ନୂଆଦିଲ୍ଲୀ: ହର୍ମୁଜ୍ ପ୍ରଣାଳୀରେ ଟୋଗୋଲିଜ୍ ପତାକାଧାରୀ ଏକ ତେଲ ଟ୍ୟାଙ୍କର ଉପରେ ଆକ୍ରମଣ କରିଛି ଇରାନର ରିଭୋଲ୍ୟୁସନାରୀ ଗାର୍ଡ। ଯାହା ଫଳରେ ଏହି ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଛି।
ଫେବୃଆରୀ ଶେଷ ଭାଗରେ ଆମେରିକା ଏବଂ ଇସ୍ରାଏଲ ଇରାନ ଉପରେ ଆକ୍ରମଣ କରିବା ପରଠାରୁ ତେହେରାନ ପ୍ରଭାବଶାଳୀ ଭାବରେ ଏହି ପ୍ରଣାଳୀକୁ ଅବରୋଧ କରିଛି। ଇସଲାମିକ୍ ଗଣରାଜ୍ୟ ଟ୍ରାଞ୍ଜିଟ୍ ଫି ଲାଗୁ କରିବାକୁ ଚାହୁଁଛି।
ଗୁରୁତ୍ୱପୂର୍ଣ୍ଣ ଜଳପଥକୁ ବେଆଇନ ଭାବରେ ପରିବହନ ପ୍ରୟାସ ଅଭିଯୋଗରେ “ଟୋଗୋ-ପତାକାଯୁକ୍ତ ତେଲ ଟ୍ୟାଙ୍କର ‘ଟ୍ରେଣ୍ଡ’କୁ ଟାର୍ଗେଟ କରାଯାଇଥିଲା ଏବଂ ଏଥିରେ ନିଆଁ ଲାଗିବା ପରେ ଏହାକୁ ଅଟକ ରଖାଯାଇଥିଲା।”
ୟୁନାଇଟେଡ୍ କିଙ୍ଗଡମ୍ ମେରିଟାଇମ୍ ଟ୍ରେଡ୍ ଅପରେସନ୍ସ (UKMTO) ଗୁରୁବାର ଦିନ ଓମାନର ଖାସାବରୁ ୧୬ ନଟିକାଲ୍ ମାଇଲ୍ (29.6 କିଲୋମିଟର) ଉତ୍ତର-ପୂର୍ବରେ ହର୍ମୁଜ୍ ପ୍ରଣାଳୀରେ ଏକ ସୁରକ୍ଷା ଘଟଣାର ଘୋଷଣା କରିଛି। ଆମେରିକୀୟ ସେନାର ପ୍ରରୋଚନାରେ ଜାହାଜ ପଥ ବଦଳାଉଥିବା ଇରାନର ଦାବି କରିଛି। ଏପଟେ ହର୍ମୁଜ ପ୍ରଣାଳୀରେ ଅବୈଧ ଯାତ୍ରା ପାଇଁ ଚେତାବନୀ ଦେଇଛି IRGC। ଅବୈଧ ଯାତ୍ରାର ପରିଣାମ କେବଳ ଜାହାଜର ଧ୍ୱଂସ ବୋଲି କହିଛି ଇରାନ।
ପର୍ସିଆନ୍ ଉପସାଗର ଏବଂ ଓମାନ ଉପସାଗରକୁ ସଂଯୋଗ କରୁଥିବାରୁ ହର୍ମୁଜ୍ ପ୍ରଣାଳୀ ବିଶ୍ୱର ଗୁରୁତ୍ୱପୂର୍ଣ୍ଣ ସାମୁଦ୍ରିକ ପଥ ମଧ୍ୟରୁ ଗୋଟିଏ। ବିଶ୍ୱର ତୈଳ ପରିବହନର ଏକ ବଡ଼ ଅଂଶ ଏହା ଦେଇ ଗତି କରେ। ଏହା ପ୍ରାୟ ୩୦ ମାଇଲ ଚଉଡା ଏବଂ ଇରାନ ଏବଂ ଓମାନ ମଧ୍ୟରେ ଅବସ୍ଥିତ। ଏକ ସୁବ୍ୟବସ୍ଥିତ ଟ୍ରାଫିକ୍ ପୃଥକୀକରଣ ଯୋଜନା (TSS) ମାଧ୍ୟମରେ ପରିଚାଳିତ ଏହି ପଥ ଦେଇ ପ୍ରତିଦିନ ଡଜନ ଡଜନ ଟ୍ୟାଙ୍କର୍ ଯାତାୟାତ କରନ୍ତି।