Fire breaks out in Rajdhani Express: ହୁତୁ ହୁତୁ ହୋଇ ଜଳିଲା ରାଜଧାନୀ ଏକ୍ସପ୍ରେସ, ଭିତରେ ଥିଲେ ୬୮ ଯାତ୍ରୀ…

ନୂଆଦିଲ୍ଲୀ: ରାଜଧାନୀ ଏକ୍ସପ୍ରେସରେ ଅଗ୍ନିକାଣ୍ଡ। ଦିଲ୍ଲୀ-ନିଜାମୁଦ୍ଦିନ ଯାଉଥିବା ଏହି ଟେନ ଏକ କୋଚରେ ଅଗ୍ନିକାଣ୍ଡ ଘଟି ଆତଙ୍କ ସୃଷ୍ଟି ହୋଇଛି। ତେବେ ସୌଭାଗ୍ୟବଶତଃ, ଦୁର୍ଘଟଣା ପରେ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବରେ ବାହାର କରାଯାଇଥିଲା। ତଥାପି, ଘଟଣା ପରେ ଦିଲ୍ଲୀ-ମୁମ୍ବାଇ ରେଳ ଟ୍ରାକରେ ଯାତାୟାତ ବନ୍ଦ କରାଯାଇଛି।

କୋଟା ରେଳ ଡିଭିଜନ ଅନ୍ତର୍ଗତ ରତଲାମ ଜିଲ୍ଲାର ଆଲୋଟ୍ ଷ୍ଟେସନ ନିକଟରେ ଥିରୁବନନ୍ତପୁରମ-ହଜରତ ନିଜାମୁଦ୍ଦିନ ରାଜଧାନୀ ଏକ୍ସପ୍ରେସ (୧୨୪୩୧)ର ଏସି କୋଚରେ ଅଗ୍ନିକାଣ୍ଡ ଘଟିଛି। ରବିବାର ସକାଳ ପ୍ରାୟ ୫:୩୦ ସମୟରେ କୋଟା ଡିଭିଜନର ଲୁନିରିଚା ଏବଂ ବିକ୍ରମଗଡ଼ ଆଲୋଟ୍ ଷ୍ଟେସନ ମଧ୍ୟରେ ଏହି ଦୁର୍ଘଟଣା ଘଟିଥିଲା। ଦୁର୍ଘଟଣାର ଖବର ପାଇ କୋଟା ରେଳ ଡିଭିଜନର ଏକ ଉଦ୍ଧାର ଏବଂ ରିଲିଫ୍ ଦଳ ଘଟଣାସ୍ଥଳକୁ ପହଞ୍ଚିଥିଲା। ନିଆଁ ଲାଗିଥିବା କୋଚରେ ୬୮ ଜଣ ଯାତ୍ରୀ ଥିଲେ। କିଛି ସେକେଣ୍ଡ ମଧ୍ୟରେ ନିଆଁ ସମଗ୍ର କୋଚରେ ବ୍ୟାପିଗଲା। ଗାର୍ଡ ପ୍ରଥମେ ଲୋକୋ ପାଇଲଟଙ୍କୁ ସତର୍କ କରିଥିଲେ, ତା’ପରେ ଟ୍ରେନକୁ ଅଟକାଇ ଯାତ୍ରୀମାନଙ୍କୁ ବାହାର କରାଯାଇଥିଲା।

ରିପୋର୍ଟ ଅନୁଯାୟୀ, ଅଗ୍ନିକାଣ୍ଡ ଘଟିବା ପରେ, ଟ୍ରେନରେ ଥିବା ଆରପିଏଫ କର୍ମଚାରୀ ଏବଂ ଅନ୍ୟାନ୍ୟ କର୍ମଚାରୀମାନେ ତୁରନ୍ତ ଯାତ୍ରୀମାନଙ୍କୁ ଓହ୍ଲାଇବା ଆରମ୍ଭ କରିଥିଲେ। ୧୫ ମିନିଟ୍ ମଧ୍ୟରେ ସମ୍ପୂର୍ଣ୍ଣ କୋଚ ଖାଲି କରାଯାଇଥିଲା। ତଥାପି ଏବେ ଦିଲ୍ଲୀ-ମୁମ୍ବାଇ ରେଳ ଟ୍ରାକରେ ଯାତାୟାତ ବନ୍ଦ ହୋଇଯାଇଛି। ଯାହାଫଳରେ ଅଟକି ରହିଛି ଅନେକ ଟ୍ରେନ ।

ପଶ୍ଚିମ ରେଳବାଇର କୋଟା ଡିଭିଜନ କହିଛି, “ଥିରୁବନନ୍ତପୁରମ-ହଜରତ ନିଜାମୁଦ୍ଦିନ ରାଜଧାନୀ ଏକ୍ସପ୍ରେସ ନଂ. ୧୨୪୩୧ର ବି-୧ କୋଚରେ (ଏସଏଲଆର ଏଣ୍ଡ ନିକଟରେ) ଲୁନି ରିଚା (ଏଲଏନଆର) ଏବଂ ବିକ୍ରମଗଡ଼ ଆଲୋଟ (ଭିଏମଏ) ମଧ୍ୟରେ କିଲୋମିଟର ୭୨୯/୦୨ (ଲୋକୋ) ଏବଂ ୭୨୮/୧୪-୧୬ (ଏସଏଲଆର) ରେ ଡାଉନ ଦିଗରେ ନିଆଁ ଲାଗିଯାଇଥିଲା। ପ୍ରଭାବିତ କୋଚରେ ଥିବା ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବରେ ବାହାର କରାଯାଇଥିଲା। କୌଣସି ଯାତ୍ରୀ କିମ୍ବା ରେଳ କର୍ମଚାରୀଙ୍କର କୌଣସି ମୃତାହତ ହୋଇନାହିଁ।” ଅଗ୍ନିକାଣ୍ଡ ଘଟିଥିବା ଟ୍ରେନର ବିଦ୍ୟୁତ୍ ଯୋଗାଣ ମଧ୍ୟ ବିଚ୍ଛିନ୍ନ କରାଯାଇଛି। ସୂଚନା ପାଇବା ପରେ, କୋଟା ଡିଭିଜନର ବରିଷ୍ଠ ଅଧିକାରୀ ଏବଂ ବୈଷୟିକ କର୍ମଚାରୀ ଘଟଣାସ୍ଥଳରେ ପହଞ୍ଚିଥିଲେ। ଅଗ୍ନିକାଣ୍ଡର କାରଣ ତଦନ୍ତ କରାଯାଉଛି।