ଜନ୍ମଦିନରେ ଭାବପ୍ରବଣ ହୋଇପଡିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ, ଆଖିରୁ ଝରି ପଡିଲା ଲୁହ, ଜାଣନ୍ତୁ କାହିଁକି?

ଡେରାଡୁନ: ରାଷ୍ଟ୍ରପତି ଦ୍ରୌପଦୀ ମୁର୍ମୁ ୬୭ ବର୍ଷ ବୟସରେ ପାଦ ଦେଇଛନ୍ତି । ତେବେ ଆଜି ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏକ ମଞ୍ଚରେ ଭାବପ୍ରବଣ ହୋଇ କାନ୍ଦୁଥିବା ଭିଡିଓ ସାମ୍ନାକୁ ଆସିଛି ।

ଶୁକ୍ରବାର ମେ ୨୦ ତାରିଖରେ ଉତ୍ତରାଖଣ୍ଡ ରାଜଧାନୀ ଡେରାଡୁନରେ NIEPVD (National Institute for the Empowerment of Persons with Visual Disabilities)ରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ପାଇଁ ଏକ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏହି ଅବସରରେ, NIEPVDର ପିଲାମାନେ ରାଷ୍ଟ୍ରପତିଙ୍କ ସମ୍ମୁଖରେ ଜନ୍ମଦିନର ଅଭିନନ୍ଦନ ଗୀତ ଗାଇଥିଲେ। ତା’ପରେ ହଠାତ୍ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଭାବପ୍ରବଣ ହୋଇଗଲେ ଏବଂ ସେ ନିଜ ଲୁହକୁ ରୋକି ପାରିଲେ ନାହିଁ। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭାବପ୍ରବଣ ହେବାର ଦେଖି, ପଛରେ ଠିଆ ହୋଇଥିବା ସୁରକ୍ଷାକର୍ମୀ ତାଙ୍କୁ ଏକ ରୁମାଲ ଦେଇଥିଲେ।

#WATCH | Dehradun | President Droupadi Murmu gets emotional as the students of the National Institute for the Empowerment of Persons with Visual Disabilities extend birthday wishes to her with a song. pic.twitter.com/I8bfcJfYlq

— ANI (@ANI) June 20, 2025

ରାଷ୍ଟ୍ରପତି ଛାତ୍ରୀଛାତ୍ରଙ୍କୁ ସମ୍ବୋଧିତ କରି କହିଥିଲେ, ମୋ ଜନ୍ମଦିନ ଅବସରରେ ମୁଁ ଏଠାକୁ ଆସି ବହୁତ ଖୁସି। ଯେତେବେଳେ ମୁଁ ପିଲାମାନଙ୍କୁ ଗୀତ ଗାଉଥିବାର ଦେଖୁଥିଲି, ମୋ ଆଖିରୁ ଲୁହ ବନ୍ଦ ହେଉନଥିଲା। ଏହି ପିଲାମାନେ ସେମାନଙ୍କ କଣ୍ଠରୁ ନୁହେଁ, ହୃଦୟରୁ ଗୀତ ଗାଉଥିଲେ। ମୁଁ ଅନୁଭବ କରୁଛି ଯେ ସରସ୍ୱତୀ ସେମାନଙ୍କ କଣ୍ଠରେ ବସିଛନ୍ତି।କୁହାଯାଏ ଯେ ଯଦି ଭଗବାନ କାହାର ଶରୀରରେ କିଛି ଅଭାବ ଦିଅନ୍ତି, ତେବେ ସେ ତାଙ୍କୁ ଏପରି ପ୍ରତିଭା ଦିଅନ୍ତି ଯାହା ତାଙ୍କୁ ଅନ୍ୟମାନଙ୍କଠାରୁ ଭିନ୍ନ କରିଥାଏ।