ନୂଆଦିଲ୍ଲୀ: ଶନିବାର ପ୍ରତ୍ୟୁଷରେ ସିରିଆ ଏବଂ ଇସ୍ରାଏଲ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ଯୁଦ୍ଧବିରତି ଚୁକ୍ତି ହୋଇଛି। ଏହି ଚୁକ୍ତିନାମା ଆମେରିକାର ରାଷ୍ଟ୍ରଦୂତ ଟମ୍ ବାରାକ୍ ଘୋଷଣା କରିଛନ୍ତି । ଦକ୍ଷିଣ ସିରିଆର ସୁୱାଇଦା ପ୍ରଦେଶରେ ଡ୍ରୁଜ୍ ସଂଖ୍ୟାଲଘୁ ଏବଂ ବେଦୁଇନ୍ ଜନଜାତି ମଧ୍ୟରେ ଚାଲିଥିବା ହିଂସାତ୍ମକ ସଂଘର୍ଷ ପରେ ଏହି ଚୁକ୍ତିନାମା ହୋଇଛି । ମିଳିଥିବା ରିପୋର୍ଟ ଅନୁଯାୟୀ, ଏହି ସଂଘର୍ଷରେ ଶହ ଶହ ଲୋକ ପ୍ରାଣ ହରାଇଥିଲେ ଏବଂ ହଜାର ହଜାର ଲୋକ ବାସହୀନ ହୋଇଯାଇଥିଲେ । ଏହି ଚୁକ୍ତିନାମାକୁ ତୁର୍କୀ, ଜୋର୍ଡାନ ଏବଂ ଅନ୍ୟାନ୍ୟ ପଡ଼ୋଶୀ ଦେଶ ସମର୍ଥନ କରିଛନ୍ତି, ଯାହା ଏହି ଅଞ୍ଚଳରେ ଶାନ୍ତି ଏବଂ ପ୍ରଗତି ପାଇଁ ଆଶା ସୃଷ୍ଟି କରିଛି ।
ଟମ୍ ବାରାକ୍ ଏନେଇ ନିଜ ସୋସିଆଲ ପ୍ଲାଟଫର୍ମ ଏକ୍ସରେ ତାଙ୍କ ବିବୃତ୍ତିରେ କହିଛନ୍ତି, ଡ୍ରୁଜ୍, ବେଦୁଇନ୍ ଏବଂ ସୁନ୍ନି ସମ୍ପ୍ରଦାୟକୁ ଅସ୍ତ୍ର ଛାଡି ଅନ୍ୟ ସଂଖ୍ୟାଲଘୁଙ୍କ ସହିତ ମିଶି ଏକ ନୂତନ, ଏକତା ସିରିଆ ଗଠନ କରିବାକୁ ନିବେଦନ କରାଯାଉଛି, ଯାହା ତାଙ୍କ ପଡ଼ୋଶୀମାନଙ୍କ ସହିତ ଶାନ୍ତି ଏବଂ ସମୃଦ୍ଧିରେ ବାସ କରେ । ତଥାପି, ସେ ଚୁକ୍ତିନାମାର କୌଣସି ବିବରଣୀ ଉଲ୍ଲେଖ କରିନାହାଁନ୍ତି ।
ତେବେ କହିରଖୁଛୁ ଯେ, ରବିବାର ଠାରୁ ସୁୱାଇଦାରେ ଡ୍ରୁଜ୍ ମିଲିସିଆ ଏବଂ ସ୍ଥାନୀୟ ସୁନ୍ନି ବେଦୁଇନ୍ ଜନଜାତି ମଧ୍ୟରେ ସଂଘର୍ଷ ଚାଲିଥିଲା, ଯାହା ପରେ ଶାନ୍ତି ଫେରାଇ ଆଣିବା ନାମରେ ସିରିଆ ସେନା ଏଥିରେ ଡେଇଁ ପଡ଼ିଥିଲା କିନ୍ତୁ ଏହା ବେଦୁଇନ୍ ଗୋଷ୍ଠୀଗୁଡ଼ିକୁ ସମର୍ଥନ କରୁଥିବା ଦେଖାଯାଇଥିଲା । ଜବାବରେ, ଇସ୍ରାଏଲ ଡ୍ରୁଜ୍ ସମ୍ପ୍ରଦାୟକୁ ସୁରକ୍ଷା ଦେବା ପାଇଁ ସିରିଆ ସେନା ଉପରେ ଏକ ବିମାନ ଆକ୍ରମଣ କରିଥିଲା।
ଇସ୍ରାଏଲରେ ଡ୍ରୁଜ୍ ସମ୍ପ୍ରଦାୟକୁ ଏକ ବିଶ୍ୱସ୍ତ ସଂଖ୍ୟାଲଘୁ ବୋଲି ବିବେଚନା କରାଯାଏ, ଯାହା ପ୍ରାୟତଃ ସେଠାକାର ସେନାରେ ବହୁ ସଂଖ୍ୟାରେ ଅନ୍ତର୍ଭୁକ୍ତ ହୋଇଥାଏ। ଏହି ସଂଘର୍ଷରେ ଶହ ଶହ ଲୋକ ପ୍ରାଣ ହରାଇଥିଲେ ଏବଂ ସରକାରୀ ବାହିନୀ ଉପରେ ଡ୍ରୁଜ୍ ସାଧାରଣ ଲୋକଙ୍କୁ ହତ୍ୟା କରିବା, ଲୁଟପାଟ କରିବା ଏବଂ ଘର ପୋଡ଼ି ଦେବାର ଅଭିଯୋଗ ଆସିଥିଲା। ଜାତିସଂଘ ଅନୁଯାୟୀ, ରବିବାର ଠାରୁ ପ୍ରାୟ ୮୦ ହଜାର ଲୋକ ବାସହୀନ ହୋଇଛନ୍ତି। ସୁୱେଡାରେ ପାଣି, ବିଦ୍ୟୁତ୍ ଏବଂ ଯୋଗାଯୋଗ ସେବା ବନ୍ଦ ରହିଛି, ଯେତେବେଳେ ସ୍ୱାସ୍ଥ୍ୟ ସେବା ଉପରେ ପ୍ରବଳ ଚାପ ପଡ଼ିଛି। ବୁଧବାର ଦିନ, ଆମେରିକା, ତୁର୍କୀ ଏବଂ ଆରବ ଦେଶଗୁଡ଼ିକର ମଧ୍ୟସ୍ଥତାରେ ଏକ ଚୁକ୍ତି ହୋଇଥିଲା, ଯାହା ଅନୁଯାୟୀ ଡ୍ରୁଜ୍ ସମ୍ପ୍ରଦାୟ ଏବଂ ସେମାନଙ୍କର ଧାର୍ମିକ ନେତାମାନେ ସୁୱେଡାରେ ଆଭ୍ୟନ୍ତରୀଣ ସୁରକ୍ଷା ଦାୟିତ୍ୱ ନେବାକୁ ଏବଂ ସରକାରୀ ବାହିନୀ ସେଠାରୁ ପ୍ରତ୍ୟାହାର କରିବାକୁ କହିଥିଲେ। କିନ୍ତୁ ଗୁରୁବାର ବିଳମ୍ବିତ ରାତିରେ ଡ୍ରୁଜ୍ ଏବଂ ବେଦୁଇନ୍ ଗୋଷ୍ଠୀ ମଧ୍ୟରେ ପୁଣି ସଂଘର୍ଷ ଆରମ୍ଭ ହୋଇଥିଲା।
Comments are closed.