Stealth Ships: ନୌସେନାର ଶକ୍ତି ବଢ଼ାଇବ ୪୦ ହଜାର କୋଟିର ଯୁଦ୍ଧ ଜାହାଜ! ରାଡାର୍କୁ ଚକ୍ମା ଦେବ ଭାରତର ନୂଆ ଷ୍ଟେଲ୍ଥ କର୍ଭେଟ୍!
ନୂଆଦିଲ୍ଲୀ: ଭାରତୀୟ ନୌସେନାର ସାମରିକ କ୍ଷମତା ବଢ଼ାଇବାକୁ କେନ୍ଦ୍ର ସରକାରଙ୍କ ବଡ଼ ପଦକ୍ଷେପ। ୪୦ ହଜାର କୋଟି ଟଙ୍କାରୁ ଅଧିକ ବ୍ୟୟରେ ନିର୍ମାଣ ହେବ ୮ଟି ଅତ୍ୟାଧୁନିକ ଯୁଦ୍ଧ ଜାହାଜ। ଏହି ଜାହାଜଗୁଡ଼ିକୁ କୁହାଯାଉଛି ନେକ୍ସଟ୍ ଜେନେରେସନ୍ କର୍ଭେଟ୍ (NGC)। ଏହାର ଡିଜାଇନ୍ଠାରୁ ଆରମ୍ଭ କରି ନିର୍ମାଣ ପର୍ଯ୍ୟନ୍ତ ଅଧିକାଂଶ କାମ ଭାରତରେ ହେବ। ଏହାଦ୍ୱାରା ସମୁଦ୍ରରେ ଭାରତର ସୁରକ୍ଷା ବ୍ୟବସ୍ଥା ଆହୁରି ମଜଭୁତ ହେବା ସହ ଦେଶର ପ୍ରତିରକ୍ଷା ଉତ୍ପାଦନ କ୍ଷେତ୍ରକୁ ମଧ୍ୟ ବଡ଼ ପ୍ରୋତ୍ସାହନ ମିଳିବ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବୁଧବାର ବସିଥିବା କ୍ୟାବିନେଟ୍ କମିଟି ଅନ୍ ସିକ୍ୟୁରିଟି (CCS) ଏହି ପ୍ରକଳ୍ପକୁ ମଞ୍ଜୁରୀ ଦେଇଛି। ଏହା ଦୀର୍ଘ ସମୟ ପରେ ସର୍ବୋଚ୍ଚ ସ୍ତରରେ ଅନୁମୋଦନ ପାଇଥିବା ଏକ ବଡ଼ ପ୍ରତିରକ୍ଷା ପ୍ରକଳ୍ପ ବୋଲି ସୂତ୍ରରୁ ଜଣାପଡ଼ିଛି। ଆସନ୍ତା କିଛି ଦିନ ମଧ୍ୟରେ ଏହି ୮ଟି ଯୁଦ୍ଧ ଜାହାଜ ନିର୍ମାଣ ପାଇଁ ଚୁକ୍ତି ସ୍ୱାକ୍ଷର ହେବା ଆଶା କରାଯାଉଛି।
ତେବେ କ’ଣ ଏହି ନେକ୍ସଟ୍ ଜେନେରେସନ୍ କର୍ଭେଟ୍? କର୍ଭେଟ୍ ହେଉଛି ଛୋଟ ଆକାରର, ଦ୍ରୁତଗତିର ଏବଂ ଅତ୍ୟାଧୁନିକ ଅସ୍ତ୍ରଶସ୍ତ୍ରରେ ସଜ୍ଜିତ ଯୁଦ୍ଧ ଜାହାଜ। ଏଗୁଡ଼ିକ ମୁଖ୍ୟତଃ ଉପକୂଳ ସୁରକ୍ଷା, ସମୁଦ୍ରରେ ନଜର ରଖିବା ଏବଂ ପାଟ୍ରୋଲିଂ ପାଇଁ ବ୍ୟବହାର ହୋଇଥାଏ। ଫ୍ରିଗେଟ୍ ଓ ଡିଷ୍ଟ୍ରୟର୍ ଭଳି ବଡ଼ ଯୁଦ୍ଧ ଜାହାଜ ତୁଳନାରେ ଏଗୁଡ଼ିକ ଛୋଟ, କିନ୍ତୁ ଏଥିରେ ବିଭିନ୍ନ ପ୍ରକାରର ଅସ୍ତ୍ର ଓ ଅତ୍ୟାଧୁନିକ ସେନ୍ସର ଲଗାଯାଇପାରିବ। ଭାରତୀୟ ନୌସେନା ପାଇଁ ନିର୍ମାଣ ହେବାକୁ ଥିବା ଏହି ୮ଟି ଜାହାଜର ପ୍ରତ୍ୟେକଟିର ଓଜନ ପ୍ରାୟ ୨ ହଜାର ଟନ୍ ହେବ। ଏଗୁଡ଼ିକ ଘଣ୍ଟାପ୍ରତି ପ୍ରାୟ ୩୦ ନଟ୍ ବା ସମୁଦ୍ରରେ ପ୍ରାୟ ୫୫ କିଲୋମିଟର ବେଗରେ ଗତି କରିପାରିବ। ଏହାର ସବୁଠାରୁ ବଡ଼ ବିଶେଷତ୍ୱ ହେଉଛି ଏହାର ଷ୍ଟେଲ୍ଥ ଡିଜାଇନ୍। ଏହି ଡିଜାଇନ୍ ଭାରତୀୟ ନୌସେନା ନିଜେ ବିକଶିତ କରିଛି। ଷ୍ଟେଲ୍ଥ ଟେକ୍ନୋଲୋଜି ଦ୍ୱାରା ଶତ୍ରୁପକ୍ଷର ରାଡାର୍ରେ ଜାହାଜକୁ ଚିହ୍ନଟ କରିବା ଅଧିକ କଷ୍ଟକର ହୋଇଥାଏ। ଏହି ଯୁଦ୍ଧ ଜାହାଜଗୁଡ଼ିକ ଏକାଧିକ କାର୍ଯ୍ୟ କରିବାକୁ ସକ୍ଷମ ହେବ। ସମୁଦ୍ର ପୃଷ୍ଠରେ ଥିବା ଶତ୍ରୁ ଜାହାଜକୁ ମୁକାବିଲା କରିବା, ବୁଡ଼ାଜାହାଜକୁ ଚିହ୍ନଟ କରିବା ଓ ଆକ୍ରମଣ କରିବା ସହ ଆକାଶପଥରୁ ଆସୁଥିବା ବିପଦର ମୁକାବିଲା କରିପାରିବ। ଏଥିରେ ରହିବ ଅତ୍ୟାଧୁନିକ ଅସ୍ତ୍ରଶସ୍ତ୍ର, ସେନ୍ସର ଓ ଦ୍ରୁତ ଦିଗ ପରିବର୍ତ୍ତନ କରିବାର କ୍ଷମତା।
ଏହି ପ୍ରକଳ୍ପରେ ୭୦ ପ୍ରତିଶତରୁ ଅଧିକ ସ୍ୱଦେଶୀ ସାମଗ୍ରୀ ବ୍ୟବହାର କରାଯିବ। ଅର୍ଥାତ୍ ଜାହାଜ ନିର୍ମାଣରେ ଅଧିକାଂଶ ଉପକରଣ ଓ ପ୍ରଯୁକ୍ତି ଭାରତରୁ ହିଁ ଆସିବ। ଏହା ସରକାରଙ୍କ ‘ଆତ୍ମନିର୍ଭର ଭାରତ’ ଅଭିଯାନକୁ ଆହୁରି ଆଗକୁ ନେବ । କୋଲକାତାର ଗାର୍ଡେନ୍ ରିଚ୍ ସିପ୍ବିଲ୍ଡର୍ସ ଆଣ୍ଡ ଇଞ୍ଜିନିୟର୍ସ (GRSE) ଏବଂ ଗୋଆ ସିପ୍ୟାର୍ଡ ଲିମିଟେଡ୍ (GSL) ଏହି ୮ଟି ଜାହାଜ ନିର୍ମାଣ କରିବେ। ୪୦ ହଜାର କୋଟିରୁ ଅଧିକ ଟଙ୍କାର ଏହି ଅର୍ଡର ଦୁଇଟି ସରକାରୀ ଜାହାଜ ନିର୍ମାଣକାରୀ ସଂସ୍ଥା ମଧ୍ୟରେ ବଣ୍ଟାଯିବ। ଏହାଦ୍ୱାରା କେବଳ ଏହି ଦୁଇଟି ସିପ୍ୟାର୍ଡକୁ ଦୀର୍ଘକାଳୀନ କାମ ମିଳିବ ନାହିଁ, ବରଂ ଏହା ସହ ଜଡ଼ିତ MSME ଅର୍ଥାତ୍ କ୍ଷୁଦ୍ର ଓ ମଧ୍ୟମ ଉଦ୍ୟୋଗଗୁଡ଼ିକୁ ମଧ୍ୟ କାମ ମିଳିବ। ଏହି ପ୍ରକଳ୍ପ ହଜାର ହଜାର ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୃଷ୍ଟି କରିବା ଆଶା ରହିଛି। ଏହା ସହିତ ଭାରତ ମହାସାଗର ଅଞ୍ଚଳରେ ସୁରକ୍ଷା ଓ ବିକାଶକୁ ଗୁରୁତ୍ୱ ଦେଉଥିବା ‘ସାଗର’ (SAGAR) ଦୃଷ୍ଟିକୋଣକୁ ମଧ୍ୟ ଶକ୍ତି ମିଳିବ।
ଆସନ୍ତା ଏକ ବର୍ଷ ମଧ୍ୟରେ ପ୍ରଥମ କର୍ଭେଟ୍ର ନିର୍ମାଣ କାମ ଆରମ୍ଭ ହେବା ଆଶା କରାଯାଉଛି। ୨୦୩୦ ସୁଦ୍ଧା ପ୍ରଥମ ଯୁଦ୍ଧ ଜାହାଜକୁ ନୌସେନାକୁ ହସ୍ତାନ୍ତର କରିବାର ଲକ୍ଷ୍ୟ ରଖାଯାଇଛି।
ଭାରତ ମହାସାଗର ଅଞ୍ଚଳରେ ଚୀନ୍ର ଉପସ୍ଥିତି ବଢ଼ୁଥିବା ପରିପ୍ରେକ୍ଷୀରେ ଭାରତୀୟ ନୌସେନା ନିଜର ଯୁଦ୍ଧ ଜାହାଜ ବାହିନୀକୁ ଆଧୁନିକ କରିବା ଉପରେ ଜୋର୍ ଦେଉଛି। ଏହି ପ୍ରକଳ୍ପ ନୌସେନାର ଚାଲିଥିବା ଆଧୁନିକୀକରଣ ଯୋଜନାର ଏକ ଅଂଶ। ଏହା ସହିତ ନିଲଗିରି ଶ୍ରେଣୀର ଫ୍ରିଗେଟ୍, ନେକ୍ସଟ୍ ଜେନେରେସନ୍ ଡିଷ୍ଟ୍ରୟର୍ ଓ ଫ୍ଲିଟ୍ ସପୋର୍ଟ ଜାହାଜ ନିର୍ମାଣ କାର୍ଯ୍ୟକ୍ରମ ମଧ୍ୟ ଚାଲିଛି। ମୋଟାମୋଟି ଭାବେ, ୪୦ ହଜାର କୋଟିରୁ ଅଧିକ ଟଙ୍କାର ଏହି ପ୍ରକଳ୍ପ ଭାରତୀୟ ନୌସେନାର ସମୁଦ୍ରପଥ ସୁରକ୍ଷା କ୍ଷମତା ବଢ଼ାଇବା ସହ ଦେଶରେ ଯୁଦ୍ଧ ଜାହାଜ ନିର୍ମାଣ ଶିଳ୍ପକୁ ମଧ୍ୟ ନୂଆ ଗତି ଦେବ।