ସୁନାବେଶରେ ଝଲସିବେ କାଳିଆ ସାଆନ୍ତ ଓ ଭାଇଭଉଣୀ: ରଥ ଉପରେ ସୁବର୍ଣ୍ଣ ଅଳଙ୍କାରରେ ସଜ୍ଜିତ ହେବେ ଚତୁର୍ଦ୍ଧାମୂର୍ତ୍ତି

ପୁରୀ: ଆଜି ଶ୍ରୀକ୍ଷେତ୍ର ପୁରୀରେ ଉତ୍ସବର ମାହୋଲ। ରଥଯାତ୍ରାର ଏକ ପ୍ରମୁଖ ତଥା ଆକର୍ଷଣୀୟ ନୀତି ‘ସୁନାବେଶ’ରେ ଆଜି ମହାପ୍ରଭୁ ଶ୍ରୀଜଗନ୍ନାଥ, ବଡ଼ଠାକୁର ଶ୍ରୀବଳଭଦ୍ର ଏବଂ ଦେବୀ ସୁଭଦ୍ରା ସୁବର୍ଣ୍ଣ ଅଳଙ୍କାରରେ ସଜ୍ଜିତ ହୋଇ ଭକ୍ତମାନଙ୍କୁ ଦର୍ଶନ ଦେବେ। ନବଦିନାତ୍ମକ ଯାତ୍ରା ପରେ ବାହୁଡ଼ା ରଥରେ ଶ୍ରୀମନ୍ଦିର ଅଭିମୁଖେ ଫେରିଆସିଥିବା ତିନି ରଥ ଏବେ ସିଂହଦ୍ୱାର ସମ୍ମୁଖରେ ବିରାଜମାନ କରୁଛନ୍ତି, ଯେଉଁଠାରେ ଆଜି ଏହି ଅପୂର୍ବ ଦୃଶ୍ୟ ଦେଖିବାକୁ ମିଳିବ।

ଆଷାଢ଼ ଶୁକ୍ଳ ଏକାଦଶୀ ତିଥିରେ ଅନୁଷ୍ଠିତ ହେଉଥିବା ଏହି ବେଶକୁ ‘ରାଜରାଜେଶ୍ୱର ବେଶ’ ମଧ୍ୟ କୁହାଯାଏ। ପରମ୍ପରା ଅନୁଯାୟୀ, ମଧ୍ୟାହ୍ନ ଧୂପ ସରିବା ପରେ ଅପରାହ୍ଣ ୫ଟାରୁ ୬ଟା ୩୦ ମଧ୍ୟରେ ଠାକୁରମାନଙ୍କୁ ସୁନାବେଶରେ ସଜ୍ଜିତ କରିବାର କାର୍ଯ୍ୟକ୍ରମ ରହିଛି। ଏହି ସମୟରେ ମହାପ୍ରଭୁଙ୍କ ଶରୀରରେ ପ୍ରାୟ ୧୩୮ ପ୍ରକାରର ବିଭିନ୍ନ ରତ୍ନଖଚିତ ସୁବର୍ଣ୍ଣ ଅଳଙ୍କାର ଲାଗି କରାଯିବ। ପ୍ରତ୍ୟେକ ଠାକୁରଙ୍କ ପାଇଁ ସ୍ୱତନ୍ତ୍ର ଅଳଙ୍କାର ରହିଛି। ଶ୍ରୀବଳଭଦ୍ର ସୁନାର ହଳ ଓ ମୂଷଳ ଧାରଣ କରିବେ, ମା’ ସୁଭଦ୍ରାଙ୍କୁ ବିଭିନ୍ନ ପାରମ୍ପରିକ ଅଳଙ୍କାରରେ ସଜ୍ଜିତ କରାଯିବ ଏବଂ ମହାପ୍ରଭୁ ଶ୍ରୀଜଗନ୍ନାଥଙ୍କୁ ମଧ୍ୟ ବିଶେଷ ସ୍ୱର୍ଣ୍ଣ ଅଳଙ୍କାରରେ ଭୂଷିତ କରାଯିବ।

ଏହି ବେଶରେ ଠାକୁରମାନେ ସନ୍ଧ୍ୟା ଆଳତି ଓ ସନ୍ଧ୍ୟା ଧୂପ ପର୍ଯ୍ୟନ୍ତ ରହିବେ। ରାତି ୯ଟା ୧୫ରେ ମହାଦୀପ ଉଠିବା ପରେ ରାତି ୧୦ଟାରୁ ୧୧ଟା ମଧ୍ୟରେ ଠାକୁରମାନଙ୍କଠାରୁ ମଇଲମ ନୀତିକାନ୍ତି ହେବ ।

ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ଆଗମନକୁ ଦୃଷ୍ଟିରେ ରଖି ଶ୍ରୀମନ୍ଦିର ପ୍ରଶାସନ ଓ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଭକ୍ତମାନେ ଯେପରି ସୁରୁଖୁରୁରେ ଦର୍ଶନ କରିପାରିବେ ଏବଂ ସେବାୟତମାନେ ନୀତିକାନ୍ତି କରିବା ସମୟରେ ଦର୍ଶନରେ ଯେପରି କୌଣସି ବାଧା ନଆସେ, ସେଥିପାଇଁ ବିଶେଷ ଧ୍ୟାନ ଦିଆଯାଉଛି। ଏହି ବିରଳ ଦୃଶ୍ୟ ଦେଖିବା ପାଇଁ ପୁରୀକୁ ଛୁଟି ଆସୁଥିବା ଭକ୍ତମାନଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳୁଛି।