ଖାମେନିଙ୍କ ଉପରେ ଆକ୍ରମଣକୁ ଇରାନ ସହିତ ‘ଯୁଦ୍ଧ’ ବୋଲି ବିବେଚନା କରାଯିବ: ଟ୍ରମ୍ପଙ୍କୁ ଇରାନ ରାଷ୍ଟ୍ରପତିଙ୍କ ଧମକ

ତେହେରାନ: ଟ୍ରମ୍ପଙ୍କୁ ନାଲି ଆଖି ଦେଖାଇଲେ ଇରାନ ରାଷ୍ଟ୍ରପତି। ଆମେରିକା ସହିତ ବୃଦ୍ଧି ପାଉଥିବା ଉତ୍ତେଜନା ମଧ୍ୟରେ, ଇରାନ ରାଷ୍ଟ୍ରପତି ମାସୁଦ ପେଜେସ୍କିଆନ ଚେତାବନୀ ଦେଇଛନ୍ତି। ମାସୁଦ ପେଜେସ୍କିଆନ ଚେତାବନୀ ଦେଇ କହିଛନ୍ତି ଯେ ଇସଲାମିକ ବିପ୍ଳବର ନେତା ଆୟତୋଲ୍ଲା ସେୟଦ ଅଲି ଖାମେନିଙ୍କ ଉପରେ ଯେକୌଣସି ଆକ୍ରମଣ ଇରାନ ରାଷ୍ଟ୍ର ସହିତ “ପୂର୍ଣ୍ଣ ଯୁଦ୍ଧ” ସହିତ ସମାନ ହେବ। ରବିବାର ତାଙ୍କ ଫେସବୁକ ଆକାଉଣ୍ଟରେ ଏକ ପୋଷ୍ଟରେ ପେଜେସ୍କିଆନ କହିଛନ୍ତି ଯେ ଆମେରିକା ଏବଂ ଏହାର ସହଯୋଗୀମାନଙ୍କ ଦ୍ୱାରା ଲାଗୁ କରାଯାଇଥିବା ଅମାନବୀୟ କଟକଣା ଇରାନ ଜନତା ସମ୍ମୁଖୀନ ହେଉଥିବା ଆର୍ଥିକ କଷ୍ଟର ଏକ ମୁଖ୍ୟ କାରଣ।

ଶନିବାର ଦିନ, ଆୟତୋଲ୍ଲା ଖାମେନି କହିଛନ୍ତି ଯେ ଇରାନ ସାମ୍ପ୍ରତିକ ଦଙ୍ଗାରେ ବିଦେଶୀ ଉପାଦାନମାନଙ୍କ ଦ୍ୱାରା ହୋଇଥିବା ହତ୍ୟା ଏବଂ ଧ୍ୱଂସ ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ମୁଖ୍ୟ ଦୋଷୀ ବୋଲି ଧରୁଛି। ନେତା କହିଛନ୍ତି ଯେ ଇରାନ ରାଷ୍ଟ୍ର ବିରୁଦ୍ଧରେ ନିର୍ଦ୍ଦେଶିତ ମୃତାହତ, କ୍ଷତି ଏବଂ ମିଥ୍ୟା ଅଭିଯୋଗ ପାଇଁ ଆମେରିକା ରାଷ୍ଟ୍ରପତି ଦାୟୀ ଏବଂ ଟ୍ରମ୍ପଙ୍କୁ ଜଣେ ଅପରାଧୀ ବୋଲି ଆଖ୍ୟା ଦେଇଛନ୍ତି।

ଇରାନ ଅଧିକାରୀମାନେ ବାରମ୍ବାର ଅଭିଯୋଗ କରିଆସୁଛନ୍ତି, ଦେଶରେ ଅଶାନ୍ତି ସୃଷ୍ଟି ପାଇଁ ଆମେରିକା ଓ ଇସ୍ରାଏଲ ଦାୟୀ।। ଇରାନ ଏବଂ ଆମେରିକା ମଧ୍ୟରେ ଉତ୍ତେଜନା ଯଥେଷ୍ଟ ବୃଦ୍ଧି ପାଇଛି। ଏହି ସମୟରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବାରମ୍ବାର ତେହେରାନ ବିରୋଧରେ ସାମରିକ କାର୍ଯ୍ୟାନୁଷ୍ଠାନ ପାଇଁ ଧମକ ଦେଉଛନ୍ତି। ସେ କହିଥିଲେ ଯଦି ତାଙ୍କ ପ୍ରଶାସନ ନିର୍ଣ୍ଣୟ କରିବ ଯେ, ଇସଲାମିକ ଗଣରାଜ୍ୟ ସରକାର ପ୍ରଦର୍ଶନକାରୀଙ୍କ ଉପରେ ମାରାତ୍ମକ ଶକ୍ତି ବ୍ୟବହାର କରୁଛି ତେବେ ଆମେରିକା ଚୁପ୍ ନରହି କାର୍ଯ୍ୟାନୁଷ୍ଠାନ ଗ୍ରହଣ କରିବ। ଟ୍ରମ୍ପଙ୍କ ବିଭିନ୍ନ ମନ୍ତବ୍ୟ ନେଇ ଇରାନ ରାଷ୍ଟ୍ରପତି ନାଲି ଆଖି ଦେଖାଇବା ସହିତ ପରିଣାମ ସମ୍ପର୍କରେ ଧମକ ଦେଇଛନ୍ତି।