ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଭାବେ ଶପଥ ନେଲେ ଦିବଙ୍ଗତ ଅଜିତ ପାୱାରଙ୍କ ପତ୍ନୀ ସୁନେତ୍ର

ମୁମ୍ବାଇ: ଦିବଙ୍ଗତ ଏନସିପି ମୁଖ୍ୟ ଅଜିତ ପାୱାରଙ୍କ ମୃତ୍ୟୁ ପରେ ବିଧାନସଭା ଭବନରେ ଅନୁଷ୍ଠିତ ଏକ ବୈଠକରେ ସର୍ବସମ୍ମତି କ୍ରମେ ଦଳର ବିଧାୟକ ନେତା ଭାବରେ ସୁନେତ୍ର ପାୱାର ମହାରାଷ୍ଟ୍ରର ପ୍ରଥମ ମହିଳା ଉପମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି।

ସୁନେତ୍ର ପାୱାର ୨୦୨୪ ଲୋକସଭା ନିର୍ବାଚନ ପର୍ଯ୍ୟନ୍ତ ଜନସାଧାରଣଙ୍କ ଠାରୁ ଦୂରରେ ରହିଥିଲେ ଓ ସେହି ବର୍ଷ ବାରାମତିରୁ ଏନସିପି ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରିଥିଲେ।କିନ୍ତୁ ଏହି ନିର୍ବାଚନରେ ସେ ତାଙ୍କ ଭାଉଜ ତଥା ବର୍ତ୍ତମାନର ଏନସିପି (ସପା) ସାଂସଦ ସୁପ୍ରିୟା ସୁଲେଙ୍କ ଠାରୁ ପରାସ୍ତ ହୋଇଥିଲେ।

ତେବେ ସୁନେତ୍ର ଉପମୁଖ୍ୟମନ୍ତ୍ରୀ ଭାବେ ଶପଥ ନେବାପରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ କହିଛନ୍ତି ଯେ ଅଜିତ ପାୱାରଙ୍କ ପରିବାର ଏବଂ ଦଳ ଦ୍ୱାରା ନିଆଯାଇଥିବା ଯେକୌଣସି ନିଷ୍ପତ୍ତିକୁ ବିଜେପି ସମର୍ଥନ କରିବ। ତେବେ ଏନସିପି (ଏସପି) ମୁଖ୍ୟ ଶରଦ ପାୱାର ଏହି ଘଟଣାରୁ ନିଜକୁ ଦୂରେଇ ରଖିଛନ୍ତି ଓ ସୁନେତ୍ରଙ୍କ ଶପଥ ଗ୍ରହଣ ବିଷୟରେ ସେ ଗଣମାଧ୍ୟମରୁ ଜାଣିବାକୁ ପାଇଥିବା କହିଛନ୍ତି। ଏହି ନିଷ୍ପତ୍ତି ଏନସିପି ଦ୍ୱାରା ନିଆଯାଇଥାଇପାରେ ବୋଲି ମଧ୍ୟ ସେ କହିଛନ୍ତି।

ଅଜିତ ପାୱାର ଦୁଇଟି ଗୋଷ୍ଠୀକୁ ଏକତ୍ର କରିବାକୁ ଚାହୁଁଛନ୍ତି ଏବଂ ଏଥିପାଇଁ ସେ ପ୍ରୟାସ ଜାରି ରଖିଥିବା ମଧ୍ୟ କହିଛନ୍ତି।

ସୁନେତ୍ର ପାୱାର ଧାରାଶିବ ଜିଲ୍ଲାର ଅଟନ୍ତି ଓ ସେ ବରିଷ୍ଠ ଏନସିପି ନେତା ପଦ୍ମସିଂ ପାଟିଲଙ୍କ ଭଉଣୀ। ତେବେ ରାଜନୀତି ଏବଂ ସାମାଜିକ କାର୍ଯ୍ୟ ପ୍ରତି ତାଙ୍କର ଆଗ୍ରହ ତାଙ୍କ ପିତାଙ୍କଠାରୁ ଶିଖିଛନ୍ତି। ତାଙ୍କ ବାପା ଜଣେ ସ୍ୱାଧୀନତା ସଂଗ୍ରାମୀ ଏବଂ ଗାଁର ପ୍ରଭାବଶାଳୀ ବ୍ୟକ୍ତି ଥିଲେ ବୋଲି ସୁନେତ୍ର କହିଛନ୍ତି। ପଦ୍ମସିଂ ପାଟିଲ ଏବଂ ଶରଦ ପାୱାରଙ୍କ ମଧ୍ୟରେ ବନ୍ଧୁତା ଘନିଷ୍ଠ ଥିବାରୁ ସୁନେତ୍ର ଏବଂ ଅଜିତ ପାୱାରଙ୍କ ବିବାହ ସମ୍ଭବପର ହୋଇପାରିଥିଲା। ତେବେ ଉଭୟଙ୍କ ବିବାହ ୧୯୮୦ ମସିହାରେ ହେବା ପରେ ସେ ବାରାମତି ଚାଲିଯାଇଥିଲେ।