ଲଣ୍ଡନ: ଇଂଲଣ୍ଡ ବିପକ୍ଷ ପଞ୍ଚମ ଟେଷ୍ଟ ପୂର୍ବରୁ ଓଭାଲରେ ଭାରତୀୟ ଦଳର ମୁଖ୍ୟ କୋଚ୍ ଗୌତମ ଗମ୍ଭୀରଙ୍କ ସହ ପିଚ୍ କ୍ୟୁରେଟର ଲି ଫୋର୍ଟିସଙ୍କ ଝଗଡା ହୋଇଛି। ଫୋର୍ଟିସ ଗମ୍ଭୀରଙ୍କ ବିରୋଧରେ ଅଭିଯୋଗ କରିବାକୁ ଧମକ ଦେଇଥିଲେ। ପରେ ସେ କହିଛନ୍ତି, ଏହି ମାମଲାକୁ ଆଗକୁ ନେବେ ନାହିଁ। କିନ୍ତୁ ଯଦି ଅଭିଯୋଗ ହୁଏ, ତେବେ ଗମ୍ଭୀରଙ୍କୁ ଆଇସିସି ନିୟମ ଅନୁଯାୟୀ କ’ଣ ଦଣ୍ଡ ମିଳିପାରେ?
ଯଦି ଗୌତମ ଗମ୍ଭୀରଙ୍କୁ ଲି ଫୋର୍ଟିସଙ୍କ ସହ ଝଗଡା ମାମଲାରେ ଦୋଷୀ ସାବ୍ୟସ୍ତ ହୁଅନ୍ତି, ତେବେ ଆଇସିସି ଆଚାର ସଂହିତା ଅନୁଯାୟୀ ସେ ଦଣ୍ଡିତ ହୋଇପାରନ୍ତି। ଦଣ୍ଡର ପରିମାଣ ନିୟମ ଉଲ୍ଲଂଘନର ଗମ୍ଭୀରତା ଉପରେ ନିର୍ଭର କରେ। ଯଦି ଉଲ୍ଲଂଘନ ସାମାନ୍ୟ ହୁଏ, ତେବେ ଗମ୍ଭୀରଙ୍କୁ ଔପଚାରିକ ଚେତାବନୀ ଦିଆଯାଇପାରେ। ଯଦି ଗମ୍ଭୀର ହୁଏ, ତେବେ ତାଙ୍କ ମ୍ୟାଚ ଫି’ କଟାଯାଇପାରେ। ଗମ୍ଭୀରଙ୍କ ଆକ୍ରମଣାତ୍ମକ ଆଚରଣ ଓ ଅପଶବ୍ଦ ବ୍ୟବହାର ପାଇଁ ଜୋରିମାନା ଲାଗିପାରେ।
ଯଦି ଆଇସିସି ଏହାକୁ ଲେଭେଲ ୨ କିମ୍ବା ଲେଭେଲ ୩ ଉଲ୍ଲଂଘନ ଭାବେ ଗଣେ, ତେବେ ଗମ୍ଭୀରଙ୍କୁ ଗୋଟିଏ କିମ୍ବା ଅଧିକ ଟେଷ୍ଟ, ଦିନିକିଆ କିମ୍ବା ଟି୨୦ ମ୍ୟାଚରୁ ନିଷିଦ୍ଧ କରାଯାଇପାରେ। ଯଦି ଫୋର୍ଟିସ ଇସିବି ପାଖରେ ଅଭିଯୋଗ କରନ୍ତି, ତେବେ ଆଇସିସି ଅନୁଶାସନ କମିଟି ତଦନ୍ତ କରିବ। ଗମ୍ଭୀର, ଫୋର୍ଟିସ ଓ ଅନ୍ୟ ସାକ୍ଷୀଙ୍କ ବୟାନ ନିଆଯିବ। ତା’ପରେ ଦଣ୍ଡବିଧାନ ନିଷ୍ପତ୍ତି ନିଆଯିବ।
ଓଭାଲରେ ଅଭ୍ୟାସ ବେଳେ ଗମ୍ଭୀର ଓ ଫୋର୍ଟିସଙ୍କ ମଧ୍ୟରେ ଝଗଡା ହୋଇଥିଲା। ଭାରତୀୟ ବ୍ୟାଟିଂ କୋଚ୍ ସିତାଂଶୁ କୋଟକଙ୍କ ଅନୁଯାୟୀ, ଫୋର୍ଟିସ ଭାରତୀୟ ସପୋର୍ଟ ଷ୍ଟାଫଙ୍କୁ ଚିତ୍କାର କରି ୨.୫ ମିଟର ଦୂରରେ ରହିବାକୁ କହିଥିଲେ। ଏହାକୁ ନେଇ ଗମ୍ଭୀର ରାଗିଯାଇଥିଲେ। ଗମ୍ଭୀର ଫୋର୍ଟିସଙ୍କୁ ‘ଜଷ୍ଟ ଏ ଗ୍ରାଉଣ୍ଡସମ୍ୟାନ’ ବୋଲି କହି ଅପଶବ୍ଦ ବ୍ୟବହାର କରିଥିବା ଅଭିଯୋଗ। ଫୋର୍ଟିସ ଇଂଲଣ୍ଡ କୋଚ୍ ବ୍ରେଣ୍ଡନ ମ୍ୟାକକୁଲମଙ୍କୁ ପିଚ୍ ଦେଖିବାକୁ ଅଟକାଇ ନଥିଲେ, କିନ୍ତୁ ଭାରତୀୟ ଷ୍ଟାଫଙ୍କ ସହ ଖରାପ ବ୍ୟବହାର କରିଥିଲେ। ଇରଫାନ ପଠାନ ଓ ଆକାଶ ଚୋପ୍ରା ଏହି ଘଟଣାକୁ ନେଇ ପ୍ରଶ୍ନ ଉଠାଇଛନ୍ତି।
Comments are closed.