ଏସୀୟ କ୍ରୀଡ଼ା ୨୦୨୬:୨୪ ବର୍ଷ ପରେ ପୁରୁଷଙ୍କଠାରୁ ଆଗରେ ମହିଳା: ୪ଟି ଅଧିକ ସ୍ୱର୍ଣ୍ଣ ଜିତିଲେ, ହକିରେ ମିଳିଲା ଅଲମ୍ପିକ ଟିକେଟ୍
ଆଇଚି-ନାଗୋୟା: ଜାପାନର ଆଇଚି-ନାଗୋୟାରେ ଆୟୋଜିତ ଏସୀୟ କ୍ରୀଡ଼ା ୨୦୨୬ରେ ଭାରତର ଅଭିଯାନ ଶେଷ ହୋଇଛି । ଭାରତ ୨୧ଟି ସ୍ୱର୍ଣ୍ଣ ସହ ମୋଟ ୮୫ଟି ପଦକ ଜିତି ପଦକ ତାଲିକାରେ ଚତୁର୍ଥ ସ୍ଥାନରେ ରହିଛି । ୨୦୦୨ ପରେ ଭାରତ ଏଥର ମହିଳା ବିଭାଗରେ ୧୧ଟି ଏବଂ ପୁରୁଷ ବିଭାଗରେ ୭ଟି ସ୍ୱର୍ଣ୍ଣ ପଦକ ଜିତିଛି । ଅନ୍ୟ ୩ଟି ସ୍ୱର୍ଣ୍ଣ ମିକ୍ସଡ୍ ଇଭେଣ୍ଟରୁ ଆସିଛି । ଏହା ପୂର୍ବରୁ ୨୦୦୨ ବୁସାନ୍ ଏସୀୟ କ୍ରୀଡ଼ାରେ ଭାରତୀୟ ମହିଳାମାନେ ଅଧିକ ସ୍ୱର୍ଣ୍ଣ ଜିତିଥିଲେ । ୨୦୨୩ ହାଙ୍ଗଝୁ ଏସୀୟ କ୍ରୀଡ଼ାରେ ଭାରତ ୨୮ଟି ସ୍ୱର୍ଣ୍ଣ ସହ ମୋଟ ୧୦୬ଟି ପଦକ ଜିତିଥିଲା । ଗତଥର ସୁଟିଂରେ ୭ଟି ଓ ଆଥଲେଟିକ୍ସରେ ୬ଟି ସ୍ୱର୍ଣ୍ଣ ମିଳିଥିବା ବେଳେ ଏଥର ସୁଟିଂରୁ ୩ଟି ଓ ଆଥଲେଟିକ୍ସରୁ ମାତ୍ର ୧ଟି ସ୍ୱର୍ଣ୍ଣ ମିଳିଛି । ତେବେ ଗତଥର ଶୂନ୍ୟରେ ରହିଥିବା ବକ୍ସିଂ (୩ ସ୍ୱର୍ଣ୍ଣ) ଏବଂ କୁସ୍ତି (୨ ସ୍ୱର୍ଣ୍ଣ) ଏଥର ସ୍ୱର୍ଣ୍ଣ ସଂଖ୍ୟାରେ ସୁଧାର ଆଣିଛନ୍ତି ।
ଦଳଗତ କ୍ରୀଡ଼ାରେ ଭାରତ ଚମତ୍କାର ପ୍ରଦର୍ଶନ କରିଛି । କ୍ରିକେଟ୍, ହକି ଏବଂ କବାଡ଼ିରେ ଭାରତୀୟ ପୁରୁଷ ଓ ମହିଳା ଉଭୟ ଟିମ୍ ସ୍ୱର୍ଣ୍ଣ ପଦକ ଜିତିଛନ୍ତି । ଏସୀୟ କ୍ରୀଡ଼ା ହକିରେ ସ୍ୱର୍ଣ୍ଣ ଜିତିବା ଫଳରେ ଭାରତୀୟ ପୁରୁଷ ଓ ମହିଳା ଉଭୟ ଟିମ୍ ୨୦୨୮ ଲସ୍ ଏଞ୍ଜେଲସ୍ ଅଲମ୍ପିକ ପାଇଁ ସିଧାସଳଖ କ୍ୱାଲିଫାଇ କରିଛନ୍ତି । ଚୀନ୍ ଏଥର ୧୬୯ଟି ସ୍ୱର୍ଣ୍ଣ ସହ ମୋଟ ୩୪୧ଟି ପଦକ ଜିତି ପ୍ରଥମ ସ୍ଥାନରେ ରହିଛି । ଦ୍ୱିତୀୟ ସ୍ଥାନରେ ଥିବା ଆୟୋଜକ ଜାପାନ ୮୩ଟି ସ୍ୱର୍ଣ୍ଣ ଜିତିଛି । ୧୯୮୨ ମସିହାରୁ ଚୀନ୍ ନିରନ୍ତର ଭାବେ ଏସୀୟ କ୍ରୀଡ଼ାରେ ନମ୍ବର-୧ ସ୍ଥାନ ବଜାୟ ରଖିଛି । ଏହି ଏସୀୟ କ୍ରୀଡ଼ାରେ ମୋଟ ୫୩ଟି ୱାର୍ଲ୍ଡ ରେକର୍ଡ ଏବଂ ୭୬ଟି ଏସିଆନ୍ ରେକର୍ଡ ଭାଙ୍ଗିଛି । ଭାରତୀୟ ମହିଳା କମ୍ପାଉଣ୍ଡ ତୀରନ୍ଦାଜୀ ଟିମ୍ ଫାଇନାଲ୍ରେ ଚୀନ୍ ବିପକ୍ଷରେ ୨୩୮ ପଏଣ୍ଟ ସ୍କୋର କରି ବିଶ୍ୱ ରେକର୍ଡର ସମକକ୍ଷ ହୋଇଛନ୍ତି ।
