Andaman Boat Sink: ଆଣ୍ଡାମାନ ସାଗରରେ ବୁଡିଗଲା ଡଙ୍ଗା, ୨୫୦ ରୋହିଙ୍ଗ୍ୟା ନିଖୋଜ;ମାଲେସିଆ ଅଭିମୁଖେ ଯାତ୍ରା..
ନୂଆଦିଲ୍ଲୀ: ଆଣ୍ଡାମାନ ସାଗରରେ ରୋହିଙ୍ଗ୍ୟା ଶରଣାର୍ଥୀ ଏବଂ ବାଂଲାଦେଶୀ ନାଗରିକଙ୍କୁ ନେଇ ଯାଉଥିବା ଏକ ଡଙ୍ଗା ବୁଡ଼ିଯିବାରୁ ପ୍ରାୟ ୨୫୦ ଜଣ ନିଖୋଜ ଥିବା ଆଶଙ୍କା କରାଯାଉଛି । ଜାତିସଂଘ (ୟୁଏନ) ମଙ୍ଗଳବାର ଦିନ ସୂଚନା ଦେଇଛି ।
ଡଙ୍ଗାଟି ଦକ୍ଷିଣ ବାଂଲାଦେଶର ଟେକନାଫରୁ ମାଲେସିଆ ଅଭିମୁଖେ ଯାତ୍ରା କରିଥିଲା ବୋଲି ଜାତିସଂଘର ଶରଣାର୍ଥୀ ଉଚ୍ଚାୟୁକ୍ତ (UNHCR) ଏକ ବିବୃତ୍ତିରେ କହିଛି। ପ୍ରବଳ ପବନ, ଅଶାନ୍ତ ସମୁଦ୍ର ଏବଂ ଅଧିକ ଲୋକ ଥିବାରୁ ଡଙ୍ଗାଟି ଓଲଟି ପଡ଼ିଥିଲା। ପ୍ରାଥମିକ ସୂଚନା ଅନୁଯାୟୀ ଡଙ୍ଗାଟିରେ ପ୍ରାୟ ୨୮୦ଜଣଙ୍କୁ ନେଇ ଯାଉଥିଲା ଏବଂ ଏପ୍ରିଲ ୪ ତାରିଖରେ ବାଂଲାଦେଶ ଛାଡିଥିଲା।
ଜାତିସଂଘର ଏଜେନ୍ସିଗୁଡ଼ିକ ଏହି ଦୁଃଖଦ ଘଟଣା ଉପରେ ଗଭୀର ଚିନ୍ତା ପ୍ରକାଶ କରିଛନ୍ତି । ସେମାନେ କହିଛନ୍ତି ଯେ ଶରଣାର୍ଥୀ ଶିବିରରେ ଅବସ୍ଥା ଖରାପ ହେଉଛି, ଶିକ୍ଷା ଏବଂ ଜୀବିକା ପାଇଁ ସୀମିତ ପ୍ରବେଶ ଏବଂ ରାଖାଇନ୍ ରାଜ୍ୟରେ ଚାଲିଥିବା ହିଂସା ଅନେକଙ୍କୁ ପଳାୟନ କରିବାକୁ ବାଧ୍ୟ କରୁଛି।
ଏଜେନ୍ସିଗୁଡ଼ିକ ଏହା ମଧ୍ୟ ଚେତାବନୀ ଦେଇଛନ୍ତି ଯେ ଚୋରା ଚାଲାଣ ନେଟୱାର୍କ ଦ୍ୱାରା ପ୍ରସାରିତ ଭୁଲ ସୂଚନା ଏବଂ ମିଥ୍ୟା ପ୍ରତିଶ୍ରୁତି ଗରିବ ଲୋକଙ୍କୁ ଜୀବନ ପ୍ରତି ବିପଦପୂର୍ଣ୍ଣ ଯାତ୍ରାକୁ ପ୍ରଲୋଭିତ କରୁଛି।