Modi-Trump: ଟ୍ରମ୍ପଙ୍କୁ ଭେଟିବାକୁ ଚାହୁଁନାହାଁନ୍ତି ମୋଦି!, ଏଥର UNGAରେ ଦେବେନି ଯୋଗ, ଭାରତକୁ ପ୍ରତିନିଧିତ୍ୱ କରିବେ….

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଥର ମିଳିତ ଜାତିସଂଘ ସାଧାରଣ ପରିଷଦ (UNGA)ର ୮୦ ତମ ଅଧିବେଶନର ଉଚ୍ଚସ୍ତରୀୟ ସାଧାରଣ ବିତର୍କରେ ଯୋଗଦେବେ ନାହିଁ। ଶୁକ୍ରବାର ପ୍ରକାଶିତ ସଂଶୋଧିତ ଅସ୍ଥାୟୀ ତାଲିକା ଅନୁଯାୟୀ, ବିଦେଶ ମନ୍ତ୍ରୀ ଏସ. ଜୟଶଙ୍କର ଭାରତ ପକ୍ଷରୁ ସେପ୍ଟେମ୍ବର ୨୭ ତାରିଖରେ ବିଶ୍ୱ ନେତାମାନଙ୍କୁ ସମ୍ବୋଧିତ କରିବେ। ପୂର୍ବ ତାଲିକାରେ କୁହାଯାଇଥିଲା ଯେ ପ୍ରଧାନମନ୍ତ୍ରୀ ମୋଦି ସେପ୍ଟେମ୍ବର ୨୬ ତାରିଖରେ ଭାଷଣ ଦେବେ, କିନ୍ତୁ ବର୍ତ୍ତମାନ ଏହାକୁ ପରିବର୍ତ୍ତନ କରାଯାଇଛି। ତେବେ ଏହି ବୈଠକକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ସମ୍ବୋଧିତ କରିବେ। ଆଉ ବର୍ତ୍ତମାନ ଆମେରିକାର ଶୁଳ୍କ ଚାପ ଯୋଗୁଁ ଭାରତ ସହିତ ଆମେରିକାର ତିକ୍ତତା ରହିଛି। କୁହାଯାଉଛି ଏଭଳି ସ୍ଥିତିରେ ପ୍ରଧାନମନ୍ତ୍ରୀ ମୋଦି, ଟ୍ରମ୍ପଙ୍କୁ ଭେଟିବାକୁ ଚାହୁଁନାହାଁନ୍ତି। ତେଣୁ ତାଙ୍କ ପରିବର୍ତ୍ତେ ଏବେ UNGA ରେ ଜୟଶଙ୍କର ପ୍ରତିନିଧିତ୍ଵ କରିବେ।

ଅପରପକ୍ଷେ ଏହି ବର୍ଷ ଫେବୃଆରୀରେ ପ୍ରଧାନମନ୍ତ୍ରୀ ମୋଦି ୱାଶିଂଟନରେ ରାଷ୍ଟ୍ରପତି ଟ୍ରମ୍ପଙ୍କୁ ଭେଟିଥିଲେ। ଯାହା ଉଭୟଙ୍କ ଶେଷ ସାକ୍ଷାତ ଥିଲା। ଏହାପରେ ଟ୍ରମ୍ପ ଭାରତ ଉପରେ ୫୦ ପ୍ରତିଶତ ପର୍ଯ୍ୟନ୍ତ ଶୁଳ୍କ ଲାଗୁ କରିଛନ୍ତି, ଯେଉଁଥିରେ ରୁଷରୁ ତେଲ କିଣିବା ଉପରେ ୨୫ ପ୍ରତିଶତ ଶୁଳ୍କ ମଧ୍ୟ ଅନ୍ତର୍ଭୁକ୍ତ। ଏଭଳି ସମୟରେ ଭାରତ ଏବଂ ଆମେରିକା ସମ୍ପର୍କ ଖରାପ ସ୍ଥିତିରେ ଅଛି। ଆଉ ଏହି UNGA ଅଧିବେଶନ ଏପରି ସମୟରେ ହେଉଛି ଯେତେବେଳେ ଇସ୍ରାଏଲ-ହମାସ୍ ଯୁଦ୍ଧ ଏବଂ ୟୁକ୍ରେନ ସଙ୍କଟ ଭଳି ବିଶ୍ୱସ୍ତରୀୟ ପ୍ରସଙ୍ଗ ଆଲୋଚନାରେ ରହିଛି। UNGAର ଅସ୍ଥାୟୀ ତାଲିକାରେ ପରିବର୍ତ୍ତନ ହେବାର ସମ୍ଭାବନା ସର୍ବଦା ରହିଥାଏ। ଉଚ୍ଚସ୍ତରୀୟ ସପ୍ତାହ ପାଖେଇ ଆସିବା ସହିତ, ବକ୍ତା ଏବଂ କାର୍ଯ୍ୟସୂଚୀରେ ଆହୁରି ପରିବର୍ତ୍ତନ ହୋଇପାରେ। ଏହା ବିଶ୍ୱାସ କରାଯାଉଛି ଯେ ଭାରତ ପକ୍ଷରୁ, ବୈଦେଶିକ ମନ୍ତ୍ରୀ ଜୟଶଙ୍କର ଏହି ମଞ୍ଚରେ ଦେଶର ପକ୍ଷ ଦୃଢ଼ ଭାବରେ ଉପସ୍ଥାପନ କରିବେ।

ତେବେ ଜାତିସଂଘ ସାଧାରଣ ପରିଷଦର ୮୦ ତମ ଅଧିବେଶନ ସେପ୍ଟେମ୍ବର ୯ ରେ ଆରମ୍ଭ ହେବ, ଯେତେବେଳେ ଉଚ୍ଚସ୍ତରୀୟ ସାଧାରଣ ବିତର୍କ ସେପ୍ଟେମ୍ବର ୨୩ ରୁ ୨୯ ପର୍ଯ୍ୟନ୍ତ ଚାଲିବ। ଟ୍ରମ୍ପଙ୍କ ଅଭିଭାଷଣ ୨୩ ସେପ୍ଟେମ୍ବରରେ ଅନୁଷ୍ଠିତ ହେବ। ଏହି ଅଧିବେଶନରେ, ବ୍ରାଜିଲ ପାରମ୍ପରିକ ଭାବରେ ପ୍ରଥମ ଭାଷଣ ଦେବେ, ଯାହା ପରେ ୨୩ ସେପ୍ଟେମ୍ବରରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ UNGA ପ୍ଲାଟଫର୍ମରୁ ଭାଷଣ ଦେବେ। ଦ୍ୱିତୀୟ ଥର ରାଷ୍ଟ୍ରପତି ହେବା ପରେ ଏହା UNGAରେ ଟ୍ରମ୍ପଙ୍କର ପ୍ରଥମ ଭାଷଣ ହେବ। ସେପ୍ଟେମ୍ବର ୨୬ ରେ ଇସ୍ରାଏଲ, ଚୀନ୍, ପାକିସ୍ତାନ ଏବଂ ବାଂଲାଦେଶର ଶୀର୍ଷ ନେତାମାନେ ସାଧାରଣ ବିତର୍କରେ ଭାଷଣ ଦେବେ। ଚଳିତ ବର୍ଷର ଅଧିବେଶନ ବିଶେଷ, କାରଣ ଏହା ଜାତିସଂଘର ୮୦ ବର୍ଷ ପାଳନ କରୁଛି। ‘ଏକତ୍ର ଉତ୍ତମ: ଶାନ୍ତି, ବିକାଶ ଏବଂ ମାନବାଧିକାର ପାଇଁ ୮୦ ବର୍ଷ ଏବଂ ଅଧିକ’ ଏଥରର ଅଧିବେଶନର ବିଷୟବସ୍ତୁ ରହିଛି।

ତେବେ କହିରଖୁଛୁ ସେପ୍ଟେମ୍ବର ମାସ ପ୍ରତିବର୍ଷ ଜାତିସଂଘ ମୁଖ୍ୟାଳୟରେ ସବୁଠାରୁ ବ୍ୟସ୍ତ ସମୟ। ଏହି ଥର ଅଧିବେଶନ ସମୟରେ ଅନେକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ। ସେପ୍ଟେମ୍ବର ୨୨ ତାରିଖରେ ଜାତିସଂଘର ୮୦ ତମ ବାର୍ଷିକୀ ପାଳନ ପାଇଁ ଏକ ସ୍ୱତନ୍ତ୍ର ବୈଠକ ହେବ। ଏହା ବ୍ୟତୀତ, ସେପ୍ଟେମ୍ବର ୨୪ ତାରିଖରେ ଜାତିସଂଘର ମହାସଚିବ ଆଣ୍ଟୋନିଓ ଗୁଟେରେସ୍ ଏକ ଜଳବାୟୁ ସମ୍ମିଳନୀର ଆୟୋଜନ କରିବେ, ଯେଉଁଠାରେ ବିଶ୍ୱ ନେତାମାନେ ସେମାନଙ୍କର ନୂତନ ଜାତୀୟ ଜଳବାୟୁ ଯୋଜନା ଉପସ୍ଥାପନ କରିବେ। ଏହି ବର୍ଷ ୧୯୯୫ ମସିହାରେ ବେଜିଂରେ ଅନୁଷ୍ଠିତ ଚତୁର୍ଥ ବିଶ୍ୱ ମହିଳା ସମ୍ମିଳନୀର ୩୦ ତମ ବାର୍ଷିକୀ ମଧ୍ୟ ପାଳନ କରାଯିବ। ଏହା ବ୍ୟତୀତ ଏହି ଅଧିବେଶନରେ ଆହୁରି ଅନେକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ।