ସୁଭଦ୍ରା ଯୋଜନା ଟଙ୍କା ପାଇଁ ଜଗତସିଂହପୁରରେ ଜଘନ୍ୟ ହତ୍ୟା: ସ୍ତ୍ରୀକୁ ପିଟିପିଟି ମାରିଦେଲା ନିଶାଡ଼ି ସ୍ୱାମୀ

ଜଗତସିଂହପୁର: ରାଜ୍ୟ ସରକାରଙ୍କ ଜନକଲ୍ୟାଣ ଯୋଜନାକୁ ନେଇ ଏକ ଅଭାବନୀୟ ତଥା ଲୋମହର୍ଷକ କାଣ୍ଡ ସାମ୍ନାକୁ ଆସିଛି। ମହିଳାଙ୍କ ଆର୍ଥିକ ସଶକ୍ତିକରଣ ପାଇଁ ଉଦ୍ଦିଷ୍ଟ ‘ସୁଭଦ୍ରା ଯୋଜନା’ର ଟଙ୍କାକୁ ନେଇ ହୋଇଥିବା ପାରିବାରିକ ବିବାଦ ଏକ ବଡ଼ଧରଣର ହିଂସାର ରୂପ ନେଇଛି । ଜଗତସିଂହପୁର ଜିଲ୍ଲାରେ ଏକ ଘରୋଇ କଳହରୁ ଉତ୍ସନ୍ନ ବିବାଦକୁ କେନ୍ଦ୍ର କରି ଜଣେ ନିଶାଡ଼ି ସ୍ୱାମୀ ନିଜ ପତ୍ନୀଙ୍କୁ ପିଟିପିଟି ହତ୍ୟା କରିଥିବା ଅଭିଯୋଗ ହୋଇଛି। ଏହି ଅଭାବନୀୟ ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି ।

ସୂଚନା ଅନୁଯାୟୀ, ଗତ କିଛି ଦିନ ହେବ ମୃତ ମହିଳା ଜଣକ ‘ସୁଭଦ୍ରା ଯୋଜନା’ରୁ ପାଇଥିବା କିଛି ଅର୍ଥ ବ୍ୟାଙ୍କରୁ ଉଠାଇଥିଲେ। ସେହି ଟଙ୍କା ଖର୍ଚ୍ଚ ଏବଂ ବ୍ୟବହାରକୁ ନେଇ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ପ୍ରତିଦିନ ପାଟିତୁଣ୍ଡ ଓ କଳହ ଲାଗି ରହୁଥିଲା । ଅଭିଯୁକ୍ତ ସ୍ୱାମୀ ଜଣକ ନିଶାସକ୍ତ ଅବସ୍ଥାରେ ସେହି ଟଙ୍କା ନିଜ କାମରେ ଲଗାଇବାକୁ ଚାହୁଁଥିବାବେଳେ ପତ୍ନୀ ଏହାକୁ ଦୃଢ଼ ବିରୋଧ କରିଥିଲେ।

ଘଟଣାଦିନ ସେହି ସୁଭଦ୍ରା ଯୋଜନା ଟଙ୍କାକୁ ନେଇ ଉଭୟଙ୍କ ମଧ୍ୟରେ ପୁଣିଥରେ ଭୟଙ୍କର ଯୁକ୍ତିତର୍କ ହୋଇଥିଲା । ଏହା ପରେ ରାଗିଯାଇ ଅଭିଯୁକ୍ତ ସ୍ୱାମୀ ନିୟନ୍ତ୍ରଣ ହରାଇ ପତ୍ନୀଙ୍କୁ ନିର୍ଧୂମ ମାଡ଼ ମାରିଥିଲା । ଏପରିକି ଏକ କାଠଫାଳିଆ ଦ୍ୱାରା ତାଙ୍କ ଶରୀରର ବିଭିନ୍ନ ସ୍ଥାନରେ ମାରିବାରୁ ସେ ଗୁରୁତର ଭାବେ ଆହତ ହୋଇ ଜମିରେ ଟଳି ପଡ଼ିଥିଲେ । ପରିବାରବର୍ଗ ଓ ସ୍ଥାନୀୟ ଲୋକେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ନିକଟସ୍ଥ ମେଡ଼ିକାଲକୁ ନେଇଥିଲେହେଁ ସେଠାରେ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ ।

ଖବର ପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହି ମାମଲାରେ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତ ସ୍ୱାମୀକୁ ଥାନାରେ ଅଟକ ରଖି ପଚରାଉଚରା ଜାରି ରଖିଛି ।