ଦ୍ୱିତୀୟ ପର୍ଯ୍ୟାୟ ମତଦାନ ପୂର୍ବରୁ ଇଡିର ବଡ଼ ଆକ୍ସନ୍: ରାସନ ଦୁର୍ନୀତି ମାମଲାରେ ଏକାଧିକ ସ୍ଥାନରେ ଚଢ଼ାଉ

କୋଲକାତା: ପଶ୍ଚିମବଙ୍ଗ ବିଧାନସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟ ମତଦାନ ଏପ୍ରିଲ ୨୯ ତାରିଖରେ ହେବାକୁ ଥିବା ବେଳେ ତା’ ପୂର୍ବରୁ କେନ୍ଦ୍ରୀୟ ତଦନ୍ତକାରୀ ସଂସ୍ଥା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏକ ବଡ଼ ଧରଣର କାର୍ଯ୍ୟାନୁଷ୍ଠାନ ଗ୍ରହଣ କରିଛି। ବହୁଚର୍ଚ୍ଚିତ ରାସନ ବଣ୍ଟନ ବା ସାର୍ବଜନୀନ ବଣ୍ଟନ ବ୍ୟବସ୍ଥା ଦୁର୍ନୀତି ଏବଂ ମନି ଲଣ୍ଡରିଂ (ଅର୍ଥ ହେରଫେର) ମାମଲାରେ ଶନିବାର ଦିନ ଇଡି ଅଧିକାରୀମାନେ ପଶ୍ଚିମବଙ୍ଗର ଏକାଧିକ ସ୍ଥାନରେ ଏକକାଳୀନ ଚଢ଼ାଉ କରିଛନ୍ତି।

ସରକାରୀ ସୂତ୍ରରୁ ମିଳିଥିବା ସୂଚନା ଏବଂ ନ୍ୟୁଜ୍ ଏଜେନ୍ସି ‘ପିଟିଆଇ’ର ରିପୋର୍ଟ ଅନୁଯାୟୀ, କୋଲକାତା, ବର୍ଦ୍ଧମାନ ଆଦି ଅଞ୍ଚଳରେ ଥିବା ପ୍ରାୟ ୯ଟି ବିଭିନ୍ନ ଠିକଣାରେ ସର୍ଚ୍ଚ ଅପରେସନ୍ ଜାରି ରହିଛି। ବିଶେଷ କରି ରାସନ ସାମଗ୍ରୀ ଯୋଗାଣକାରୀ, ମଧ୍ୟସ୍ଥି ଏବଂ ରପ୍ତାନିକାରୀ ମାନଙ୍କ ଘର ଓ ଅଫିସ୍ ଉପରେ ଏହି ଚଢ଼ାଉ କରାଯାଇଛି। ଯେଉଁମାନଙ୍କ ଠିକଣାରେ ରେଡ୍ ହୋଇଛି, ସେମାନଙ୍କ ମଧ୍ୟରେ ନିରଞ୍ଜନ ଚନ୍ଦ୍ର ସାହା ନାମକ ଜଣେ ବ୍ୟକ୍ତି ମଧ୍ୟ ସାମିଲ ଅଛନ୍ତି। ‘ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ’ ଆଇନ ବଳରେ ଇଡି ଏହି କାର୍ଯ୍ୟାନୁଷ୍ଠାନ ଗ୍ରହଣ କରୁଛି। ସୂଚନାଯୋଗ୍ୟ ଯେ, ଏହି ମାମଲାରେ ଇଡି ପୂର୍ବରୁ ମଧ୍ୟ ଅନେକ ଥର ଚଢ଼ାଉ କରିସାରିଛି।

ଏହି ମହାଦୁର୍ନୀତିର ମୂଳ ଅକ୍ଟୋବର ୨୦୨୦ ରୁ ଆରମ୍ଭ ହୋଇଥିଲା। ଘୋଜାଡାଙ୍ଗା ଲ୍ୟାଣ୍ଡ କଷ୍ଟମ୍ସ ଷ୍ଟେସନର ଜଣେ ଡେପୁଟି କମିଶନରଙ୍କ ଅଭିଯୋଗ ଆଧାରରେ ବସିରହାଟ ପୋଲିସ ଏକ ଏଫଆଇଆର ରୁଜୁ କରିଥିଲା। ଅଭିଯୋଗ ଥିଲା ଯେ, ଗରିବ ଏବଂ କଲ୍ୟାଣକାରୀ ଯୋଜନା ପାଇଁ ଉଦ୍ଦିଷ୍ଟ ରିହାତି ମୂଲ୍ୟର ସରକାରୀ ଗହମକୁ ବେଆଇନ ଭାବେ ବାଟମାରଣା କରାଯାଉଛି।

ଇଡିର ତଦନ୍ତରୁ ଜଣାପଡ଼ିଛି ଯେ, ଲାଇସେନ୍ସପ୍ରାପ୍ତ ଡିଷ୍ଟ୍ରିବ୍ୟୁଟର, ଡିଲର, ଯୋଗାଣକାରୀ ଏବଂ ଦଲାଲମାନେ ମିଶି ଏକ ବଡ଼ ସିଣ୍ଡିକେଟ୍ ଚଳାଉଥିଲେ। ସେମାନେ ବେଆଇନ ଉପାୟରେ କମ୍ ଦାମରେ ସରକାରୀ ଗହମ କିଣିବା ପରେ ତାହାକୁ ଯୋଗାଣ ବ୍ୟବସ୍ଥାରୁ ଲୁଚାଇ ବିଭିନ୍ନ ଗୋଦାମରେ ଗଚ୍ଛିତ ରଖୁଥିଲେ।

ଏହି ବେଆଇନ କାରବାରକୁ ଲୁଚାଇବା ପାଇଁ ଅଭିଯୁକ୍ତମାନେ ଏକ ଅଭିନବ ଉପାୟ ଆପଣାଉଥିଲେ। ଭାରତୀୟ ଖାଦ୍ୟ ନିଗମ (ଏଫସିଆଇ) ଏବଂ ରାଜ୍ୟ ସରକାରଙ୍କ ଲୋଗୋ ଓ ମୋହର ଲାଗିଥିବା ଗହମ ବସ୍ତାଗୁଡ଼ିକୁ ସେମାନେ ବଦଳାଇ ଦେଉଥିଲେ କିମ୍ବା ଚିହ୍ନଗୁଡ଼ିକୁ ଲିଭାଇ ଦେଉଥିଲେ। ତା’ପରେ ସେହି ସରକାରୀ ଗହମକୁ ଅନ୍ୟ ବସ୍ତାରେ ପ୍ୟାକ୍ କରି ସମ୍ପୂର୍ଣ୍ଣ ଆଇନଗତ ଦର୍ଶାଇ ଖୋଲା ବଜାରରେ ଚଢ଼ା ଦରରେ ବିକ୍ରି କରୁଥିଲେ କିମ୍ବା ବିଦେଶକୁ ରପ୍ତାନି କରୁଥିଲେ ବୋଲି କେନ୍ଦ୍ରୀୟ ସଂସ୍ଥା ଦାବି କରିଛି।

ଉଲ୍ଲେଖଯୋଗ୍ୟ ଯେ, ଏହି ହାଇପ୍ରୋଫାଇଲ୍ ଦୁର୍ନୀତି ମାମଲାରେ ଇଡି ପୂର୍ବରୁ ପଶ୍ଚିମବଙ୍ଗର ତତ୍କାଳୀନ ଖାଦ୍ୟ ଓ ଯୋଗାଣ ମନ୍ତ୍ରୀ ଜ୍ୟୋତିପ୍ରିୟ ମଲ୍ଲିକ୍ ଏବଂ ଅନ୍ୟ କେତେକ ପ୍ରଭାବଶାଳୀ ବ୍ୟକ୍ତିଙ୍କୁ ଗିରଫ କରିସାରିଛି। ବିଧାନସଭା ନିର୍ବାଚନ ମଝିରେ ଏହି ନୂଆ ଚଢ଼ାଉ ରାଜ୍ୟ ରାଜନୀତିରେ ଆହୁରି ହଟଚମଟ ସୃଷ୍ଟି କରିବାର ସମ୍ଭାବନା ରହିଛି।