ଗର୍ଭବତୀ ସାମ୍ବାଦିକାଙ୍କୁ ଧକ୍କା ମାମଲା: ତେଜିଲା ରାହୁଲ ଗାନ୍ଧୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି
ନୂଆଦିଲ୍ଲୀ: ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ବିରୋଧରେ ମହିଳା ସାମ୍ବାଦିକା ଦୁର୍ବ୍ୟବହାର ଏବଂ ଠେଲାପେଲା କରିଥିବା ନେଇ ଦିଲ୍ଲୀ ଡିସିପିଙ୍କ ନିକଟରେ ଅଭିଯୋଗ କରିଛନ୍ତି। ଜାତୀୟ ଗଣମାଧ୍ୟମର ସାମ୍ବାଦିକା ରିଚା ପରାଶର ନୂଆଦିଲ୍ଲୀ ଡିସିପିଙ୍କ ନିକଟରେ ଏହି ଅଭିଯୋଗ ଦାଖଲ କରି ରାହୁଲ ଗାନ୍ଧୀ ଏବଂ ତାଙ୍କ ସହଯୋଗୀଙ୍କ ବିରୋଧରେ ତୁରନ୍ତ FIR ରୁଜୁ କରିବାକୁ ଦାବି କରିଛନ୍ତି।
ମହିଳା ସାମ୍ବାଦିକଙ୍କ ଦ୍ୱାରା ଦାଖଲ କରାଯାଇଥିବା ଅଭିଯୋଗରେ BNSS ୨୦୨୩ର ବ୍ୟବସ୍ଥା ଅନୁଯାୟୀ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି। ଅକ୍ଟୋବର ୧୨ ତାରିଖରେ ବିରୋଧୀ ଦଳ (INDIA Bloc) ପକ୍ଷରୁ ସୁପ୍ରିମକୋର୍ଟ ସମ୍ମୁଖରେ ଏକ ପ୍ରତିବାଦ ମାର୍ଚ୍ଚ କରାଯାଉଥିଲା। ସାମ୍ବାଦିକା ରିଚା ପରାଶର ପ୍ରତିକ୍ରିୟା ନେବା ପାଇଁ ସୁପ୍ରିମକୋର୍ଟ ପରିସରରେ ଅପେକ୍ଷା କରିଥିବା ବେଳେ ରାହୁଲ ଗାନ୍ଧୀ ତାଙ୍କ ହାତକୁ ଜୋରରେ ଭିଡ଼ି ଦେଇଥିଲେ, ଯାହାଫଳରେ ସେ ସେଠାରେ ଥିବା ପାହାଚ ଉପରେ ପଡ଼ିଯାଇଥିଲେ। ସୂଚନା ଅନୁସାରେ, ଅଭିଯୋଗକାରୀ ସାମ୍ବାଦିକା ଜଣକ ୩ ମାସର ଗର୍ଭବତୀ ଥିଲେ। ଏହି ଘଟଣା ପରେ ସେ ଆହତ ହୋଇ ୩ ଦିନ ଧରି ମାସିକ ଡାକ୍ତରଖାନାରେ ଚିକିତ୍ସିତ ହେଉଥିଲେ ଏବଂ ସୁସ୍ଥ ହେବା ପରେ ଏହି ମାମଲା ଦାୟର କରିଛନ୍ତି।
ଏହି ଘଟଣାକୁ ନେଇ କୋର୍ଟରେ ଏକ ଆବେଦନ କରାଯାଇଛି, ଯାହାର ଶୁଣାଣି ଅକ୍ଟୋବର ୨୬ କିମ୍ବା ୨୭ ତାରିଖରେ ହେବ ବୋଲି ପ୍ରଧାନ ବିଚାରପତିଙ୍କୁ ନେଇ ଗଠିତ ଖଣ୍ଡପୀଠ ସ୍ପଷ୍ଟ କରିଛନ୍ତି। ଏଥିସହ ଘଟଣା ସମୟର CCTV ଫୁଟେଜ୍ ସୁରକ୍ଷିତ ରଖିବାକୁ ମଧ୍ୟ ଅନୁରୋଧ କରାଯାଇଛି। ଦିଲ୍ଲୀ ପୋଲିସ ଏହି ଅଭିଯୋଗ ଆଧାରରେ ତଦନ୍ତ ଆରମ୍ଭ କରିଛି ଏବଂ ସେଠାରେ ଉପସ୍ଥିତ ଥିବା ଲୋକଙ୍କ ସାକ୍ଷ୍ୟ ସହ ଭିଡିଓ ଫୁଟେଜ୍ର ଯାଞ୍ଚ କରୁଛି। ଏହି ଘଟଣାକୁ ନେଇ ବିଜେପି, କଂଗ୍ରେସକୁ ଏବଂ ରାହୁଲ ଗାନ୍ଧୀଙ୍କୁ ତୀବ୍ର ସମାଲୋଚନା କରିଥିବା ବେଳେ କଂଗ୍ରେସ ଏହି ସମସ୍ତ ଅଭିଯୋଗକୁ ସମ୍ପୂର୍ଣ୍ଣ ମିଥ୍ୟା ଓ ଭିତ୍ତିହୀନ ପ୍ରଚାର ବୋଲି କହି ପ୍ରତ୍ୟାଖ୍ୟାନ କରିଛି। ସାମ୍ବାଦିକ ଗର୍ଭବତୀ ଥିବା ଯୋଗୁଁ ଏହି ପ୍ରସଙ୍ଗ ଅଧିକ ସରଗରମ ହୋଇଛି।