ଟ୍ରମ୍ପଙ୍କ ଶୁଳ୍କ ଧମକ ଭିତରେ ରେପୋ ହାରକୁ ଅପରିବର୍ତ୍ତିତ ରଖିଲା ଆରବିଆଇ, ହାର ୫.୫%ରେ ସ୍ଥିର….

ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ (RBI) ଗଭର୍ଣ୍ଣର ସଞ୍ଜୟ ମଲୋହୋତ୍ରା ଆଜି, ୪ ଅଗଷ୍ଟରୁ ଆରମ୍ଭ ହୋଇଥିବା ମୁଦ୍ରା ନୀତି କମିଟି (MPC) ବୈଠକରେ ନିଆଯାଇଥିବା ନିଷ୍ପତ୍ତି ଘୋଷଣା କରିଛନ୍ତି । ଭାରତୀୟ ରିଜର୍ଭ ବ୍ୟାଙ୍କ ରେପୋ ହାରକୁ ୫.୫ ପ୍ରତିଶତରେ ସ୍ଥିର ରଖିବାକୁ ନିଷ୍ପତ୍ତି ନେଇଛି । ଏଥର ଆରବିଆଇ ଗଭର୍ଣ୍ଣର ରେପୋ ହାରରେ କୌଣସି ପରିବର୍ତ୍ତନ ଘୋଷଣା କରିନାହାଁନ୍ତି । ଟ୍ରମ୍ପଙ୍କ ୨୫ ପ୍ରତିଶତ ଶୁଳ୍କ ଧମକ ମଧ୍ୟରେ ଏହି ଘୋଷଣା କରିଛି ଆରବିଆଇ । ପୂର୍ବରୁ ଏହି ବର୍ଷ ରେପୋ ହାର ୧ ପ୍ରତିଶତ ହ୍ରାସ କରିସାରିଛି ଆରବିଆଇ । କେନ୍ଦ୍ରୀୟ ବ୍ୟାଙ୍କ ଚଳିତ ବର୍ଷ ଫେବୃଆରୀ, ଏପ୍ରିଲ ଏବଂ ଜୁନରେ ମଧ୍ୟ ରେପୋ ହାର ହ୍ରାସ କରିଥିଲା । RBI ଫେବୃଆରୀରେ ୦.୨୫ ପ୍ରତିଶତ, ଏପ୍ରିଲରେ ୦.୨୫ ପ୍ରତିଶତ ଏବଂ ପରେ ଜୁନରେ ୦.୫୦ ପ୍ରତିଶତ ହ୍ରାସ କରିଥିଲା ।

ସଞ୍ଜୟ ମାଲହୋତ୍ରା କହିଛନ୍ତି ଯେ ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି ମୁଦ୍ରା ନୀତି କମିଟି ରେପୋ ହାରକୁ ସ୍ଥିର ରଖିବାକୁ ନିଷ୍ପତ୍ତି ନେଇଛି। ଆରବିଆଇ ଚଳିତ ଆର୍ଥିକ ବର୍ଷ ପାଇଁ ଖୁଚୁରା ମୁଦ୍ରାସ୍ଫୀତି ହାର ପୂର୍ବାନୁମାନକୁ ୩.୧ ପ୍ରତିଶତକୁ ହ୍ରାସ କରିଛି, ଯେତେବେଳେ ପୂର୍ବରୁ ଏହା ୩.୭ ପ୍ରତିଶତ ହେବ ବୋଲି ଆକଳନ କରାଯାଇଥିଲା। ଗଭର୍ଣ୍ଣର କହିଛନ୍ତି ଯେ ରେପୋ ହାରରେ ୧ ପ୍ରତିଶତ ହ୍ରାସର ପ୍ରଭାବ ଏପର୍ଯ୍ୟନ୍ତ ସମ୍ପୂର୍ଣ୍ଣ ଭାବରେ ଦେଖାଯାଇ ନାହିଁ । ଏହା ବ୍ୟତୀତ, ମୁଦ୍ରା ନୀତି କମିଟି ମଧ୍ୟ ଏହାର ନିରପେକ୍ଷ ମନୋଭାବ ବଜାୟ ରଖିବାକୁ ନିଷ୍ପତ୍ତି ନେଇଛି।

ଏମପିସି କହିଛି ଯେ, ମୁଦ୍ରାସ୍ଫୀତି ପୂର୍ବ ଆକଳନ ଅପେକ୍ଷା ବହୁତ କମ୍ ଅଛି, କିନ୍ତୁ ଏହାର ମୁଖ୍ୟ କାରଣ ହେଉଛି ଖାଦ୍ୟ ମୂଲ୍ୟରେ ଅସ୍ଥିରତା। ଏହି ଆର୍ଥିକ ବର୍ଷର ଶେଷ ତ୍ରୈମାସିକରୁ ମୁଦ୍ରାସ୍ଫୀତି ବୃଦ୍ଧି ପାଇବାର ଆଶା କରାଯାଉଛି। ଆମର ପୂର୍ବ ଆକଳନ ଅନୁଯାୟୀ, ଅଭିବୃଦ୍ଧି ହାର ଦୃଢ଼ ରହିଛି। ଶୁଳ୍କ ଅନିଶ୍ଚିତତା ଏବେ ବି ଦେଖାଯାଉଛି। ମାକ୍ରୋ ଅର୍ଥନୈତିକ ପରିସ୍ଥିତିକୁ ଦୃଷ୍ଟିରେ ରଖି, ରେପୋ ହାରକୁ ୫.୫% ରେ ରଖିବା ଆବଶ୍ୟକ।

ଏଥିସହିତ ଆରବିଆଇ ଗଭର୍ଣ୍ଣର କହିଛନ୍ତି ଯେ ଦେଶରେ ମୌସୁମୀ ଭଲ ଭାବରେ ଅଗ୍ରଗତି କରୁଛି, ଯାହା ଅର୍ଥନୀତିକୁ ତ୍ୱରାନ୍ୱିତ କରିବ। ଏହା ସହିତ, ଭାରତୀୟ ରିଜର୍ଭ ବ୍ୟାଙ୍କ ଏସଡିଏଫ (ସ୍ଥାୟୀ ଜମା ସୁବିଧା) ହାରକୁ ୫.୨୫ ପ୍ରତିଶତରେ ସ୍ଥିର ରଖିବାର ଘୋଷଣା କରିଛି। ଏହା ବ୍ୟତୀତ, କୌଣସି ପରିବର୍ତ୍ତନ ବିନା ଏମଏସଏଫ (ମାର୍ଜିନାଲ୍ ଷ୍ଟାଣ୍ଡିଂ ସୁବିଧା) ହାରକୁ ୫.୭୫ ପ୍ରତିଶତରେ ସ୍ଥିର ରଖିବାର ନିଷ୍ପତ୍ତି ନିଆଯାଇଛି ।

ଆରବିଆଇ ଚଳିତ ଆର୍ଥିକ ବର୍ଷ ୨୦୨୫-୨୬ ପାଇଁ ଜିଡିପି ଅଭିବୃଦ୍ଧି ପୂର୍ବାନୁମାନକୁ ୬.୫ ପ୍ରତିଶତରେ ବଜାୟ ରଖିଛି । ଆରବିଆଇ ଗଭର୍ଣ୍ଣର କହିଛନ୍ତି ଯେ ଉଭୟ ପାର୍ଶ୍ୱରେ ବିପଦ ସନ୍ତୁଳିତ ଏବଂ ଭୂରାଜନୈତିକ ଉତ୍ତେଜନା ବାଧା ସୃଷ୍ଟି କରିପାରେ । ସେ କହିଛନ୍ତି ଯେ ଶିଳ୍ପ କ୍ଷେତ୍ରର ଅଭିବୃଦ୍ଧି ମନ୍ଥର ଏବଂ ଅସମାନ ।