ଭୁବନେଶ୍ୱର: ମୁଫ୍ତ ବିଜିଲି ଯୋଜନା ଅଧୀନରେ ନୂତନ ଏବଂ ଅକ୍ଷୟ ଶକ୍ତି ମନ୍ତ୍ରଣାଳୟର (ଏମଏନଆରଇ) ଦେଶବ୍ୟାପୀ “ମନ୍ଥ ଅଫ୍ ସୋଲାର’ ଅଭିଯାନର ଅଂଶ ସ୍ୱରୂପ ଟାଟା ପାୱାର୍ ଏବଂ ଓଡ଼ିଶା ସରକାରଙ୍କ ମିଳିତ ଉଦ୍ୟୋଗ ଓଡ଼ିଶା ଡିସକମ୍ ଗୁଡ଼ିକ ପକ୍ଷରୁ “ମୋ ଛାତ, ମୋ ସଞ୍ଚୟ’ ଶୀର୍ଷକ ଏକ ସଚେତନତା ଅଭିଯାନ ଆରମ୍ଭ କରାଯାଇଛି।
ସୌର ଶକ୍ତିର ଲାଭ ବିଷୟରେ ବ୍ୟାପକ ଉପଭୋକ୍ତା ସଚେତନତା ସୃଷ୍ଟି କରିବା, ରୁଫ୍ଟପ୍ ସୋଲାର୍ ପାଇଁ ଆବେଦନକୁ ପ୍ରୋତ୍ସାହିତ କରିବା ଏବଂ ପିଏମ୍ ସୂର୍ଯ୍ୟ ଘର ଯୋଜନା ଅଧୀନରେ ସୋଲାର୍ ସ୍ଥାପନ ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ଏହି ଅଭିଯାନର ପରିକଳ୍ପନା କରାଯାଇଛି । ଏହି ପଦକ୍ଷେପ ମାଧ୍ୟମରେ ଟାଟା ପାୱାର୍ ନେତୃତ୍ୱାଧୀନ ଓଡ଼ିଶା ଡିସକମ୍ ଗୁଡ଼ିକ ରାଜ୍ୟର ସମସ୍ତ ଜିଲ୍ଲା ଏବଂ ସମସ୍ତ ବର୍ଗର ଗ୍ରାହକଙ୍କ ପାଖରେ ପହଞ୍ଚୁଛନ୍ତି। ଯାହାଦ୍ୱାରା ସର୍ବାଧିକ ନାଗରିକ ରୁଫ୍ଟପ୍ ସୋଲାର୍ ଏବଂ ସରକାରୀ ସବ୍ସିଡିର ଲାଭ ଉଠାଇ ପାରିବେ।
ଆଜି ଓଡ଼ିଶା ରୁଫ୍ଟପ୍ ସୋଲାର୍ ଆପଣେଇବାରେ ଦେଶର ଅଗ୍ରଣୀ ରାଜ୍ୟଗୁଡ଼ିକ ମଧ୍ୟରେ ସ୍ଥାନ ପାଇଛି । ପିଏମ୍ ସୂର୍ଯ୍ୟଘର: ମୁଫ୍ତ ବିଜିଲି ଯୋଜନା ଅଧୀନରେ ଉଭୟ ୧ କିଲୋୱାଟ୍ ପର୍ଯ୍ୟନ୍ତ (ୟୁଏଲଏ) ଏବଂ ୧ କିଲୋୱାଟ୍ରୁ ଅଧିକ (ନନ – ୟୁଏଲଏ) ଉପଭୋକ୍ତା ବର୍ଗଙ୍କ ପାଇଁ ବର୍ତ୍ତମାନ ରାଜ୍ୟରେ ଦେଶର ସବୁଠାରୁ ଆକର୍ଷଣୀୟ ରୁଫ୍ଟପ୍ ସୋଲାର୍ ସବ୍ସିଡି ବ୍ୟବସ୍ଥା ଉପଲବ୍ଧ ଅଛି । ଯୋଗ୍ୟ ଉପଭୋକ୍ତାମାନେ ରୁଫ୍ଟପ୍ ସୋଲାର୍ ସ୍ଥାପନ ପାଇଁ କେନ୍ଦ୍ର ଏବଂ ରାଜ୍ୟ ସରକାରଙ୍କ ମିଳିତ ସବ୍ସିଡି ବାବଦକୁ ୧,୩୮,୦୦୦ଟଙ୍କା ପର୍ଯ୍ୟନ୍ତ ଲାଭ ପାଇପାରିବେ। ଯାହା ପ୍ରାରମ୍ଭିକ ଖର୍ଚ୍ଚକୁ ଯଥେଷ୍ଟ ହ୍ରାସ କରୁଛି ଏବଂ ସହରାଞ୍ଚଳ ତଥା ଗ୍ରାମାଞ୍ଚଳର ସମସ୍ତ ପରିବାର ପାଇଁ ସ୍ୱଚ୍ଛ ଶକ୍ତି ଆପଣେଇବାକୁ ଅଧିକ ଶସ୍ତା ଓ ସହଜସାଧ୍ୟ କରୁଛି।
“ମୋ ଛାତ, ମୋ ସଞ୍ଚୟ’ ଅଭିଯାନକୁ ଏକ ଜନକେନ୍ଦ୍ରୀକ ସଚେତନତା ଆନ୍ଦୋଳନ ଭାବରେ ପରିକଳ୍ପନା କରାଯାଇଛି।ଯାହାର ମୁଖ୍ୟ ଉଦ୍ଦେଶ୍ୟ ହେଉଛି ପ୍ରତ୍ୟେକ ପରିବାର ପାଇଁ ରୁଫ୍ଟପ୍ ସୋଲାରକୁ ସରଳ, ସହଜସାଧ୍ୟ ଏବଂ ଲାଭଦାୟକ କରିବା । ଉପଭୋକ୍ତା ମାନେ କିପରି ନିଜର ବ୍ୟବହାର ହେଉନଥିବା ଛାତର ସ୍ଥାନକୁ ବିଦ୍ୟୁତ୍ ବିଲ୍ ହ୍ରାସ ମାଧ୍ୟମରେ ଏକ ଦୀର୍ଘକାଳୀନ ସଞ୍ଚୟର ଉତ୍ସରେ ପରିଣତ କରିପାରିବେ ଏବଂ ଏକ ସ୍ୱଚ୍ଛ ଓ ଦୀର୍ଘସ୍ଥାୟୀ ଭବିଷ୍ୟତ ଗଠନରେ ଯୋଗଦାନ ଦେଇପାରିବେ।
ଏହି ଅଭିଯାନର ଏକ ଅଂଶ ଭାବରେ ଟାଟା ପାୱାର୍ ନେତୃତ୍ୱାଧୀନ ଓଡ଼ିଶା ଡିସକମ୍ ଗୁଡ଼ିକ ସାରା ରାଜ୍ୟରେ ବ୍ୟାପକ ତୃଣମୂଳ ସ୍ତରୀୟ ସଚେତନତା ଏବଂ ପ୍ରସାର କାର୍ଯ୍ୟକ୍ରମ ହାତକୁ ନେଉଛନ୍ତି। ନାଗରିକ ମାନଙ୍କୁ ରୁଫ୍ଟପ୍ ସୋଲାର ଆପଣେଇବା, ସବ୍ସିଡିର ଲାଭ, ସ୍ଥାପନ ପ୍ରକ୍ରିୟା ଏବଂ ଦୀର୍ଘକାଳୀନ ସଞ୍ଚୟର ସୁଯୋଗ ବିଷୟରେ ଅବଗତ କରିବା ପାଇଁ ଗ୍ରାମ ପଞ୍ଚାୟତ ସ୍ତରରେ ସୂର୍ଯ୍ୟ ଘର ଗ୍ରାମ ସଭା ଗୁଡ଼ିକର ଆୟୋଜନ କରାଯାଉଛି।
ଏହି ସଚେତନତା ଏବଂ ପ୍ରସାର କାର୍ଯ୍ୟକ୍ରମ ଓଡ଼ିଶା ସରକାର ଏବଂ ନୂତନ ଓ ଅକ୍ଷୟ ଶକ୍ତି ମନ୍ତ୍ରଣାଳୟର ସୂଚନା, ଶିକ୍ଷା ଏବଂ ଯୋଗାଯୋଗ ମାର୍ଗଦର୍ଶିକା ଅନୁଯାୟୀ କାର୍ଯ୍ୟକାରୀ କରାଯାଉଛି।
ପିଏମ୍ ସୂର୍ଯ୍ୟ ଘର ଜାତୀୟ ପୋର୍ଟାଲ୍ ଅନୁଯାୟୀ, ମେ ୧ ରୁ ୧୪ ପର୍ଯ୍ୟନ୍ତ ଚାଲିଥିବା ଏମଏନଆରଇ ର “ମନ୍ଥ ଅଫ୍ ସୋଲାର’ ଅଭିଯାନ ସମୟରେ ରୁଫ୍ଟପ୍ ସୋଲାର୍ ସ୍ଥାପନ କ୍ଷେତ୍ରରେ ଓଡ଼ିଶା କ୍ୟାଟେଗୋରୀ ସି (ମଧ୍ୟମ ଉପଭୋକ୍ତା ଶ୍ରେଣୀ) ରାଜ୍ୟଗୁଡ଼ିକ ମଧ୍ୟରେ ପ୍ରଥମ ସ୍ଥାନରେ ରହିଛି । ଜାତୀୟ ସ୍ତରରେ ମଧ୍ୟ ଓଡ଼ିଶା ରୁଫ୍ଟପ୍ ସୋଲାର୍ ସ୍ଥାପନରେ ଶୀର୍ଷ ୧୦ଟି ରାଜ୍ୟ ମଧ୍ୟରେ ସ୍ଥାନ ପାଇଛି, ଯେଉଁଠାରେ ୧୮ ମେ ୨୦୨୬ ସୁଦ୍ଧା ମୋଟ ୮୯,୬୧୪ ଟି ରୁଫ୍ଟପ୍ ସୋଲାର୍ ସ୍ଥାପନ ରେକର୍ଡ କରାଯାଇଛି ।