କାମ କରୁନି ରେଡିଓ କଲାର୍ , ଜଣାପଡୁନି ଯମୁନା ସ୍ଥିତି

ଶିମିଳିପାଳ: କେମିତି ଅଛି ମହାରଷ୍ଟ୍ରର ବାଘୁଣୀ ଯମୁନା? ପାଖାପାଖି ଗୋଟେ ସପ୍ତାହ ବିତିଗଲାଣି, ଜଣାପଡୁନି ବାଘୁଣୀର ଗତିବିଧି । ବାଘୁଣୀର ଗତିବିଧି ଯାଂଚ୍ ପାଇଁ ବେକରେ ଲାଗିଥିଲା ରେଡିଓ କଲାର୍ । ଏବେ ତାର ବ୍ୟାଟେରୀ ସରିଯାଇଥିବାରୁ ବାଘୁଣୀର ଗତିବିଧି ଜଣାପଡୁନି । ଏବେ ଓଡିଶା ବନବିଭାଗ ବାଘୁଣୀ ବେକରୁ ରେଡିଓ କଲାର୍ ହଟାଇବାର ଯୋଜନା କରୁଛି । ସୂଚନା ଅନୁସାରେ ଏହି ରେଡିଓ କଲାର୍ ଏପରି ଡିଜାଇନ କରାଯାଇଛି, ଏହାକୁ ହଟାଇବାରେ ବିଳମ୍ବ ହେଲେ ବି ବାଘୁଣୀର କୌଣସି କ୍ଷତି ହେବ ନାହିଁ । ପାଖାପାଖି ୨ମାସ ହେବ ଯମୁନାର ଗତିବିଧି ଉପରେ ନଜର ରଖିବା ଅସମ୍ଭବ ହୋଇପଡିଥିବା ସୂଚନା ମିଳିଛି । ବେକରେ ଲାଗିଥିବା ରେଡିଓ କଲାର ଓ ଭିଏଚଏଫ୍ ଟ୍ରାକିଂ ସିଷ୍ଟମ ମାଧ୍ୟମରେ ତା ଉପରେ ନଜର ରଖାଯାଉଥିଲା । ଏବେ ରେଡିଓ କଲାର୍ କାମ କରିବା ବନ୍ଦ କରିଦେବାରୁ କିଛି ସପ୍ତାହ ହେବ ପରୋକ୍ଷ ସଙ୍କେତ ଯେମିତିକି ପଂଝା ଚିହ୍ନ ଦେଖି, ଶିକାରର ଅବଶେଷ କିମ୍ବା ତାକୁ ଖୋଜାଖୋଜି କରି ତା ଉପରେ ନଜର ରଖାଯାଉଛି । କ୍ୟାମେରା ଟ୍ରାପିଂରେ ପ୍ରାୟ ଦେଢ ମାସ ପୂର୍ବେ ତାକୁ ଶିମିଳିପାଳ ବ୍ୟାଘ୍ର ସଂରକ୍ଷଣ କ୍ଷେତ୍ରର ମୁଖ୍ୟ ଅଂଚଳରେ ଛଡାଯାଇଥିଲା ଏବଂ ଫଟୋ ମଧ୍ୟ ଉଠିଥିଲା । ଏବେ ରେଡିଓ କଲାର କାମ କରୁନଥିବାରୁ ଶିମିଳିପାଳ ବ୍ୟାଘ୍ର ସଂରକ୍ଷଣ କେନ୍ଦ୍ର ପକ୍ଷରୁ ବାଲେଶ୍ୱର ବନ୍ୟପ୍ରାଣୀ ବିଭାଗକୁ ଏ ସମ୍ପର୍କରେ ପଦକ୍ଷେ ନେବାକୁ ନିଦେ୍ର୍ଦଶ ଦିଆଯାଇଛି । ଏବେ ବାଲେଶ୍ୱର ବନ୍ୟପ୍ରାଣୀ ବିଭାଗ ଯମୁନା ବେକରେ ଲାଗିଥିବା ରେଡିଓ କଲାର ହଟାଇବାକୁ ପ୍ରୟାସ ଆରମ୍ଭ କରିଛି । ଏହି ପ୍ରକ୍ରିୟା ଦୂରରୁ ରିମୋର୍ଟ ମାଧ୍ୟମରେ କରାଯିବ । ଏଥିପାଇଁ ବାଘୁଣୀକୁ ନିଶ୍ଚେତକ ଦେବାର ଆବଶ୍ୟକତା ନାହିଁ । କଲାରରରୁ ବ୍ୟାଟେରୀ ସରିୟାଇଥିଲେ ବି ସେଥିରେ ଏତିକି ତ ଶକ୍ତି ରହିଛି କି ଦୂରରୁ ତାକୁ ବାଘୁଣୀ ବେକରୁ ଖୋଲାଯାଇପାରିବ ବୋଲି ସୂଚନା ମିଳିଛି । ବାଘ ସଂଖ୍ୟ ବଢାଇବାକୁ ୨୦୨୪ ଅକ୍ଟୋବର ୨୮ରେ ମହାରଷ୍ଟ୍ରର ତାଡୋବା ଅନ୍ଧାରୀ ଅଂଚଳରୁ ଶିମିଳିପାଳକୁ ସ୍ଥାନାନ୍ତରିତ ହୋଇଥିବା ପ୍ରଥମ ବାଘୁଣୀ ଥିଲା ଯମୁନା । ସେହିବର୍ଷ ନଭେମ୍ବର ୯ରେ ଶିମିଳିପାଳ ବ୍ୟାଘ୍ର ସଂରକ୍ଷଣ କ୍ଷେତ୍ରର ମୁଖ୍ୟ ଅଂଚଳରେ ଛଡାଯାଇଥିଲା । ପରେ ପରେ କୁଳଡିହା ଅଂଚଳରେ ସେ ରହିବାକୁ ଲାଗିଲା । ଚଳିତ ବର୍ଷ ଜିନତ୍ ନାମକ ବାଘୁଣୀ ୪ଟି ଛୁଆ ଜନ୍ମ ଦେଇଥିଲା । ତେଣୁ ବନ ବିଭାଗ ତାର ରେଡିଓ କଲାର୍ ବାହାର କରିବାକୁ ଯୋଜନା କରିଥିଲା ।