IAIRO to Begin Operations from 1 January:ଏଠାରେ ଖୋଲିବ ଭାରତର ପ୍ରଥମ ଜାତୀୟ AI ଗବେଷଣା ପ୍ରତିଷ୍ଠାନ

ନୂଆଦିଲ୍ଲୀ:ଭାରତରେ କୃତ୍ରିମ ବୁଦ୍ଧିମତ୍ତା କ୍ଷେତ୍ରରେ ଗୁଜୁରାଟ ସରକାର ଏକ ବଡ଼ ପଦକ୍ଷେପ ନେବାକୁ ଯାଉଛନ୍ତି। ଗୁଜୁରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଘୋଷଣା କରିଛନ୍ତି ଯେ ଜାନୁଆରୀ ୧ ତାରିଖରେ GIFT Cityରେ ଭାରତୀୟ AI ଗବେଷଣା ପ୍ରତିଷ୍ଠାନ(IAIRO-Indian AI Research Organization) ଆରମ୍ଭ ହେବ। ଏହା ଦେଶର ପ୍ରଥମ ଜାତୀୟ ସ୍ତରୀୟ AI ଗବେଷଣା ପ୍ରତିଷ୍ଠାନ ହେବ, ଯାହା ଏକ ସରକାରୀ-ଘରୋଇ ସହଭାଗୀତା ମଡେଲ ଅଧୀନରେ ପ୍ରତିଷ୍ଠିତ ହେବ।

ଏହି ପଦକ୍ଷେପ ଭାରତରେ AI ଗବେଷଣା, ନବସୃଜନ ଏବଂ ନୀତି ନିର୍ଦ୍ଧାରଣକୁ ଏକ ନୂତନ ଦିଗଦର୍ଶନ ଦେବ ବୋଲି ଆଶା କରାଯାଉଛି।

ଗୁଜୁରାଟ ସରକାର, କେନ୍ଦ୍ର ସରକାର ଏବଂ ଶିଳ୍ପ ମଧ୍ୟରେ ଏକ ତ୍ରିପାକ୍ଷିକ ସହଭାଗୀତା ଅଧୀନରେ IAIRO ପ୍ରତିଷ୍ଠିତ ହେବ। ମୁଖ୍ୟମନ୍ତ୍ରୀ ଏହି ପ୍ରକଳ୍ପକୁ ନୀତିଗତ ଅନୁମୋଦନ ଦେଇଛନ୍ତି। ଏହି ମଡେଲ ମାଧ୍ୟମରେ, ସରକାର ଏବଂ ଘରୋଇ କ୍ଷେତ୍ର AI ଗବେଷଣାକୁ ଆଗକୁ ବଢ଼ାଇବା ପାଇଁ ସହଯୋଗ କରିବେ।

IAIROକୁ ଏକ ବହୁବିଧ AI ହବ୍ ଭାବରେ ବିକଶିତ କରାଯିବ। ଏହା ଉନ୍ନତ ଗବେଷଣା, AI ପ୍ରଡକ୍ଟ ଏବଂ ସମାଧାନର ବିକାଶ ଏବଂ ଷ୍ଟାର୍ଟଅପ୍ ଏବଂ ଶିକ୍ଷାନୁଷ୍ଠାନ ସହିତ ସହଯୋଗକୁ ପ୍ରୋତ୍ସାହିତ କରିବା ଉପରେ ଧ୍ୟାନ ଦେବ।

IAIROର ପ୍ରସ୍ତାବରେ ପ୍ରଥମ ପାଞ୍ଚ ବର୍ଷ ପାଇଁ ପ୍ରାୟ ତିନିଶହ କୋଟି ଟଙ୍କା ନିବେଶ ଅନ୍ତର୍ଭୁକ୍ତ। ଇଣ୍ଡିଆନ୍ ଫାର୍ମାସ୍ୟୁଟିକାଲ ଆଲାଏନ୍ସକୁ ପ୍ରମୁଖ ଘରୋଇ ଅଂଶୀଦାର ଭାବରେ ନିଯୁକ୍ତ କରାଯାଇଛି। IPA 2025-26 ରେ ପଚିଶ କୋଟି ଯୋଗଦାନ କରିବାକୁ ପ୍ରତିବଦ୍ଧ, ଯେଉଁଥିରେ Cipla, ଟୋରେଣ୍ଟ ଫାର୍ମା (Torrent Pharma)ଏବଂ ସନ୍ ଫାର୍ମା(Sun Pharma) ଭଳି ପ୍ରମୁଖ ଭାରତୀୟ କମ୍ପାନୀଗୁଡ଼ିକ ଅଂଶଗ୍ରହଣ କରିବେ।

ରାଜ୍ୟ ସରକାର AI-ଭିତ୍ତିକ ବିକାଶକୁ ତ୍ୱରାନ୍ୱିତ କରିବା ପାଇଁ ଏକ AI ଟାସ୍କ ଫୋର୍ସ ମଧ୍ୟ ଗଠନ କରିଛନ୍ତି। ଏହାର ଉଦ୍ଦେଶ୍ୟ ହେଉଛି ସ୍ୱାସ୍ଥ୍ୟସେବା, ଶିକ୍ଷା, କୃଷି ଏବଂ ଅନ୍ୟାନ୍ୟ ସାର୍ବଜନୀନ ସେବାରେ AI ବ୍ୟବହାର ମାଧ୍ୟମରେ ଲୋକଙ୍କ ଜୀବନର ମାନ ଉନ୍ନତ କରିବା।