ସାଉଦି ଆରବ ବିମାନବନ୍ଦରରେ କ୍ଷେପଣାସ୍ତ୍ର ମାଡ଼: ଜଣେ ଭାରତୀୟ ମୃତ, ଦୁଇ ପୁଅ ହସ୍ପିଟାଲରେ ଭର୍ତ୍ତି

ରୀୟାଦ: ସାଉଦି ଆରବର ରୀୟାଦ ସ୍ଥିତ କିଙ୍ଗ ଖାଲିଦ୍ ଆନ୍ତର୍ଜାତୀୟ ବିମାନବନ୍ଦରରେ ହୋଇଥିବା ଭୟଙ୍କର କ୍ଷେପଣାସ୍ତ୍ର ଆକ୍ରମଣରେ ଜଣେ ଭାରତୀୟ ନାଗରିକଙ୍କ ମୃତ୍ୟୁ ହୋଇଛି। ମୃତ ବ୍ୟକ୍ତି ଜଣକ ହାଇଦ୍ରାବାଦର ମେଦୀପଟ୍ଟନମ ଅଞ୍ଚଳର ମହମ୍ମଦ ୟୁସୁଫ୍ ଅଲ୍ଲୀ ବୋଲି ଜଣାପଡ଼ିଛି। ଏହି ଆକ୍ରମଣରେ ତାଙ୍କର ଦୁଇ ଜଣ ପୁଅ ଏବଂ ଅନ୍ୟ ପରିବାର ସଦସ୍ୟ ମଧ୍ୟ ଗୁରୁତର ଭାବେ ଆହତ ହୋଇ ହସ୍ପିଟାଲରେ ଚିକିତ୍ସାଧୀନ ଅଛନ୍ତି।

ସୂଚନା ଅନୁଯାୟୀ, ୟୁସୁଫ୍ ଅଲ୍ଲୀ ଏବଂ ତାଙ୍କ ପରିବାର ତୀର୍ଥଯାତ୍ରା ପାଇଁ ସାଉଦି ଆରବ ଯାଇଥିଲେ ଏବଂ ମଦିନା ଯିବା ପୂର୍ବରୁ ବିମାନବନ୍ଦରରେ ଉପସ୍ଥିତ ଥିଲେ। ଏହି ସମୟରେ ହୋଇଥିବା କ୍ଷେପଣାସ୍ତ୍ର ଆକ୍ରମଣରେ ସେ ଗୁରୁତର ଆହତ ହୋଇ ପ୍ରାଣ ହରାଇଥିଲେ। ଆକ୍ରମଣରେ ତାଙ୍କର ଦୁଇ ପୁଅଙ୍କ ମଧ୍ୟରୁ ଜଣେ ଅସ୍ତ୍ରୋପଚାର ପାଇଁ ହସ୍ପିଟାଲରେ ଥିବାବେଳେ, ଅନ୍ୟ ଜଣଙ୍କର ଗୋଡ଼ କ୍ଷତିଗ୍ରସ୍ତ ହୋଇଛି ଏବଂ ସେ ମଧ୍ୟ ଚିକିତ୍ସାଧୀନ ଅଛନ୍ତି।

ଏହି ଆକ୍ରମଣ ପରେ ବିମାନବନ୍ଦର ପରିସରରେ ପ୍ରବଳ ଆତଙ୍କ ଓ ବିଶୃଙ୍ଖଳା ଦେଖାଦେଇଥିଲା। ସୁରକ୍ଷା ବାହିନୀ ତୁରନ୍ତ ସମଗ୍ର ଅଞ୍ଚଳକୁ ଘେରି ରହି ଆହତମାନଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରିଥିଲେ। ୟୁସୁଫ୍ ଅଲ୍ଲୀଙ୍କ ପରିବାର ସଦସ୍ୟମାନେ ହଠାତ୍ ଘଟିଯାଇଥିବା ଏହି ଦୁର୍ଘଟଣାରେ ସମ୍ପୂର୍ଣ୍ଣ ସ୍ତବ୍ଧ ହୋଇପଡ଼ିଛନ୍ତି। ଘଟଣାକୁ ନେଇ ସାଉଦି ଆରବ ସ୍ଥିତ ଭାରତୀୟ ଦୂତାବାସ ଏବଂ ସ୍ଥାନୀୟ ସାଂସଦ ଅସୁଦ୍ଦିନ ଓୱାଇସି ଗଭୀର ଶୋକ ପ୍ରକାଶ କରିଛନ୍ତି। ଭାରତୀୟ ଦୂତାବାସ ପକ୍ଷରୁ କୁହାଯାଇଛି ଯେ, ମୃତଦେହକୁ ଶୀଘ୍ର ଭାରତକୁ ଫେରାଇ ଆଣିବା ଏବଂ ଆହତଙ୍କୁ ସମସ୍ତ ପ୍ରକାର ଚିକିତ୍ସା ସହାୟତା ଯୋଗାଇ ଦେବା ପାଇଁ ସମସ୍ତ ବ୍ୟବସ୍ଥା କରାଯାଉଛି। ବୈଦେଶିକ ବ୍ୟାପାର ମନ୍ତ୍ରଣାଳୟ ମଧ୍ୟ ପରିବାରବର୍ଗଙ୍କ ସମ୍ପର୍କରେ ରହି ଜରୁରୀ ସହାୟତାର ପ୍ରତିଶ୍ରୁତି ଦେଇଛି