Egg thrown near Durga idol immersion: ମା’ ଦୁର୍ଗାଙ୍କ ବିସର୍ଜନ ଶୋଭାଯାତ୍ରାରେ ଅଣ୍ଡା ଫିଙ୍ଗାଯିବା ପରେ ଉତ୍ତେଜନା;ମାମଲା ରୁଜୁ, ଜଣେ ସନ୍ଦିଗ୍ଧ ଅଟକ
ହାଇଦ୍ରାବାଦ:ତେଲେଙ୍ଗାନାର ରାଜଧାନୀ ହାଇଦ୍ରାବାଦରେ ମା’ ଦୁର୍ଗାଙ୍କ ମୂର୍ତ୍ତି ବିସର୍ଜନ ଶୋଭାଯାତ୍ରାରେ ଅଣ୍ଡା ଫିଙ୍ଗାଯାଇଥିବା ଅଭିଯୋଗ ପରେ ଉତ୍ତେଜନା ଦେଖାଦେଇଛି। ଏହି ଘଟଣା ରବିବାର ଭୋର ପ୍ରାୟ ୨ଟା ସମୟରେ ପୁରୁଣା ସହର (Old City) ଅଞ୍ଚଳର ମଦନ୍ନାପେଟ ଥାନା ଅଧୀନ ଅଞ୍ଚଳରେ ଘଟିଛି। ଏହାକୁ ନେଇ ଶୋଭାଯାତ୍ରାରେ ସାମିଲ ଥିବା ଭକ୍ତ ଏବଂ ବିଭିନ୍ନ ହିନ୍ଦୁ ସଂଗଠନର ସଦସ୍ୟମାନେ ବିକ୍ଷୋଭ ପ୍ରଦର୍ଶନ କରିବା ସହ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି। ପୋଲିସ ଏହି ଘଟଣାରେ ଜଣେ ସନ୍ଦିଗ୍ଧ ବ୍ୟକ୍ତିଙ୍କୁ ଅଟକ ରଖିଛି।
ପୋଲିସର ସୂଚନା ଅନୁଯାୟୀ, ‘ବୀର ସାବରକର ନବ ଯୁବ ସଂଘ’ ପକ୍ଷରୁ ଦୁର୍ଗା ପ୍ରତିମା ବିସର୍ଜନ ପାଇଁ ଏକ ଶୋଭାଯାତ୍ରା ବାହାର କରାଯାଇଥିଲା। ଶୋଭାଯାତ୍ରାଟି ଏକ ରାସ୍ତା ଦେଇ ଯାଉଥିବା ସମୟରେ, ସେଠାରେ ଅଣ୍ଡା ଫୋପଡାଯାଇଥିଲା । ଘଟଣା ବିଷୟରେ ଖବର ପାଇ ମଦନ୍ନାପେଟ ଥାନାର ପୋଲିସ ଘଟଣାସ୍ଥଳରେ ପହଞ୍ଚିଥିଲା ଏବଂ ପରିସ୍ଥିତିକୁ ନିୟନ୍ତ୍ରଣକୁ ଆଣିବାକୁ ଚେଷ୍ଟା କରିଥିଲା।
ପୋଲିସ ଅଧିକାରୀମାନେ ଜଣାଇଛନ୍ତି ଯେ ଶୋଭାଯାତ୍ରା ନିକଟରେ ଏକ ଅଣ୍ଡା ପଡ଼ିଥିଲା। ଘଟଣା ବିଷୟରେ ଜାଣିବା ପରେ ବରିଷ୍ଠ ପୋଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ଶୋଭାଯାତ୍ରାର ଆୟୋଜକମାନଙ୍କ ସହ କଥାବାର୍ତ୍ତା କରି ପରିସ୍ଥିତିକୁ ନିୟନ୍ତ୍ରଣକୁ ଆଣିବା ପାଇଁ ପଦକ୍ଷେପ ନେଇଥିଲେ। ଏହି ଘଟଣା ପରେ ସେହି ଅଞ୍ଚଳରେ କିଛି ସମୟ ପାଇଁ ଉତ୍ତେଜନା ଦେଖାଦେଇଥିଲା; ତେବେ ଅଧିକାରୀଙ୍କ କହିବା ଅନୁଯାୟୀ, ବର୍ତ୍ତମାନ ପରିସ୍ଥିତି ଶାନ୍ତିପୂର୍ଣ୍ଣ ରହିଛି।
ପୋଲିସ ଭାରତୀୟ ନ୍ୟାୟ ସଂହିତା (BNS) ର ଧାରା ୨୯୯ ଅଧୀନରେ ଏକ ମାମଲା ରୁଜୁ କରିଛି। ଏହି ଧାରାଟି କୌଣସି ଗୋଷ୍ଠୀର ଧାର୍ମିକ ଭାବନାକୁ ଆଘାତ ଦେବା ଉଦ୍ଦେଶ୍ୟରେ, ସେମାନଙ୍କ ଧର୍ମ କିମ୍ବା ଧାର୍ମିକ ବିଶ୍ୱାସକୁ ଜାଣିଶୁଣି ଏବଂ ଦୁର୍ଭାବନାପୂର୍ଣ୍ଣ ଭାବେ ଅପମାନିତ କରିବା ସହ ଜଡ଼ିତ। ଅଧିକାରୀଙ୍କ ସୂଚନା ଅନୁଯାୟୀ, ଜଣେ ସନ୍ଦିଗ୍ଧ ବ୍ୟକ୍ତିଙ୍କୁ ହେପାଜତକୁ ନିଆଯାଇଛି। ଘଟଣା ସମ୍ପର୍କରେ ବିସ୍ତୃତ ତଥ୍ୟ ସଂଗ୍ରହ କରିବା ପାଇଁ ପୁଲିସ ସିସିଟିଭି (CCTV) ଫୁଟେଜ୍ ଯାଞ୍ଚ କରୁଛି। ତଦନ୍ତ ଆଧାରରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ପୋଲିସ ଜନସାଧାରଣଙ୍କୁ ଅନୁରୋଧ କରିଛି ଯେ ସେମାନେ ଏହି ଘଟଣା ସମ୍ପର୍କରେ କୌଣସି ଗୁଜବ ପ୍ରଚାର କରନ୍ତୁ ନାହିଁ ଏବଂ ଶାନ୍ତି ବଜାୟ ରଖନ୍ତୁ। ଏହି ଘଟଣାର ବିସ୍ତୃତ ତଦନ୍ତ ଚାଲିଛି।