ଭୁବନେଶ୍ୱରରେ ଅନ୍ତର୍ଜାତୀୟ ସମ୍ମିଳନୀ: ‘ଆତ୍ମନିର୍ଭର ଭାରତ’ ଲକ୍ଷ୍ୟ ପୂରଣ ପାଇଁ କୋଇଲା ଗ୍ୟାସିଫିକେସନ୍ ଉପରେ ଶିଳ୍ପପତିଙ୍କ ଗୁରୁତ୍ୱ
ଭୁବନେଶ୍ୱର: ଭାରତକୁ ଶକ୍ତି କ୍ଷେତ୍ରରେ ସ୍ୱାବଲମ୍ବୀ କରିବା ପାଇଁ ଆରମ୍ଭ ହୋଇଥିବା ‘ଆତ୍ମନିର୍ଭର ଭାରତ’ ଅଭିଯାନରେ ଏବେ ଓଡ଼ିଶା ଏକ ନିର୍ଣ୍ଣାୟକ ଭୂମିକା ଗ୍ରହଣ କରିବାକୁ ଯାଉଛି। ରାଜ୍ୟରେ ଉପଲବ୍ଧ ବିପୁଳ କୋଇଲା ଭଣ୍ଡାରର ସଠିକ୍ ଓ ପରିବେଶ ଅନୁକୂଳ ବିନିଯୋଗ ପାଇଁ ‘କୋଇଲା ଗ୍ୟାସିଫିକେସନ୍’ ଏବେ ଶିଳ୍ପ ଜଗତର ପ୍ରମୁଖ ଆକର୍ଷଣ ପାଲଟିଛି। ନିକଟରେ ରାଜଧାନୀ ଭୁବନେଶ୍ୱରଠାରେ ଆୟୋଜିତ ଏକ ଉଚ୍ଚସ୍ତରୀୟ ଅନ୍ତର୍ଜାତୀୟ ସମ୍ମିଳନୀରେ ଏହି ଅତ୍ୟାଧୁନିକ ଜ୍ଞାନକୌଶଳର ବ୍ୟବସାୟିକ ଉପଯୋଗିତା ଏବଂ ଏହାର ଭବିଷ୍ୟତକୁ ନେଇ ଶିଳ୍ପପତି ତଥା ବିଶେଷଜ୍ଞମାନେ ବ୍ୟାପକ ଆଲୋଚନା କରିଛନ୍ତି ।
କୋଇଲା ଗ୍ୟାସିଫିକେସନ୍ ପ୍ରକ୍ରିୟା ଦ୍ୱାରା କୋଇଲାକୁ ସିଧାସଳଖ ନଜାଳି ତାହାକୁ ‘ସିନ୍-ଗ୍ୟାସ୍’ ବା ସିନ୍ଥେଟିକ୍ ଗ୍ୟାସ୍ରେ ପରିଣତ କରାଯାଇଥାଏ। ଭାରତ ବର୍ତ୍ତମାନ ନିଜର ଆବଶ୍ୟକତା ପୂରଣ ପାଇଁ ବିଦେଶୀ ତୈଳ ଓ ପ୍ରାକୃତିକ ଗ୍ୟାସ୍ ଆମଦାନୀ ଉପରେ ଅଧିକ ନିର୍ଭରଶୀଳ ରହିଛି। ତେବେ ଦେଶରେ କୋଇଲା ଗ୍ୟାସିଫିକେସନ୍କୁ ବ୍ୟାପକ କରାଗଲେ ଏହି ନିର୍ଭରଶୀଳତା ଯଥେଷ୍ଟ କମିବ ବୋଲି ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି। ଭୁବନେଶ୍ୱରରେ ଅନୁଷ୍ଠିତ ଏହି ସମ୍ମିଳନୀରେ ଦେଶ ଓ ବିଦେଶରୁ ଆସିଥିବା ବହୁ ନାମୀଦାମୀ ଶିଳ୍ପପତି ଏବଂ ନିବେଶକ ଯୋଗଦେଇ ଓଡ଼ିଶାରେ ଏହି ପ୍ରକଳ୍ପର ବିକାଶ ନେଇ ଆଶାବ୍ୟକ୍ତ କରିଛନ୍ତି। ଓଡ଼ିଶା ଦେଶର ଅନ୍ୟତମ ପ୍ରମୁଖ କୋଇଲା ଉତ୍ପାଦନକାରୀ ରାଜ୍ୟ ହୋଇଥିବାରୁ, ଏଠାରେ ବ୍ୟାପକ ମାତ୍ରାରେ ଗ୍ୟାସିଫିକେସନ୍ ପ୍ଲାଣ୍ଟ ପ୍ରତିଷ୍ଠା କଲେ ତାହା ଉଭୟ ରାଜ୍ୟ ତଥା ଦେଶର ଅର୍ଥନୀତି ପାଇଁ ବେଶ୍ ଲାଭଦାୟକ ହେବ ।
ଏହାଛଡ଼ା, ପରିବେଶ ପ୍ରଦୂଷଣ ହ୍ରାସ କରିବାରେ ମଧ୍ୟ ଏହି ପ୍ରକ୍ରିୟା ଏକ ବଡ଼ ଭୂମିକା ଗ୍ରହଣ କରିବ। କୋଇଲା ଜାଳିବା ଦ୍ୱାରା ବାୟୁମଣ୍ଡଳକୁ ଯାଉଥିବା ଅଙ୍ଗାରକାମ୍ଳ ଓ ଅନ୍ୟାନ୍ୟ କ୍ଷତିକାରକ ଗ୍ୟାସ୍ ନିର୍ଗମନକୁ ଏହି ଜ୍ଞାନକୌଶଳ ମାଧ୍ୟମରେ ସହଜରେ ରୋକାଯାଇପାରିବ। ସମ୍ମିଳନୀରେ ଉପସ୍ଥିତ ଶିଳ୍ପ ପ୍ରତିନିଧିମାନେ ଦର୍ଶାଇଛନ୍ତି ଯେ, ଏହି ନୂତନ ପ୍ରଯୁକ୍ତିବିଦ୍ୟାକୁ ଆପଣାଇଲେ ରାଜ୍ୟର ଇସ୍ପାତ, ସାର ଏବଂ ରସାୟନ ଶିଳ୍ପ କ୍ଷେତ୍ରରେ ଏକ ବୈପ୍ଳବିକ ପରିବର୍ତ୍ତନ ଆସିପାରିବ।
ବ୍ୟବସାୟିକ ଦୃଷ୍ଟିକୋଣରୁ ଏହି ପ୍ରକଳ୍ପଗୁଡ଼ିକ ସଫଳତାର ସହ କାର୍ଯ୍ୟକାରୀ ହେଲେ ରାଜ୍ୟରେ ହଜାର ହଜାର ଯୁବକଯୁବତୀଙ୍କ ପାଇଁ ନୂତନ ନିଯୁକ୍ତି ସୁଯୋଗ ସୃଷ୍ଟି ହେବ। ‘ଆତ୍ମନିର୍ଭର ଭାରତ’ ଗଠନ ଲକ୍ଷ୍ୟରେ ଓଡ଼ିଶାକୁ ଭବିଷ୍ୟତରେ ଏକ ‘ଗ୍ରୀନ୍ ଏନର୍ଜି ହବ୍’ ବା ସ୍ୱଚ୍ଛ ଶକ୍ତିର ମୁଖ୍ୟ କେନ୍ଦ୍ରସ୍ଥଳୀ ଭାବେ ଗଢ଼ି ତୋଳିବାକୁ ଉପସ୍ଥିତ ଶିଳ୍ପପତି ଓ ନୀତି ନିର୍ଦ୍ଧାରକମାନେ ଆହ୍ୱାନ ଦେଇଛନ୍ତି।
