ମୁମ୍ବାଇ: ଟାଇଗର ଶ୍ରଫଙ୍କ ଉପରେ ହୋଇଥିବା ମାରାତ୍ମକ ଆକ୍ରମଣ ପରେ ଚଳଚ୍ଚିତ୍ର ଜଗତରେ ଆତଙ୍କ ଖେଳିଯାଇଛି। ୧୮ ଅକ୍ଟୋବର ସନ୍ଧ୍ୟାରେ ଜୁହୁ ଅଞ୍ଚଳରେ ଟାଇଗର ଶ୍ରଫଙ୍କ କାର ଉପରକୁ ଗୁଳି ଚାଳନା କରାଯାଇଥିଲା। ଯାହାପରେ ସଲମାନ୍ ଖାନ୍ କଡ଼ା ସୁରକ୍ଷା ମଧ୍ୟରେ ରହିଥିବା ଦେଖିବାକୁ ମିଳିଛି।
ରିପୋର୍ଟ ଅନୁଯାୟୀ ଲରେନ୍ସ ବିଷ୍ନୋଇ ଗ୍ୟାଙ୍ଗ ଏହି ଆକ୍ରମଣର ଦାୟିତ୍ୱ ନେଇଥିଲା ଏବଂ ସଲମାନ ଖାନଙ୍କ ସହ କାମ କରିଥିବା ଯେକୌଣସି ବ୍ୟକ୍ତିଙ୍କ ସହିତ ସମାନ ଅବସ୍ଥା ହେବ ବୋଲି ଧମକ ଦେଇଥିଲା। ଏହା ପରେ କଡ଼ା ସୁରକ୍ଷା ମଧ୍ୟରେ ସଲମାନ ଖାନଙ୍କୁ ପ୍ରଥମ ଥର ପାଇଁ ମୁମ୍ବାଇର ବିମାନବନ୍ଦର ବାହାରେ ଦେଖିବାକୁ ମିଳିଥିଲା।
୨୦ ଅକ୍ଟୋବର ସକାଳେ ସଲମାନ ଖାନଙ୍କୁ ମୁମ୍ବାଇ ବିମାନବନ୍ଦରରେ ପୂର୍ବ ଅପେକ୍ଷା ଅଧିକ ସୁରକ୍ଷା କର୍ମୀ ଘେରି ରହିଥିବା ଦେଖିବାକୁ ମିଳିଥିଲା। ସ୍ୱତନ୍ତ୍ର ସୁରକ୍ଷା ୟୁନିଟ୍ କର୍ମଚାରୀମାନେ ହାତରେ ବନ୍ଧୁକ ଧରି ତାଙ୍କ ଚାରିପାଖରେ ମୁତୟନ ହୋଇଥିବା ଦେଖାଯାଇଥିଲା।
ରିପୋର୍ଟ ଅନୁଯାୟୀ, ସଲମାନ ଖାନଙ୍କ ସମ୍ପୃକ୍ତି ଯୋଗୁଁ ଲରେନ୍ସ ବିଷ୍ନୋଇ ଗ୍ୟାଙ୍ଗ ଅନ୍ୟ ବଲିଉଡ ସେଲିବ୍ରିଟିମାନଙ୍କୁ ମଧ୍ୟ ଟାର୍ଗେଟ କରୁଛି। ସେମାନଙ୍କର ସଲମାନ ଖାନଙ୍କ ସହିତ ଶତ୍ରୁତା ଅଛି ଏବଂ ଏହି ଗ୍ୟାଙ୍ଗ ୨୦୨୪ ମସିହାରେ ସଲମାନ ଖାନଙ୍କ ଘର ଉପରକୁ ଗୁଳି ଚଳାଇଥିଲା। ୧୪ ଏପ୍ରିଲ ୨୦୨୪ ରେ ଦୁଇ ଜଣ ବାଇକ ଆରୋହୀ ସକାଳ ୫ଟା ସମୟରେ ମୁମ୍ବାଇର ବାନ୍ଦ୍ରାରେ ସଲମାନ ଖାନଙ୍କ ଗାଲାକ୍ସି ଆପାର୍ଟମେଣ୍ଟ ବାହାରେ ଅନେକ ରାଉଣ୍ଡ ଗୁଳି ଚଳାଇଥିଲେ।
ଏହି ଘଟଣା ପରେ ଲରେନ୍ସ ବିଷ୍ନୋଇ ଗ୍ୟାଙ୍ଗ ସାମ୍ନାକୁ ଆସିଥିଲା। ଗୁଳିକାଣ୍ଡ ପରେ ଲରେନ୍ସ ବିଷ୍ନୋଇଙ୍କ ଭାଇ ଅନମୋଲ ବିଷ୍ନୋଇଙ୍କ ନାମରେ ଏକ ଫେସବୁକ୍ ପୋଷ୍ଟରେ ଆକ୍ରମଣ ପାଇଁ ଦାୟୀ ବୋଲି ଦାବି କରିଥିଲା। ପୋଷ୍ଟଟି ସଲମାନ ଖାନଙ୍କୁ ଧମକ ଦେଇ କହିଥିଲା ଯେ ଏହା କେବଳ ଏକ ଟ୍ରେଲର ଥିଲା ଏବଂ ଏହାକୁ ପ୍ରଥମ ଓ ଶେଷ ଚେତାବନୀ ବୋଲି କୁହାଯାଇଥିଲା।