ରାହୁଲଙ୍କ ଆହ୍ୱାନ: ‘ନଭେମ୍ବର ୧ ରାଲିରେ ଏକାଠି ହୁଅନ୍ତୁ, ନିଜ ହକ୍ ପାଇଁ ସ୍ୱର ଉତ୍ତୋଳନ କରନ୍ତୁ’

ନୂଆଦିଲ୍ଲୀ: ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ ନଭେମ୍ବର ୧ ତାରିଖରେ ନୂଆଦିଲ୍ଲୀର ରାମଲୀଳା ମୈଦାନଠାରେ ହେବାକୁ ଥିବା “ଭୋଟ୍ ବଞ୍ଚାଅ, ଦେଶ ବଞ୍ଚାଅ” ମହାରାଲି ଏବଂ ପଦଯାତ୍ରାରେ ସାମିଲ ହେବା ପାଇଁ ଦେଶବାସୀଙ୍କୁ ଆହ୍ୱାନ ଦେଇଛନ୍ତି। ରାଲିର ମୁଖ୍ୟ ଉଦ୍ଦେଶ୍ୟ ହେଉଛି ଭୋଟର ତାଲିକାରୁ ବ୍ୟାପକ ଭାବେ ନାମ କଟାଯିବା ଏବଂ ନିର୍ବାଚନ ପ୍ରକ୍ରିୟାରେ ହେଉଥିବା ଅନିୟମିତତା (ଭୋଟ୍ ଚୋରି) ବିରୋଧରେ ଇଣ୍ଡିଆ (INDIA) ମେଣ୍ଟ ପକ୍ଷରୁ ଏହି ପ୍ରତିବାଦ ସଭା କରାଯାଉଛି।

ଏହି ସମୟରେ ରାହୁଲ ଗାନ୍ଧୀ ଏକ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ଦେଶର ଛାତ୍ର, ଚାଷୀ, ଶ୍ରମିକ, ମହିଳା, ଯୁବପିଢ଼ି ଓ ବ୍ୟବସାୟୀଙ୍କୁ ଗଣତନ୍ତ୍ର ଓ ସମ୍ବିଧାନର ସୁରକ୍ଷା ପାଇଁ ଏହି ‘ଦିଲ୍ଲୀ ଚଲୋ’ ଅଭିଯାନରେ ଯୋଗଦେବାକୁ ନିବେଦନ କରିଛନ୍ତି। ସେ ଆନ୍ଦୋଳନକାରୀଙ୍କୁ ପୋଲିସର ଲାଠିଚାର୍ଜ କିମ୍ବା କୌଣସି କାର୍ଯ୍ୟାନୁଷ୍ଠାନକୁ ଭୟ ନକରି ଆଗକୁ ବଢ଼ିବାକୁ କହିଛନ୍ତି। ସୋସିଆଲ ମିଡିଆରେ ଏକ ଭିଡିଓ ପୋଷ୍ଟ କରି ରାହୁଲ ଗାନ୍ଧୀ କହିଛନ୍ତି ଯେ ଏହି ପଦଯାତ୍ରାର ଉଦ୍ଦେଶ୍ୟ ହେଉଛି ଗଣତନ୍ତ୍ରକୁ ବଞ୍ଚାଇବା, ଭୋଟ ଚୋରି ରୋକିବା ଏବଂ ସମ୍ବିଧାନକୁ ସୁରକ୍ଷା ଦେବା। ସେ କହିଛନ୍ତି ଯେ ଏହା କୌଣସି ଗୋଟିଏ ରାଜନୈତିକ ଦଳର କାର୍ଯ୍ୟକ୍ରମ ନୁହେଁ, ବରଂ “ଭାରତର ଆତ୍ମା” ପାଇଁ ଏହା ଏକ ଆନ୍ଦୋଳନ।

ଦୀପାବଳି ପାର୍ବଣ ସମୟରେ ଏହି ରାଲି ଯୋଗୁଁ ଦିଲ୍ଲୀର ପ୍ରମୁଖ ୨୦ଟି ବଜାରରେ ବ୍ୟବସାୟ ବାଧାପ୍ରାପ୍ତ ହେବା ଆଶଙ୍କା କରି ଦିଲ୍ଲୀର ‘ଚାମ୍ବର ଅଫ୍ ଟ୍ରେଡ୍ ଆଣ୍ଡ ଇଣ୍ଡଷ୍ଟ୍ରି’ (CTI) ଏହି ରାଲିକୁ ସ୍ଥଗିତ ରଖିବାକୁ କିମ୍ବା ସ୍ଥାନ ପରିବର୍ତ୍ତନ କରିବାକୁ ରାହୁଲ ଗାନ୍ଧୀଙ୍କୁ ଅନୁରୋଧ କରିଛି। ଅନ୍ୟପଟେ ବିରୋଧୀ ଦଳ ଅଭିଯୋଗ କରିଛନ୍ତି ଯେ ପ୍ରକୃତ ଭୋଟରଙ୍କ ନାମ ଭୋଟର ତାଲିକାରୁ ବାଦ ଦିଆଯାଇଛି ଏବଂ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବି କରିଛନ୍ତି। କଂଗ୍ରେସ କହିଛି ଯେ ଏହି ରାଲି “ଦିଲ୍ଲୀ ଚଲୋ” ପଦଯାତ୍ରାର ଶେଷ ପର୍ଯ୍ୟାୟ ହେବ ଏବଂ ଦାବି କରିଛି ଯେ ଅତି କମରେ ୧୦ ଲକ୍ଷ ଲୋକ ଯୋଗ ଦେବେ। ଏହି କାର୍ଯ୍ୟକ୍ରମ ପାଇଁ ଦଳ ବିଭିନ୍ନ ରାଜ୍ୟରେ ତାର ନେତା ଏବଂ କର୍ମୀଙ୍କୁ ସଂଗ୍ରହ କରୁଛି।