ଦାମୀ ଗାଡ଼ି ଭିତରେ ‘ସିକ୍ରେଟ୍ ଚ୍ୟାମ୍ବର’: ପୋଲିସ ଆଖିରେ ଧୂଳି ଦେଇ ଚାଲିଥିଲା ଗଞ୍ଜେଇ ଚାଲାଣ, ୪ ଗିରଫ
ଭୁବନେଶ୍ୱର: ରାଜପଥରେ ସଁ ସଁ ଗତିରେ ମାଡ଼ି ଚାଲିଥିଲା ଏକ ଚକ୍ଚକ୍ ବିଳାସପୂର୍ଣ୍ଣ ଦାମୀ କାର୍। ବାହାରୁ ଦେଖିଲେ କେହି ସହଜରେ ସନ୍ଦେହ କରିବେନି ଯେ ଏଥିରେ କୌଣସି ବେଆଇନ କାରବାର ଚାଲିଛି। କିନ୍ତୁ ଏହା ପଛରେ ଲୁଚି ରହିଥିଲା ମାଫିଆଙ୍କ ଏକ ବଡ଼ ଚକ୍ରାନ୍ତ। ପୋଲିସକୁ ଚକମା ଦେବା ପାଇଁ ଗାଡ଼ି ଭିତରେ ସ୍ୱତନ୍ତ୍ର ଭାବେ ତିଆରି ହୋଇଥିଲା ଗୋପନ କୋଠରୀ ବା ‘ସିକ୍ରେଟ୍ ଚ୍ୟାମ୍ବର’। ହେଲେ ପୋଲିସର ନଜରରୁ ବର୍ତ୍ତି ପାରିଲେନି ଚାଲାଣକାରୀ। ଗୁପ୍ତ ସୂଚନାକୁ ଆଧାର କରି ପୋଲିସ ଏହି ବିଳାସପୂର୍ଣ୍ଣ ଗାଡ଼ିକୁ ଅଟକାଇବା ସହ ଏହାର ଗୋପନ କୋଠରୀ ଭିତରୁ ବିପୁଳ ପରିମାଣର ଗଞ୍ଜେଇ ଜବତ କରିଛି। ଏହି ଆନ୍ତଃରାଜ୍ୟ ଚୋରା ଚାଲାଣ ରାକେଟର ପର୍ଦ୍ଦାଫାଶ କରିବା ସହ ଘଟଣାସ୍ଥଳରୁ ୪ ଜଣ ଅଭିଯୁକ୍ତଙ୍କୁ ବାନ୍ଧିଛି ପୋଲିସ।
ଏହି ସାଂଘାତିକ କାରବାରର ଶୈଳୀ ଦେଖିଲେ ଯେକେହି ବି ତାଜୁବ୍ ହୋଇଯିବ। ଗଞ୍ଜେଇ ମାଫିଆମାନେ ଏବେ ପାରମ୍ପରିକ ଟ୍ରକ୍ କିମ୍ବା ପିକଅପ୍ ଭ୍ୟାନ୍ ବଦଳରେ ଦାମୀ ଲଗ୍ଜୁରୀ କାର୍କୁ ନିଜର ମାଧ୍ୟମ ସଜାଇଛନ୍ତି। ଗାଡ଼ିର ଡାଶବୋର୍ଡ, ସିଟ୍ ତଳ କିମ୍ବା ଗୁପ୍ତ ସ୍ଥାନକୁ କାଟି ଏମିତି ଚ୍ୟାମ୍ବର ତିଆରି କରାଯାଇଥିଲା, ଯାହା ସାଧାରଣ ଯାଞ୍ଚ ବେଳେ ଆଦୌ ନଜରକୁ ଆସିବ ନାହିଁ। ଜବତ ହୋଇଥିବା ଗଞ୍ଜେଇ ପ୍ୟାକେଟଗୁଡ଼ିକୁ ଅତି ସତର୍କତାର ସହ ସେହି ଚ୍ୟାମ୍ବର ଭିତରେ ଲୁଚାଇ ରଖାଯାଇଥିଲା। ପୋଲିସ ଗାଡ଼ିଟିକୁ କାବୁ କରିବା ପରେ ଯେତେବେଳେ ସେହି ଗୁପ୍ତ କୋଠରୀର କବାଟ ଖୋଲିଥିଲା, ସେଠାରୁ ପ୍ୟାକେଟ୍ ପ୍ୟାକେଟ୍ ନୀଳ ଜହର ବାହାରିଥିଲା।
ସୂଚନା ଅନୁସାରେ, ଏହି ଗଞ୍ଜେଇ ଓଡ଼ିଶାର ସୀମାନ୍ତ ଅଞ୍ଚଳରୁ ସଂଗ୍ରହ କରାଯାଇ ରାଜ୍ୟ ବାହାରକୁ ଚାଲାଣ କରାଯାଉଥିଲା। ଗିରଫ ହୋଇଥିବା ୪ ଜଣ ଅଭିଯୁକ୍ତଙ୍କୁ ପୋଲିସ ବର୍ତ୍ତମାନ ଜେରା କରୁଛି। ଏହି ବେଆଇନ ନେଟୱର୍କର ଚେର କେଉଁ ପର୍ଯ୍ୟନ୍ତ ଲମ୍ବିଛି ଏବଂ ଏହି କାରବାରର ମୁଖ୍ୟ କିଙ୍ଗପିନ୍ କିଏ, ସେ ନେଇ ଖୋଳତାଡ଼ ଜାରି ରହିଛି। ବିଶେଷ କରି ଓଡ଼ିଶାରୁ ପଡ଼ୋଶୀ ରାଜ୍ୟଗୁଡ଼ିକୁ ହେଉଥିବା ଏହି ହାଇଫାଇ ଚୋରା ଚାଲାଣକୁ ରୋକିବା ପାଇଁ ପୋଲିସ ଏବେ ବିଭିନ୍ନ ରୁଟ୍ରେ ନିଜର ସୁରକ୍ଷା ବ୍ୟବସ୍ଥା ଆହୁରି କଡ଼ାକଡ଼ି କରିଦେଇଛି।
