ଅଳ୍ପକେ ବର୍ତ୍ତିଗଲେ ଇରାନୀ ରାଷ୍ଟ୍ରପତି ପେଜେସ୍କିଆନ, ନସରାଲ୍ଲାଙ୍କ ଶୈଳୀରେ ଆକ୍ରମଣ କରିଥିଲା ଇସ୍ରାଏଲ….

ନୂଆଦିଲ୍ଲୀ: ଇରାନ ସହିତ ୧୨ ଦିନିଆ ଯୁଦ୍ଧ ସମୟରେ, ଇସ୍ରାଏଲ ଇରାନୀ ରାଷ୍ଟ୍ରପତି ଡକ୍ଟର ମାସୁଦ ପେଜେସ୍କିଆନଙ୍କ ଉପରେ ଏକ ବଡ଼ ଆକ୍ରମଣ କରିଥିଲା। କିନ୍ତୁ ସୌଭାଗ୍ୟବଶତଃ ସେ ଏହି ଆକ୍ରମଣରୁ ସାମାନ୍ୟ ଆଘାତ ପାଇ ବଞ୍ଚିଯାଇଥିଲେ । ଇସ୍ରାଏଲୀ ସେନା ଏହି ଆକ୍ରମଣ ସେହି ଶୈଳୀରେ କରିଥିଲା ଯେପରି ତେହେରାନରେ ହିଜବୋଲ୍ଲା ମୁଖ୍ୟ ହାସନ ନସରାଲ୍ଲାଙ୍କୁ ହତ୍ୟା କରାଯାଇଥିଲା । ଇରାନୀ ରିଭୋଲ୍ୟୁସନାରୀ ଗାର୍ଡ କର୍ପସ (ଆଇଆରଜିସି) ସହିତ ଜଡିତ ଫାର୍ସ ନ୍ୟୁଜ୍ ଏଜେନ୍ସି ଏହି ଦାବି କରିଛି।

ଏହି ରିପୋର୍ଟରେ କୁହାଯାଇଛି ଯେ ଏହି ଆକ୍ରମଣ ଜୁନ୍ ୧୬ରେ କରାଯାଇଥିଲା, ଯେଉଁଥିରେ ଇରାନର ରାଷ୍ଟ୍ରପତି ମାସୁଦ ପେଜେସ୍କିଆନ୍ ସାମାନ୍ୟ ଆହତ ହୋଇଥିଲେ। ରିପୋର୍ଟ ଅନୁଯାୟୀ, ଇରାନର ସର୍ବୋଚ୍ଚ ଜାତୀୟ ସୁରକ୍ଷା ପରିଷଦ ବୈଠକ କରୁଥିବା ତେହେରାନର ପଶ୍ଚିମ ଭାଗରେ ଏକ କୋଠା ଉପରେ ଇସ୍ରାଏଲୀ କ୍ଷେପଣାସ୍ତ୍ର ପଡ଼ିବାରୁ ରାଷ୍ଟ୍ରପତି ପେଜେସ୍କିଆନଙ୍କ ଗୋଡ଼ରେ ଆଘାତ ଲାଗିଥିଲା। ରାଷ୍ଟ୍ରପତିଙ୍କ ସହିତ, ସଂସଦର ବାଚସ୍ପତି ମହମ୍ମଦ ବାକିର ଗାଲିବାଫ୍, ନ୍ୟାୟପାଳିକା ମୁଖ୍ୟ ମୋହସାନି ଏଜେଇ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ମଧ୍ୟ ଏହି ବୈଠକରେ ଉପସ୍ଥିତ ଥିଲେ ।

ଇସ୍ରାଏଲୀ ସେନା ଏହି ଅପରେସନକୁ ସମାନ ଶୈଳୀରେ କରିଥିଲା, ଯେଉଁ ଶୈଳୀରେ ଏହା ହିଜବୋଲ୍ଲା ନେତା ହାସନ ନସରାଲ୍ଲାଙ୍କୁ ହତ୍ୟା କରିଥିଲା। ଏହି ଆକ୍ରମଣରେ, ୬ଟି କ୍ଷେପଣାସ୍ତ୍ର କୋଠାର ପ୍ରବେଶ ଏବଂ ପ୍ରସ୍ଥାନ ପଥକୁ ଟାର୍ଗେଟ କରିଥିଲା ଯାହା ଫଳରେ ପଳାୟନ ପଥ ବନ୍ଦ ହୋଇପାରିବ ଏବଂ ବାୟୁମଣ୍ଡଳର ପ୍ରବାହ ବାଧାପ୍ରାପ୍ତ ହୋଇପାରିବ। ଇରାନୀ ଅଧିକାରୀମାନେ କୋଠାର ତଳ ମହଲାରେ ଉପସ୍ଥିତ ଥିଲେ। ବିସ୍ଫୋରଣ ପରେ ବିଦ୍ୟୁତ୍ ବିଚ୍ଛିନ୍ନ କରାଯାଇଥିଲା, କିନ୍ତୁ ସମସ୍ତ ଅଧିକାରୀ ପୂର୍ବରୁ ପ୍ରସ୍ତୁତ ଏକ ଜରୁରୀକାଳୀନ ପ୍ରସ୍ଥାନ ପଥ ଦେଇ ସୁରକ୍ଷିତ ଭାବରେ ବାହାରକୁ ବାହାରି ଆସିବାରେ ସଫଳ ହୋଇଥିଲେ।

ଆକ୍ରମଣ ସମୟରେ, କ୍ଷେପଣାସ୍ତ୍ର ଆକ୍ରମଣ ପରେ କୋଠାରୁ ବାହାରକୁ ଆଣିବା ସମୟରେ ରାଷ୍ଟ୍ରପତି ପେଜେସ୍କିଆନ ଏବଂ ଅନ୍ୟ କିଛି ଅଧିକାରୀ ସାମାନ୍ୟ ଆହତ ହୋଇଥିଲେ। ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଇରାନୀ ଅଧିକାରୀମାନେ ଏବେ ଏହି ଆକ୍ରମଣ ବିଷୟରେ ସଠିକ୍ ସୂଚନା ଲିକ୍ ହେବା ପଛରେ ଜଣେ ଭିତର ବ୍ୟକ୍ତିଙ୍କ ଭୂମିକା ତଦନ୍ତ କରୁଛନ୍ତି। ରାଷ୍ଟ୍ରପତି ପେଜେସ୍କିଆନ୍ ପୂର୍ବରୁ ଇସ୍ରାଏଲକୁ ହତ୍ୟା ଷଡ଼ଯନ୍ତ୍ର କରୁଥିବାର ଅଭିଯୋଗ କରିଥିଲେ। ସେ ଟକର କାର୍ଲସନଙ୍କୁ ଏକ ସାକ୍ଷାତକାରରେ କହିଥିଲେ, ହଁ, ସେମାନେ ଚେଷ୍ଟା କରିଥିଲେ… ସେମାନେ ଯୋଜନା ଅନୁସାରେ କାମ କରିଥିଲେ, କିନ୍ତୁ ବିଫଳ ହୋଇଥିଲେ।

ତେବେ ଇରାନ ଇଣ୍ଟରନ୍ୟାସନାଲର ରିପୋର୍ଟ ଅନୁସାରେ, ଜୁନ୍ ୧୬ ତାରିଖରେ ଇସ୍ରାଏଲ ତେହେରାନର ପଶ୍ଚିମ ଅଞ୍ଚଳ ‘ଶାରକ-ଏ-ଘର୍ବ’ରେ ଆକ୍ରମଣ କରିଥିଲା। ରିପୋର୍ଟ ଅନୁଯାୟୀ, ୧୨ ଦିନିଆ ଯୁଦ୍ଧ ସମୟରେ ଇସ୍ରାଏଲୀ ସେନା ଇରାନ ରିଭୋଲ୍ୟୁସନାରୀ ଗାର୍ଡ କୋର୍ପସ (ଆଇଆରଜିସି) ଏବଂ ପରମାଣୁ ବୈଜ୍ଞାନିକମାନଙ୍କୁ ଟାର୍ଗେଟ କରିଥିଲେ ଏବଂ ଅନେକଙ୍କୁ ହତ୍ୟା କରିଥିଲେ। ନିହତ ବରିଷ୍ଠ ଅଧିକାରୀଙ୍କ ମଧ୍ୟରେ ଆଇଆରଜିସି କମାଣ୍ଡର ହୁସେନ ସଲାମି, ଇରାନ ସଶସ୍ତ୍ର ବାହିନୀ ମୁଖ୍ୟ ମହମ୍ମଦ ବାଘେରି, ଆଇଆରଜିସି ବାୟୁସେନା କମାଣ୍ଡର ଆମିର ଅଲି ହାଜିଜାଦେହ ଏବଂ ଅନ୍ୟାନ୍ୟ ବରିଷ୍ଠ ସାମରିକ ଅଧିକାରୀ ଥିଲେ।

ଏମିତିକି ଇସ୍ରାଏଲ ଇରାନର ସର୍ବୋଚ୍ଚ ନେତା ଆୟତୁଲ୍ଲା ଅଲି ଖାମେନେଇଙ୍କୁ ହତ୍ୟା କରିବାକୁ ମଧ୍ୟ ଯୋଜନା କରିଥିଲା, କିନ୍ତୁ ସଠିକ୍ ସୁଯୋଗ ମିଳିନଥିଲା, ତେଣୁ ଆକ୍ରମଣକୁ ସ୍ଥଗିତ ରଖାଯାଇଥିଲା। ତଥାପି, ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଥିଲେ ଯେ ତାଙ୍କ ପ୍ରୟାସ ଯୋଗୁଁ ଖାମେନେଇଙ୍କ ଜୀବନ ରକ୍ଷା ପାଇଥିଲା, ଯଦି ଆମେରିକା ବନ୍ଦ କରିନଥାନ୍ତା ତେବେ ଇସ୍ରାଏଲ ଖାମେନେଇଙ୍କୁ ହତ୍ୟା କରିଥାନ୍ତା।