ବିଶ୍ୱ ବ୍ୟାଙ୍କର ନୂଆ ରିପୋର୍ଟ: ଶ୍ରୀଲଙ୍କା ଓ ଭିଏତନାମ ଆଗେଇ ଗଲେ, ଭାରତ ଏବେ ବି ସେଇଠି; ବିହାର ଭଳି ରାଜ୍ୟ ପାଇଁ ଚିନ୍ତା ବଢ଼ିଲା
ନୂଆଦିଲ୍ଲୀ: ବିଶ୍ୱ ବ୍ୟାଙ୍କ (World Bank) ପକ୍ଷରୁ ଦେଶଗୁଡ଼ିକର ଆର୍ଥିକ ସ୍ଥିତି ଓ ମୁଣ୍ଡପିଛା ଆୟକୁ ନେଇ ସେମାନଙ୍କର ନୂଆ ର୍ୟାଙ୍କିଙ୍ଗ୍ ବା ଶ୍ରେଣୀଭୁକ୍ତ ତାଲିକା ଜାରି କରାଯାଇଛି। ଏହି ନୂଆ ରିପୋର୍ଟ ଅନୁସାରେ, ଭାରତର ପଡ଼ୋଶୀ ଦେଶ ଶ୍ରୀଲଙ୍କା ଏବଂ ଭିଏତନାମ, ଫିଲିପାଇନ୍ସ ଭଳି ଦେଶଗୁଡ଼ିକର ଆର୍ଥିକ ସ୍ଥିତିରେ ସୁଧାର ଆସିଛି। ଏହି ଦେଶଗୁଡ଼ିକ ଏବେ ‘ନିମ୍ନ-ମଧ୍ୟମ ଆୟ’ (Lower-Middle Income) ଶ୍ରେଣୀରୁ ଉପରକୁ ଉଠି ‘ଉଚ୍ଚ-ମଧ୍ୟମ ଆୟ’ (Upper-Middle Income) ଦେଶ ସୂଚୀରେ ସାମିଲ ହୋଇଛନ୍ତି। ତେବେ ଏହି ଦୌଡ଼ରେ ଭାରତ ପଛରେ ରହିଯାଇଛି। ଦେଶର ଆର୍ଥିକ ଅଭିବୃଦ୍ଧି ଘଟୁଥିଲେ ମଧ୍ୟ ବିଶ୍ୱ ବ୍ୟାଙ୍କ ତାଲିକାରେ ଭାରତ ଏବେ ବି ‘ନିମ୍ନ-ମଧ୍ୟମ ଆୟ’ ଦେଶ ଭାବରେ ରହିଛି।
ରିପୋର୍ଟ ଅନୁସାରେ, ଭାରତ ଏକ ବଡ଼ ଅର୍ଥନୀତି ହୋଇଥିଲେ ବି ଏଠାରେ ବିଭିନ୍ନ ରାଜ୍ୟଗୁଡ଼ିକ ମଧ୍ୟରେ ଥିବା ଆର୍ଥିକ ଅସମାନତା ଏକ ବଡ଼ ପ୍ରତିବନ୍ଧକ ସାଜିଛି। ଦେଶର କେତେକ ରାଜ୍ୟ ଖୁବ୍ ଦ୍ରୁତ ଗତିରେ ଆଗକୁ ବଢ଼ୁଥିବା ବେଳେ ବିହାର ଭଳି କେତେକ ପଛୁଆ ରାଜ୍ୟରେ ଗରିବୀ ଏବଂ କମ୍ ମୁଣ୍ଡପିଛା ଆୟ ସମଗ୍ର ଦେଶର ହାରାହାରି ସ୍ଥିତିକୁ ତଳକୁ ଖସାଇ ଦେଉଛି। ରାଜ୍ୟ ରାଜ୍ୟ ମଧ୍ୟରେ ଥିବା ଏହି ଆୟର ବ୍ୟବଧାନ ବା ଅସମାନତା ଯୋଗୁଁ ଭାରତ ‘ଉଚ୍ଚ-ମଧ୍ୟମ ଆୟ’ ଶ୍ରେଣୀକୁ ଯାଇପାରୁ ନାହିଁ।
ମାତ୍ର କିଛି ବର୍ଷ ତଳେ ଭୟଙ୍କର ଆର୍ଥିକ ସଙ୍କଟ ଦେଇ ଗତି କରୁଥିବା ଶ୍ରୀଲଙ୍କା ଏବେ ବେଶ୍ ଭଲ ସ୍ଥିତିକୁ ଫେରିଛି। ପର୍ଯ୍ୟଟନ ଏବଂ ଆର୍ଥିକ କ୍ଷେତ୍ରରେ ସୁଧାର ଆସିବା ଯୋଗୁଁ ସେଠାକାର ଲୋକଙ୍କ ଆୟ ବଢ଼ିଛି, ଯାହା ଫଳରେ ଶ୍ରୀଲଙ୍କା ଏହି ସଫଳତା ପାଇଛି। ସେହିପରି ଭିଏତନାମ ନିଜର ରପ୍ତାନି (Export) ବଳରେ ଆର୍ଥିକ କ୍ଷେତ୍ରରେ ବଡ଼ ଲମ୍ଫ ମାରିଛି।
ପ୍ରତିବର୍ଷ ଜୁଲାଇ ୧ ତାରିଖରେ ବିଶ୍ୱ ବ୍ୟାଙ୍କ ଦୁନିଆର ସମସ୍ତ ଦେଶର ମୁଣ୍ଡପିଛା ଜାତୀୟ ଆୟ (GNI per capita) କୁ ଆଧାର କରି ଏହି ରିପୋର୍ଟ ପ୍ରସ୍ତୁତ କରିଥାଏ। ଏଥିରେ ଦେଶଗୁଡ଼ିକୁ ଚାରୋଟି ଭାଗରେ ବଣ୍ଟାଯାଏ – ନିମ୍ନ ଆୟ, ନିମ୍ନ-ମଧ୍ୟମ ଆୟ, ଉଚ୍ଚ-ମଧ୍ୟମ ଆୟ ଏବଂ ଉଚ୍ଚ ଆୟ।
ସାଧାରଣ ଭାଷାରେ କହିଲେ, ଭାରତକୁ ବିଶ୍ୱର ଏକ ସମୃଦ୍ଧ ଦେଶ ଭାବେ ଗଢ଼ିତୋଳିବାକୁ ହେଲେ କେବଳ କିଛି ନିର୍ଦ୍ଦିଷ୍ଟ ସହର ବା ରାଜ୍ୟର ବିକାଶ କଲେ ହେବନାହିଁ, ବରଂ ବିହାର ଭଳି ପଛୁଆ ଅଞ୍ଚଳଗୁଡ଼ିକର ଆର୍ଥିକ ସ୍ଥିତି ସୁଧାରିବା ସହ ସମସ୍ତଙ୍କ ପାଖରେ ରୋଜଗାର ପହଞ୍ଚାଇବାକୁ ପଡ଼ିବ।
