ଭୁବନେଶ୍ୱର: ଦେଶର କୋଟି କୋଟି ବେତନଭୋଗୀ ତଥା ଚାକିରିଆଙ୍କ ପାଇଁ ଏକ ବଡ଼ ଏବଂ ଆଶ୍ୱସ୍ତିକର ଖବର। କର୍ମଚାରୀ ଭବିଷ୍ୟ ନିଧି ସଂଗଠନ (EPFO) ଆକାଉଣ୍ଟକୁ ବହୁ ପ୍ରତୀକ୍ଷିତ ସୁଧ ଟଙ୍କା ପଠାଇବା ପ୍ରକ୍ରିୟା ଆରମ୍ଭ ହୋଇଯାଇଛି। ଯଦି ଆପଣ ଜଣେ ଇପିଏଫଓ ହିତାଧିକାରୀ, ତେବେ ଆପଣଙ୍କ ପିଏଫ୍ ଖାତାକୁ ମଧ୍ୟ ୮.୨୫ ପ୍ରତିଶତ ହାରରେ ସୁଧ ବାବଦ ଅର୍ଥ ଆସିଯାଇଥାଇପାରେ। ଅନେକ କର୍ମଚାରୀଙ୍କ ଖାତାରେ ସୁଧ ଟଙ୍କା କ୍ରେଡିଟ୍ ହେବା ଆରମ୍ଭ ହୋଇସାରିଥିବା ବେଳେ, ଏବେ ଲୋକେ ଉତ୍ସାହର ସହ ନିଜର ବାଲାନ୍ସ ଚେକ୍ କରିବା ଆରମ୍ଭ କରିଦେଲେଣି।
ସୂଚନାଯୋଗ୍ୟ ଯେ, ସରକାରଙ୍କ ପକ୍ଷରୁ ପିଏଫ୍ ଆକାଉଣ୍ଟ ଉପରେ ୮.୨୫ ପ୍ରତିଶତ ସୁଧ ହାରକୁ ଅନୁମୋଦନ କରାଯାଇଥିଲା। ଏବେ ଏହି ଅର୍ଥ ହିତାଧିକାରୀଙ୍କ ଆକାଉଣ୍ଟରେ ଜମା ହେବା ପ୍ରକ୍ରିୟା ଜୋରଦାର ହୋଇଛି। ତେବେ ଇପିଏଫଓର ସଦସ୍ୟ ସଂଖ୍ୟା କୋଟି କୋଟି ଥିବାରୁ ଗୋଟିଏ ଥରକେ ସମସ୍ତଙ୍କ ଆକାଉଣ୍ଟରେ ଟଙ୍କା ଜମା ହେବା ସମ୍ଭବ ନୁହେଁ। ତେଣୁ ଯଦି ଏପର୍ଯ୍ୟନ୍ତ ଆପଣଙ୍କ ମୋବାଇଲକୁ ଟଙ୍କା କ୍ରେଡିଟ୍ ହେବାର ମେସେଜ୍ ଆସିନାହିଁ, ତେବେ ବ୍ୟସ୍ତ ହେବାର କୌଣସି କାରଣ ନାହିଁ। ଖୁବଶୀଘ୍ର ଆପଣଙ୍କ ଖାତାକୁ ଏହି ଅର୍ଥ ଟ୍ରାନ୍ସଫର ହୋଇଯିବ ବୋଲି ବିଭାଗ ପକ୍ଷରୁ ଆଶ୍ୱାସନା ଦିଆଯାଇଛି।
ଆପଣଙ୍କ ଖାତାରେ ଟଙ୍କା ପହଞ୍ଚିଛି କି ନାହିଁ ତାହା ଜାଣିବା ପାଇଁ ଆପଣଙ୍କୁ ଇପିଏଫଓ ଅଫିସ ଯାଇ ଲାଇନ୍ରେ ଛିଡ଼ା ହେବାର କୌଣସି ଆବଶ୍ୟକତା ନାହିଁ। ଘରେ ବସି ନିଜ ସ୍ମାର୍ଟଫୋନ୍ ମାଧ୍ୟମରେ ଆପଣ ମାତ୍ର କେଇ ସେକେଣ୍ଡରେ ଏହାକୁ ଯାଞ୍ଚ କରିପାରିବେ। ଏଥିପାଇଁ ୪ଟି ସହଜ ଉପାୟ ରହିଛି:
ମିସଡ୍ କଲ୍ ସୁବିଧା: ନିଜ ରେଜିଷ୍ଟର୍ଡ ମୋବାଇଲ୍ ନମ୍ବରରୁ ୦୧୧-୨୨୯୦୧୪୦୬ (011-22901406) ନମ୍ବରକୁ ମିସଡ୍ କଲ୍ ଦିଅନ୍ତୁ। କଲ୍ ଆପେ ଆପେ କଟିଯିବ ଏବଂ କିଛି ସମୟ ମଧ୍ୟରେ ଆପଣଙ୍କୁ ଏକ ମେସେଜ୍ ଆସିବ, ଯେଉଁଥିରେ ଆପଣଙ୍କ ଆକାଉଣ୍ଟ୍ ବାଲାନ୍ସର ସବିଶେଷ ତଥ୍ୟ ଥିବ।
ଏସଏମଏସ ମାଧ୍ୟମରେ: ଆପଣଙ୍କ ପଞ୍ଜୀକୃତ ମୋବାଇଲ୍ ନମ୍ବରରୁ ‘EPFOHO UAN ENG’ ଲେଖି ୭୭୩୮୨୯୯୮୯୯ (7738299899) ନମ୍ବରକୁ ମେସେଜ କରନ୍ତୁ। ଏଠାରେ ‘ENG’ର ଅର୍ଥ ହେଉଛି ଇଂରାଜୀ ଭାଷା। ତୁରନ୍ତ ଇପିଏଫଓ ପକ୍ଷରୁ ଆପଣଙ୍କୁ ରିପ୍ଲାଏ ଆସିଯିବ।
ଉମଙ୍ଗ (UMANG) ଆପ୍: ନିଜ ସ୍ମାର୍ଟଫୋନରେ ଥିବା ଉମଙ୍ଗ ଆପ୍ ଖୋଲନ୍ତୁ। ସେଥିରେ ଇପିଏଫଓ ସେକ୍ସନକୁ ଯାଇ ନିଜର UAN ନମ୍ବର ଏବଂ ଓଟିପି (OTP) ଦେଇ ଲଗଇନ୍ କରନ୍ତୁ। ଏହାପରେ ‘ଭ୍ୟୁ ପାସବୁକ୍’ (View Passbook) ଉପରେ କ୍ଲିକ୍ କରି ନିଜ ପିଏଫ୍ ବାଲାନ୍ସ ସହଜରେ ଦେଖିପାରିବେ।
ଇପିଏଫଓ (EPFO) ପୋର୍ଟାଲ: ଇପିଏଫଓର ଅଫିସିଆଲ୍ ୱେବସାଇଟ୍କୁ ଯାଇ ଇ-ପାସବୁକ୍ (e-Passbook) ଅପସନ୍ ଉପରେ କ୍ଲିକ୍ କରନ୍ତୁ। ନିଜର UAN ନମ୍ବର, ପାସୱାର୍ଡ ଏବଂ କ୍ୟାପଚା କୋଡ୍ ଦେଇ ଲଗଇନ୍ କଲେ ପୁରା ଷ୍ଟେଟମେଣ୍ଟ ଆପଣଙ୍କ ସ୍କ୍ରିନ୍ ଉପରେ ଦେଖାଯିବ।
ସମୟ ନଷ୍ଟ ନକରି ତୁରନ୍ତ ଉପରୋକ୍ତ କୌଣସି ଗୋଟିଏ ପ୍ରକ୍ରିୟା ଆପଣାଇ ନିଜ ପିଏଫ୍ ଖାତାର ସ୍ଥିତି ଯାଞ୍ଚ କରନ୍ତୁ। ଦୀର୍ଘ ଦିନର ଅପେକ୍ଷା ପରେ ଖାତାକୁ ସୁଧ ଟଙ୍କା ଆସିବା ଆରମ୍ଭ ହୋଇଥିବାରୁ ଚାକିରିଆଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି।
