶପଥ ନେଇଥିଲେ ମୋହନ ମାଝୀ । ୟା ଭିତରେ ବର୍ଷେ ବିତିଛି । ତେବେ ବର୍ଷକରେ କେତେ କରିଛନ୍ତି, ସେନେଇ ଖୋଦ୍ ମୁଖ୍ୟମନ୍ତ୍ରୀ ରିପୋର୍ଟ କାର୍ଡ ରଖି ସାରିଛନ୍ତି । ନିର୍ବାଚନୀ ଇସ୍ତାହାରରେ ରଖିଥିବା ୨୧ଟି ପ୍ରତିଶ୍ରୁତିରୁ ୧୧ଟି ପୂରଣ କରିଥିବା ସରକାର ଦାବି କରୁଛନ୍ତି। ତେବେ ସରକାରଙ୍କ ଦାବି ଓ ବାସ୍ତବ ଚିତ୍ର ଭିନ୍ନ ବୋଲି ବିରୋଧୀ କହୁଛନ୍ତି । ଚାଷୀଙ୍କୁ ଇନପୁଟ୍ ସବସିଡି ଓ ସୁଭଦ୍ରା ଯୋଜନା ରାଜ୍ୟ ସରକାରଙ୍କ ପ୍ରମୁଖ ସଫଳତା ହୋଇଛି ତ ମହିଳା ବିରୋଧୀ ଅପରାଧ, ଓଡିଆ ଅସ୍ମିତାକୁ ନେଇ ସରକାରଙ୍କୁ ଟାର୍ଗେଟ୍ କରିଛନ୍ତି ବିରୋଧୀ । ରାଜ୍ୟ ସରକାରଙ୍କ ବର୍ଷର ବିକାଶ ହିସାବକୁ ନେଇ ଦେଖିବା ମୋହନ ସରକାର ରିପୋର୍ଟ କାର୍ଡ, ନମ୍ବର-୬ ।

ସରକାରକୁ ଏତେ ସଫଳତା !

ଗତ ବର୍ଷେ ମଧ୍ୟରେ ବିଜେପି ସରକାରଙ୍କ ପ୍ରମୁଖ ସଫଳତା, ସୁଭଦ୍ରା ଯୋଜନା । ନିର୍ବାଚନ ବେଳେ ମହିଳାଙ୍କୁ ୫୦ହଜାର ଟଙ୍କା ଲେଖାଏଁ ଦେବାକୁ ପ୍ରତିଶ୍ରୁତି ଦେଇଥିଲା ବିଜେପି । ଆଉ କ୍ଷମତାକୁ ଆସିବା ପରେ ସୁଭଦ୍ରା ଯୋଜନାର ଶୁଭାରମ୍ଭ କରିଛି । ଯୋଜନା ମାଧ୍ୟମରେ ରାଜ୍ୟର କୋଟିଏ ମହିଳାଙ୍କ ପାଖରେ ସରକାର ପହଞ୍ଚିଥିବା କହୁଛନ୍ତି । ସେହିପରି ଚାଷୀଙ୍କୁ ୮ଶହ ଟଙ୍କା ଇନପୁଟ୍ ସବସିଡି ଦେଇଛନ୍ତି ସରକାର । ଶ୍ରୀମନ୍ଦିର ପାଇଁ ୫ଶହ କୋଟି ଟଙ୍କାର କର୍ପସ ଫଣ୍ଡ ଗଠନ ହୋଇଛି ତ ୯ଟି ନିଯୁକ୍ତି ମେଳାରେ ୨୮ହଜାର ଖାଲି ଥିବା ସରକାରୀ ପଦବୀ ପୂରଣ ହୋଇଛି । ଉତ୍କର୍ଷ ଓଡିଶା କାର୍ଯ୍ୟକ୍ରମରେ ୧୭ଲକ୍ଷ କୋଟି ନିବେଶ ପାଇଁ ଶିଳ୍ପପତି ଆଗ୍ରହ ଦେଖାଇଥିବା ବେଳେ ୧୩ଲକ୍ଷ କୋଟି ନିବେଶ ପାଇଁ ଏମଓୟୁ ହୋଇଛି ।

ସଫଳତା କମ୍ ସମାଲୋଚନା ଅଧିକ !

ଗତ ବର୍ଷକ ଭିତରେ ବିଜେପି ସରକାରଙ୍କ ସଫଳତାଠାରୁ ଅଧିକ ସମାଲୋଚନାର ଶିକାର ହେବାକୁ ପଡିଛି । ସୁଭଦ୍ରା ସରକାରଙ୍କ ଫ୍ଲାଗସିପ୍ କାର୍ଯ୍ୟକ୍ରମ ରହିଥିବା ବେଳେ ଏକାସାଙ୍ଗରେ ୫୦ହଜାର ନଦେଇ ୬ମାସରେ ୫ହଜାର ଟଙ୍କା ଦେବାକୁ ସମାଲୋଚନା କରିଛନ୍ତି ବିରୋଧୀ । ସେହିପରି ଧାନର ଇନପୁଟ୍ ସବସିଡି ବାବଦରେ ୮ଶହ ଟଙ୍କା ଦେଉଥିଲେ ମଧ୍ୟ ଅତ୍ୟଧିକ କଟନିଛଟନି ଚାଷୀଙ୍କୁ ନିରାଶ କରିଛି । କେବଳ ୮୦ବର୍ଷରୁ ଅଧିକ ଓ ୮୦ପ୍ରତିଶତ ଦିବ୍ୟାଙ୍ଗଙ୍କୁ ସାଢେ ୩ହଜାର ଟଙ୍କା ଭତ୍ତା ଦେଇ ଅନ୍ୟ ମାନଙ୍କୁ ସରକାର ପ୍ରତାରିତ କରିଥିବା ଅଭିଯୋଗ ହୋଇଛି । ଟ୍ରିପଲ୍ ଇଞ୍ଜିନ ସରକାର ଥାଇ ବି ପୋଲାଭରମ୍, ମହାନଦୀ, କୋଟିଆ ପରି ବିବାଦ ସମାଧାନ କ୍ଷେତ୍ରରେ ସରକାର ବିଶେଷ ଆଗେଇ ନାହାନ୍ତି । ମହଙ୍ଗା ମାଡ଼ରେ ଖାଉଟି ହନ୍ତସନ୍ତ ହୋଇଛନ୍ତି ତ ହଠାତ୍ ଆଳୁ ଦର ବୃଦ୍ଧି ବୋଝ ଉପରେ ଲଳିତା ବିଡା ହୋଇଛି ।

ପ୍ରଶାସନିକ ସ୍ଥାଣୁତାକୁ ନେଇ ପ୍ରଶ୍ନ

ଗତ ବର୍ଷକ ମଧ୍ୟରେ ପ୍ରଶାସନିକ ସ୍ଥାଣୁତାକୁ ନେଇ ଅନେକ ଥର ପ୍ରଶ୍ନ ଉଠାଇଛନ୍ତି ବିରୋଧୀ । ଏପରିକି ପ୍ରଶାସନ ଉପରେ ସରକାରଙ୍କ ନିୟନ୍ତ୍ରଣ ଏକପ୍ରକାର ହୁଗୁଳା ହୋଇଥିବା ବି ଅଭିଯୋଗ ହୋଇଛି । ସେହିପରି ବିଜେପି ସରକାର ପ୍ରଥମ ବର୍ଷରୁ ହିଁ ଅର୍ଥନୀତି ପରିଚାଳନାରେ ଋଣ ଉପରେ ଅଧିକ ନିର୍ଭରଶୀଳ ହୋଇପଡିବା ରାଜ୍ୟର ଅର୍ଥନୈତିକ ସ୍ବାସ୍ଥ୍ୟ ପାଇଁ ଭଲ ନୁହେଁ ବୋଲି ବିଶେଷଜ୍ଞ କହିଛନ୍ତି । ଆଇନ ଶୃଙ୍ଖଳା ଓ ମହିଳା ବିରୋଧୀ ଅପରାଧ ବଢିବାକୁ ନେଇ ଅନେକ ଥର ସରକାରଙ୍କୁ ଘେରିଛନ୍ତି ବିରୋଧୀ । ଚିକିଟି ମଦମୃତ୍ୟୁ ହେଉ କି ଭରତପୁର ଥାନାରେ ନିର୍ଯାତନା ମାମଲା, ତଦନ୍ତ ତ ହୋଇଛି, ହେଲେ କାର୍ଯ୍ୟାନୁଷ୍ଠାନ ହୋଇନି । ରଥଯାତ୍ରା ପାଖେଇ ଥିବା ବେଳେ ଗତବର୍ଷ ରଥ ଉପରୁ ବଡ ଠାକୁର ପଡିଯିବା ଘଟଣାରେ ବି ଆକ୍ସନ ହୋଇନି ।

ଓଡିଆ ଅସ୍ମିତା କଥା କହି ବିଜେପି କ୍ଷମତାକୁ ଆସିଥିବା ବେଳେ ଏକ୍ଷେତ୍ରରେ ସେଭଳି ଆଖିଦୃଶିଆ ପଦକ୍ଷେପ ନେଇନାହାନ୍ତି ସରକାର । ରାଜ୍ୟରେ ଶିଳ୍ପ ଉପଯୋଗୀ ପରିବେଶ ବା ଇଣ୍ଡଷ୍ଟ୍ରିଆଲ୍ ଇକୋସିଷ୍ଟମ ଦୁର୍ବଳ ଥିବା ଅଭିଯୋଗ ହେଉଛି । ମାଣ୍ଡିପଙ୍କାରେ ଆମ୍ବ ଟାକୁଆ ଜାଉ ଖାଇ ତିନି ଜଣଙ୍କ ମୃତ୍ୟୁ ଘଟଣା ନେଇ ସରକାରଙ୍କୁ ଟାର୍ଗେଟ୍ କରିଛନ୍ତି ବିରୋଧୀ । ଏପରିକି  ଅନେକ ସମୟରେ ମନ୍ତ୍ରୀଙ୍କ ବୟାନକୁ ନେଇ ବି ସରକାର ଅଡୁଆରେ ପଡିଛନ୍ତି । ଏପର୍ଯ୍ୟନ୍ତ ୬ମନ୍ତ୍ରୀପଦ ଖାଲି ଥିବା ବେଳେ ବୋର୍ଡ ଓ ନିଗମ ପଦ ପୂରଣ ହୋଇପାରିନି ।