UPI ଛାଡି ନଗଦ ମୁହାଁ ଲୋକେ? ଚାର୍ଜ ଲାଗିବା ଖବର ପରେ ସର୍ଭେରେ ବଡ ଖୁଲାସା, କ୍ୟାସ୍-କାର୍ଡକୁ ଫେରିବେ ୭୬%!
ନୂଆଦିଲ୍ଲୀ: UPI ପେମେଣ୍ଟକୁ ନେଇ ଆସିଛି ବଡ଼ ଖବର। ଅକ୍ଟୋବର ୧୫ରୁ ୨ ହଜାର ଟଙ୍କାରୁ ଅଧିକ ମର୍ଚ୍ଚାଣ୍ଟ ପେମେଣ୍ଟରେ ୦.୪% MDR ଲାଗୁ ହେବାକୁ ଥିବା ବେଳେ, ଏହି ଚାର୍ଜ ଗ୍ରାହକଙ୍କ ଉପରେ ପଡ଼ିଲେ ଲୋକେ UPI ବଦଳରେ କ୍ୟାସ୍ ଓ କାର୍ଡ ବ୍ୟବହାର କରିପାରନ୍ତି ବୋଲି ଏକ ସର୍ଭେରୁ ଜଣାପଡ଼ିଛି।
LocalCircles ପକ୍ଷରୁ ୨୯୧ଟି ଜିଲ୍ଲାର UPI ୟୁଜରଙ୍କୁ ନେଇ ୬୭ ହଜାରରୁ ଅଧିକ ପ୍ରତିକ୍ରିୟା ନିଆଯାଇଥିଲା। ସେଥିରୁ ୩୧,୨୦୬ ଜଣଙ୍କୁ ପଚରାଯାଇଥିଲା, ଯଦି ୨ ହଜାରରୁ ଅଧିକ UPI ପେମେଣ୍ଟରେ ଅତିରିକ୍ତ ଟଙ୍କା ଦେବାକୁ ପଡ଼େ, ତେବେ ସେମାନେ କ’ଣ କରିବେ? ମାତ୍ର ୧୪% ଲୋକ UPIରେ ହିଁ ପେମେଣ୍ଟ କରି ଅତିରିକ୍ତ ଚାର୍ଜ ଦେବେ ବୋଲି କହିଛନ୍ତି। ୨୭% କ୍ୟାସ୍, ୨୬% କ୍ରେଡିଟ୍ କାର୍ଡ ଏବଂ ୧୪% ଡେବିଟ୍ କାର୍ଡକୁ ଯିବେ। ୪% ବ୍ୟାଙ୍କ ଟ୍ରାନ୍ସଫର, NEFT କିମ୍ବା IMPS ବ୍ୟବହାର କରିବେ।
ସର୍ଭେ କହୁଛି, ଦୀର୍ଘମିଆଦିରେ ବଡ଼ ପେମେଣ୍ଟ ପାଇଁ ମଧ୍ୟ UPIରୁ ଲୋକେ ଦୂରେଇପାରନ୍ତି। ୩୭,୬୫୪ ପ୍ରତିକ୍ରିୟା ମଧ୍ୟରୁ ୨୬% କ୍ରେଡିଟ୍ କାର୍ଡ, ୨୬% କ୍ୟାସ୍, ୧୩% ଡେବିଟ୍ କାର୍ଡ ଏବଂ ୧୧% ବ୍ୟାଙ୍କ ଟ୍ରାନ୍ସଫରକୁ ପସନ୍ଦ କରିବେ। ମାତ୍ର ୨୦% UPI ବ୍ୟବହାର ଜାରି ରଖିବେ। ଅର୍ଥାତ୍ ୭୬% ୟୁଜର ବଡ଼ ପେମେଣ୍ଟରେ UPIରୁ ଅନ୍ୟ ବିକଳ୍ପକୁ ଯାଇପାରନ୍ତି।
ଅନ୍ୟପଟେ, ୩୨ ହଜାରରୁ ଅଧିକ ବ୍ୟବସାୟୀଙ୍କୁ ନେଇ ହୋଇଥିବା ଅଲଗା ସର୍ଭେରେ ମାତ୍ର ୧୭% ବ୍ୟବସାୟୀ ୦.୪% MDR ନିଜେ ବହନ କରିବାକୁ ରାଜି ଥିବା କହିଛନ୍ତି। ୪୧% ବ୍ୟବସାୟୀ କୌଣସି MDR ଦେବେ ନାହିଁ ବୋଲି କହିଛନ୍ତି।
ତେବେ ସରକାର ସ୍ପଷ୍ଟ କରିଛନ୍ତି, MDR ଗ୍ରାହକଙ୍କ ଉପରେ ଲାଗିବ ନାହିଁ। ୨ ହଜାର ଟଙ୍କା ପର୍ଯ୍ୟନ୍ତ UPI ପେମେଣ୍ଟ ଏବଂ ବ୍ୟକ୍ତିରୁ ବ୍ୟକ୍ତିକୁ ଟଙ୍କା ପଠାଇବା ମାଗଣା ରହିବ। ଛୋଟ ବ୍ୟବସାୟୀଙ୍କ ପାଇଁ ମଧ୍ୟ ରହିଛି ଛାଡ଼। ସରକାରଙ୍କ ଅନୁସାରେ ପ୍ରାୟ ୯୬% ମର୍ଚ୍ଚାଣ୍ଟ ଟ୍ରାଞ୍ଜାକ୍ସନ୍ ପ୍ରଭାବିତ ହେବ ନାହିଁ।
ଉଦାହରଣ ସ୍ୱରୂପ, ୫ ହଜାର ଟଙ୍କାରେ ୦.୪% MDR ହେଉଛି ୨୦ ଟଙ୍କା, ଆଉ ୫୦ ହଜାର ଟଙ୍କାରେ ଏହା ୨୦୦ ଟଙ୍କା। ଅଗଷ୍ଟ ୨୦୨୬ରେ UPI ରେକର୍ଡ ୨୪.୫୧ ବିଲିୟନ ଟ୍ରାଞ୍ଜାକ୍ସନ୍ କରିଥିଲା, ଯାହାର ମୋଟ ମୂଲ୍ୟ ୨୯.୮୨ ଲକ୍ଷ କୋଟି ଟଙ୍କା। ତେଣୁ ଅକ୍ଟୋବର ୧୫ର ନୂଆ ବ୍ୟବସ୍ଥା UPI ବ୍ୟବହାର ଉପରେ କେତେ ପ୍ରଭାବ ପକାଇବ, ତା’ ଉପରେ ଏବେ ନଜର।