ରାଞ୍ଚି: ଝାଡ଼ଖଣ୍ଡର ଖୁଣ୍ଟି ଜିଲ୍ଲାର କର୍ରା ଥାନା ଅଞ୍ଚଳରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏହି ଭୟଙ୍କର ସଡ଼କ ଦୁର୍ଘଟଣାରେ ୪ ଜଣ ମହିଳା ଓ ୩ ଶିଶୁଙ୍କ ସମେତ ୭ ଜଣଙ୍କର ମୃତ୍ୟୁ ଘଟିଛି ଏବଂ ଦୁଇ ଜଣ ଗମ୍ଭୀର ଭାବେ ଆହତ ହୋଇଛନ୍ତି। ଗୁରୁବାର ବିଳମ୍ବିତ ରାତି ପ୍ରାୟ ୧୦:୧୫ ସମୟରେ କର୍ରା-ତୋରପା ମୁଖ୍ୟ ରାସ୍ତାର ଜୋନେ-ଲୁଦ୍ରୁ ମୋଡ଼ ନିକଟରେ ଏହି ଦୁର୍ଘଟଣା ଘଟିଛି।
ସୂଚନା ଅନୁସାରେ ପ୍ରଥମେ ଜଣେ ସ୍କୁଟି ଚାଳକ ଭାରସାମ୍ୟ ହରାଇ ରାସ୍ତା କଡ଼ରେ ଥିବା ଏକ ନାଳ ପାଖ ବୁଦା ଭିତରକୁ ଖସି ପଡ଼ିଥିଲେ। ଏହା ଦେଖି ଆଖପାଖ ବସ୍ତିର ମହିଳା ଓ ଶିଶୁମାନେ ତାଙ୍କୁ ସାହାଯ୍ୟ କରିବା ପାଇଁ ରାସ୍ତା କଡ଼ରେ ରୁଣ୍ଡ ହୋଇଥିଲେ। ଠିକ୍ ସେହି ସମୟରେ ତୋରପା ଆଡ଼ୁ ଅତି ଦ୍ରୁତ ଗତିରେ ଆସୁଥିବା ଏକ ୧୮ ଚକିଆ ବେକାବୁ ଟ୍ରେଲର/ଟ୍ରକ ସେଠାରେ ଠିଆ ହୋଇଥିବା ଲୋକଙ୍କ ଉପରେ ମାଡ଼ି ଯାଇଥିଲା। ଟ୍ରକ୍ ଧକ୍କା ଏତେ ଭୟଙ୍କର ଥିଲା ଯେ ୬ ଜଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା ଏବଂ ଜଣେ ୧୨ ବର୍ଷର ଶିଶୁ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଥିଲା।
ସବୁଠାରୁ ଦୁଃଖଦ ବିଷୟ ହେଉଛି, ମୃତକଙ୍କ ମଧ୍ୟରେ ଗୋଟିଏ ପରିବାରର ୩ ଜଣ ସଦସ୍ୟ (ସ୍ତ୍ରୀ, ଝିଅ ଏବଂ ୧ ବର୍ଷର ନାତୀ) ସାମିଲ ଅଛନ୍ତି। ସ୍ଥାନୀୟ ଖୁଣ୍ଟି ଏସପିଙ୍କ ସୂଚନା ଅନୁସାରେ, ସେହି ସ୍ଥାନରେ ତୀବ୍ର ମୋଡ଼ ଏବଂ ଅନ୍ଧାର ଥିବା ହେତୁ ଟ୍ରକ ଚାଳକ ଲୋକଙ୍କୁ ଦେଖିପାରି ନଥିଲେ। ଦୁର୍ଘଟଣା ପରେ ଟ୍ରକର ଡ୍ରାଇଭର ଓ ହେଲପର ଗାଡ଼ି ଛାଡ଼ି ଫେରାର ହୋଇଯାଇଛନ୍ତି। ପୋଲିସ ଗାଡ଼ିଟିକୁ ଜବତ କରିବା ସହ ଫେରାର ଚାଳକକୁ ଧରିବା ପାଇଁ ତଦନ୍ତ ଜାରି ରଖିଛି। ଆହତମାନଙ୍କୁ ସ୍ଥାନୀୟ ଖୁଣ୍ଟି ସଦର ହସ୍ପିଟାଲରେ ଭର୍ତ୍ତି କରାଯାଇଛି।